Скачать или смотреть Աշխատանքային ընդլայնված այց Լերմոնտովո, Անտառաշեն, Ֆիոլետովո և Մարգահովիտ համայնքներ

Հուլիսի 6-ին Լոռու մարզպետ Հրանտ Մարգարյանը մարզպետի տեղակալ Սերգեյ Սարուխանյանի և մի խումբ այլ պաշտոնյաների ուղեկցությամբ այցելեց Վանաձորի տեխնոլոգիական կենտրոն, ապա աշխատանքային այցով եղավ Լերմոնտովո, Անտառաշեն, Ֆիոլետովո և Մարգահովիտ համայնքներում:
Վանաձորի տեխնոլոգիական կենտրոնում (ՎՏԿ) մարզի ղեկավարը կենտրոնի գործարար ծրագրերի պատասխանատու Պատվական Հախինյանի և կրթական ու կազմակերպչական հարցերի պատասխանատու Աննա Հովհաննիսյանի ներկայացմամբ ծանոթացավ ստեղծված պայմաններին, առկա հնարավորություններին և իրականացվող ծրագրերին: Պ. Հախինյանը նշեց, որ ստեղծման օրվանից ՎՏԿ-ն ակտիվորեն համագործակցում է Լոռու մարզպետարանի հետ, և արդեն հասցրել են համատեղ մի շարք ծրագրեր իրականացնել: Հ. Մարգարյանն իր հիացմունքն արտահայտելով կենտրոնում ստեղծված պայմաններից՝ նշեց, որ համագործակցությունն անպայման շարունակվելու և ընդլայնվելու է:
-ՏՏ ոլորտը ներկայում ամենաարագընթաց զարգացող ճյուղերից է, և ճիշտ համագործակցության դեպքում հնարավոր է լիարժեքորեն օգտագործել Վանաձորի տեխնոլոգիական կենտրոնի հնարավորությունները՝ ի շահ մարզի զարգացման,-իր խոսքում ասաց Հ. Մարգարյանը: Նա այս առումով կարևորեց հանրության շրջանում իրազեկման բարձրացումը: Օգտվելով առիթից՝ ՎՏԿ ներկայացուցիչները խնդրեցին մարզպետի աջակցությունը Վանաձոր քաղաքի մուտքերի մոտ ՎՏԿ ծրագրերի մասին պատմող տեղեկատվական պաստառների տեղադրման հարցում: Հ. Մարգարյանը խոստացավ հետամուտ լինել խնդրի լուծմանը:
Մարզպետն այնուհետև այցելեց Լերմոնտովո համայնք, որտեղ հանդիպեց գյուղապետարանի աշխատակազմի, ավագանու անդամների և բնակչության հետ: Հ. Մարգարյանը նրանց հետ զրույցում կարևորեց առավել ակտիվ համագործակցությունը մարզպետարանի հետ, ինչը կնպաստի արդյունավետ աշխատանքի կազմակերպմանը:
Համայնքի ղեկավար Էդիկ Չախալյանը տեղեկացրեց, որ համայնքային բյուջեի պահուստային ֆոնդում առկա 12 մլն դրամը նախատեսում են ծախսել միջհամայնքային ճանապարհների վերանորոգման վրա, քանի որ գյուղում առաջնային խնդիրներից մեկը հենց դա է: Հ. Մարգարյանը հորդորեց նաև համայնքապետարանում աստիճանաբար սահուն սերնդափոխություն իրականացնել և հնարավորություն տալ երիտասարդ կարող ուժերին թարմություն մտցնել ոլորտային աշխատանքներում:
Այցելություն կատարվեց նաև Լերմոնտովոյի մանկապարտեզ: Վերջինիս վերակառուցման ծրագիրն իրականացվել է նախորդ տարի Հայաստանի տարածքային զարգացման հիմնադրամի կողմից՝ նպատակ ունենալով բարեկեցիկ և հարմարավետ պայմաններում կազմակերպելու համայնքի նախադպրոցական տարիքի երեխաների դաստիարակության գործընթացը: Ծրագիրն իրականացվել է Համաշխարհային բանկի ֆինանսական աջակցությամբ:
Շրջայց կատարելով մանկապարտեզում՝ Հ. Մարգարյանն ընդգծեց հատկապես տարածքի պահպանության և մաքրության խնդիրը՝ հանձնարարելով համայնքի ղեկավարին ավելի հետևողական լինել այս հարցում:
Անտառաշենում նույն ձևաչափով հանդիպմանը մարզպետը հաղորդակից դարձավ բնակիչների խնդիրներին: Նա առաջարկեց դրանք գրավոր կերպով ներկայացնել մարզպետարան՝ քննարկելու և ամփոփ փաստաթղթով կառավարությանը ներկայացնելու համար:
Ֆիոլետովոյում հանդիպումը համայնքապետարանի աշխատակիցների, ավագանու անդամների և բնակիչների հետ անցկացվեց համայնքապետարանում: Այստեղ մարզպետ Հ. Մարգարյանը, բարձր գնահատելով հայ-ռուսական դարավոր բարեկամությունը, վստահեցրեց, որ անելու է հնարավորինը, որպեսզի այստեղի ռուսազգի բնակիչներն իրենց զգան որպես ՀՀ լիարժեք քաղաքացիներ և օգտվեն բոլոր ընձեռված հնարավորություններից:
Այցի վերջին կանգառը Մարգահովիտ համայնքում էր: Նախ այցելություն կատարվեց Մարգահովտի «Էյ Թի Փի» բարեգործական հիմնադրամի "Օհանյան" բնապահպանական կրթության կենտրոն, որտեղ այցելուները ծանոթացան պայմաններին և իրականացվող ծրագրերին, ապա Մարգահովտի դպրոցում մարզպետը և մարզպետարանի պաշտոնյաները հանդիպեցին գյուղապետարանի աշխատակիցների, ավագանու անդամների ու համայնքի բնակիչների հետ: Վերջիններս շնորհավորեցին մարզի ղեկավարին՝ պատասխանատու պաշտոն ստանձնելու կապակցությամբ՝ նշելով, որ մշտապես պատրաստ են սատարելու Հ. Մարգարյանին:
Մարզի ղեկավարն իր հերթին նշեց, որ հետևողական է լինելու մարզի բոլոր համայնքներում առկա խնդիրների՝ ըստ առաջնահերթության լուծմանը.
-Կուսակցական, սանիկ-բարեկամ հարաբերություններն իսպառ բացառվելու են բոլոր ոլորտներում: Կարևորվելու են առաջնային նշանակության խնդիրներն ու պրոֆեսիոնալիզմը,-ասաց Հ. Մարգարյանը:
Օրվա ավարտին մարզպետն այցելեց համայնքի նոր կառուցվող ըմբշամարտի մարզադպրոց, որն արդեն ավարտական փուլում է և շահագործման կհանձնվի սեպտեմբերին: Շինարարությունն իրականացվում է ՀՀ կառավարության սուբվենցիոն ծրագրով՝ 60 (համայնք)–40 (պետական բյուջե) համաֆինանսավորման տարբերակով: Նույն 60-40 համաֆինանսավորման տարբերակով է կառուցվում նաև Մարգահովտի մանկապարտեզի երկրորդ մասնաշենքը: Համայնքի ղեկավար Սամվել Անանյանը մարզպետին տեղեկացրեց, որ երեխաների թվի ավելացմամբ պայմանավորված՝ անհրաժեշտություն է առաջացել մանկապարտեզի տարածքն ընդլայնելու, ուստի կառավարությանն են ներկայացրել այս ծրագիրը, որն էլ արժանացել է հավանության: