Скачать или смотреть 🕉️श्री धाविर महाराज पालखी सोहळा 2024 रोहा 🙏💫🎊 1st Vlog

#dhavirmaharaj #roha
प्रसन्नाय खड्गधराय सौख्यकराय दुःखहराय सर्वशत्रुनाशाय देवाय श्रीघावीराय नमो नमः ||

महाराष्ट्राची राजधानी मुंबई, त्या मुंबई पासून केवळ सव्वाशे किलोमिटर अंतरावर शिवरायांच्या रायगड जिल्हयात ‘रोहा’ हे निसर्गसुंदर गाव वसलेले आहे. उत्तरेला अवचितगड आणि दक्षीणेला कळसगीरीचा डोंगर आणि बारमाही वाहणारी कुंडलिका या सा-यांच्या मधे वसलेलं टुमदार घरांचे आणि छोटया मोठ्या हिरव्या झाडांचे रोहा हे गाव. या सा-या गोष्टी रोह्याची सुरेख नैसर्गिक रचना डोळयासमोर उभी करतात.
प्रत्येक भक्ताचे श्रद्धास्थान, रोह्याच्या प्रत्येकाच्या हृदयाचा राजा म्हणजेच श्री धावीर महाराज म्हणुनच प्रत्येक भक्त श्री धावीर महाराजांची पालखी असो, श्री धावीर महाराजांची आरती असो किंवा श्री धावीर महाराजांना पोलिसांची सशस्त्र मानवंदना देण्याची वेळ असो त्यावेळी श्री धावीर महाराजांच्या दर्शनासाठी अधीर असतो त्यांची पाऊले श्री धावीर महाराजांच्या देवळाच्या दिशेने झपाझप अंतर कापत असतात. तसेच प्रत्येक रविवारी प्रत्येकजण आपापली सुख दुःखे सांगण्यासाठी, पार्थना करण्यासाठी, एखादे मागणे मागण्यासाठी किंवा एखादा नवस फेडण्यासाठी आपल्या लाडक्या श्री धावीर महाराजांच्या दरबारात हजेरी लावतोच व कधीही न संपणारा उत्साह व प्रसन्नतेचा प्रसाद घेऊन परतत असतो.

श्री धावीर देवस्थानात मोठया प्रमाणात साजरा होणारा नवरात्रौत्सव एक आगळा वेगळा उत्सव असतो. देवाचे घटी बसणे ते दस-या दिवशी देवाचे उठणे व त्याचे दुसरे दिवशी संपुर्ण गावात फिरणे हा अगदी दहा ते अकरा दिवसांचा भरगच्च कार्यक्रम असतो. अश्विन शुद्ध प्रतिपदेला दुपारी बरोबर १२.३० वाजता सर्व नगरजन श्री धावीर महाराजांच्या मंदिरात एकत्र येतात व ढोल, नगारे, संवळ व घंटाच्या पवित्र गजरात श्री धावीर महाराजांची आरती होते. प्रत्येक भक्त श्रद्धापूर्वक त्या आरतीत सहभागी होतो. त्यानंतर रोजच्या रोज सकाळी ७ वाजता, संध्याकाळी ७ वाजता व रात्री १२ वाजता अशी दिवसातुन तीन वेळा महाराजांची आरती होते. ह्यापैकी कमीत कमी एका तरी आरतीला हजर राहण्यात प्रत्येक भक्त धन्यता मानतो. नवरात्राच्या प्रत्येक रात्री ‘प्रहर’ म्हणजेच पहारा असतो हा प्रहर रोह्यातल्या प्रत्येक समाजाला व विभागाला समावुन घेणारा असतो प्रत्येकाचा दिवस वर्ष नुवर्षे ठरलेला असतो. गेली कित्येक वर्षे ही परंपरा निष्ठेने व श्रद्धेने सांभाळली गेली आहे.

नवरात्रात रोज संध्याकाळ पासुन मध्यरात्री पर्यंत गोंधळ घातला जातो. जेजुरीहून येणारे श्री खंडोबाचे गोंधळी ही सेवा अव्याहत पणे बजावत आहेत. महिलांसाठी अश्विन शुद्ध सप्तमीला श्री धावीर महाराजांचे मंदिरात हळदी कुंकवाचा कार्यक्रम असतो. प्रत्येक महिला भक्त ह्या कार्यक्रमात सहभागी होते व आपले सौभाग्याचे कुंकु वळकट कर अशी देवाला प्रार्थना करते. दस-याच्या दिवशी श्री धावीर महाराज दुपारी ठिक १२ वाजता घटोत्थापन होऊन उठतात तेव्हा सुद्धा ढोल, नगारे, संबळ व घंटा ह्यांच्या पवित्र गजरात आरती होते. संध्याकाळी भक्त मंदिरात जमतात आणि स्नेहाचे प्रतिक असलेले सोने म्हणजेच आपटयाचे पान एकमेकांना देऊन प्रेमाने आलिंगन देतात व सिमोल्लंघन करतात. आता त्यांना आतुरता असते ती दुस-या दिवसाची म्हणजेच श्री धावीर महाराजांच्या पालखी सोहळयाची. दस-याच्या दुस-या दिवशी दरवर्षी होणारा पालखी सोहळा अत्यंत मंगल व उत्साही वातावरणात साजरा केला जातो. त्या दिवशी श्री धावीर भक्तांचा ओसंडुन वाहणारा उत्साह अचंबित करणारा असतो. जवळ जवळ २६ तास चालणा-या ह्या पालखी मिरवणुकीत भक्तांचा उत्साह तीळमात्र कमी होत नाही, उलट तो उत्तरोत्तर वाढतच जातो. त्या दिवशी सारा गाव तर एकत्र येतोच पण नोकरी धंद्यानिमित्त बाहेर गेलेला रोहेकर पालखीच्या त्या दिवशी मात्र आवर्जुन श्री धावीर महाराजांना नमस्कार करण्यासाठी उपस्थित राहतो. त्यादिवशी माहेरवाशीणी सुद्धा आपल्या श्रद्धा स्थानाला नमस्कार करण्यासाठी माहेरी येतात . श्री धाबीर महाराजांची पालखी त्यादिवशी आपल्या लाडक्या भक्तांना भेटण्यासाठी घरोघर जाते आणि प्रत्येक भक्त आपल्या लाडक्या देवाचे पंचारती ओवाळुन व साखर फुटाणे उधळुन स्वागत करतो.
दुपारी ४ वाजता सर्वांची पाऊले मोरे आळीकडे वळतात. श्री धावीर महाराजांचे वारे कुळकण्यांच्या वंशातील एका व्यक्तिच्या अंगात खेळणार असते. पालखी सुद्धा जिथे असेल तिथुन ४ वाजता मोरे आळी येथील श्री बावीर चौकात आणली जाते. इथे मोरे आळीतील कुळकर्णी यांच्या घरी म्हणजे गादीवर श्री धावीर महाराजांचे वारे घुमू लागलेले असते. पालखी चौकात येताच अंग धरलेली व्यक्ति त्वेषाने पालखीजवळ पोहोचते आणि राजे कुटुंबाचा वंशज श्री धावीर महाराजांच्या पालखीतील लखलखणारी तळपणारी तलवार तीच्याकडे अत्यंत श्रद्धेने सुपुर्द करते. आपल्या लाडक्या देवाला त्याचे शस्त्र देताना राजे कुटुंबाला किती धन्यता वाटत असेल याची कल्पनाच केलेली बरी. संध्याकाळी पालखी विठलनगर म्हणजेच अंधार आळीत येते आणि देशमुखांच्या घरी काही क्षण विश्रांतीसाठी थांबते. श्री धावीर महाराज भक्तांना दुध देऊन देशमुख कुटुंबीय सुद्धा धन्यता पावतात. पुढे येणा-या श्री गिरोबा महाराजांच्या मंदिरातही पालखी दाखल होते. तेथील सारा परिसर उत्साहाने भारलेला असतो . साधारण मध्यरात्री ब्राम्हण आळीतून पालखी मार्गक्रमण करते व पुन्हा उत्तररात्री मोरे आळीतून पालखी भल्या पहाटे सोनार आळीत प्रवेश करते. तेथील श्री बापुजी महाराजांना पालखी भेटते तेव्हा सहस्त्ररश्मी सुर्य सुद्धा पूर्व क्षितीजावर श्री धावीर महाराजांना वंदन करण्यासाठी व सर्व भक्तांना नवचैतन्य देण्यासाठी हजर होतो.

आता पालखी जवळ जवळ २६ तासांनी संपुर्ण रोहे शहरात चैतन्य व मांगल्य पसरवुन परतलेली असते. पुन्हा मानवंदना होते व श्री धावीर महाराज आपल्या जागी स्थानापन्न होतात आणि श्री धावीर महाराजांचा भक्त वर्षभर पुरणारा उत्साह चैतन्य व स्फुर्ती घेऊन घरी परततो आणि आपल्या नित्यक्रमात सामील होतो.

प्रसन्नम् खड्गधरम् सौख्यकरम् दुःखहरम् | सर्वशत्रुनाशम् देवम् श्री धावीरम् नमामः |