Скачать или смотреть Malako ma suka ya Lumumba

Totie awa na loyembo ya lingala malako ma suka ya Lumumba mpo bayimboka basosola yango malamu / En musique lici la lettre de Lumumba que nous avons traduite en lingala pour que son peuple aie bien en mémoire ses paroles)

#texte:MALAKO MA SUKA YA LUMUMBA
Molongani wa ngai wa bolingo
Nazali kokomela yo maloba maye
Kasi nayebi te soko makokomela yo
Tango nini makokomela yo
Pe soko nakozala na bomoyi tango okotanga mango
Kati ya etumba mpona bonsomi ya ekolo na ngai
Natiaka tembe na ngonga ata moke te
Mpo na elonga ya suka ya likambo eye ya etumba
Oyo mpona yango baninga ba ngai na ngai moko elongo
Topesaki bomoyi bwa biso mobimba
Nzoka oyo tolingaki mpona ekolo na biso
Ete ezwa bomengo na yango na efandeli ya malamu
Na bonsomi nyonso
Badongolomiso ya Babelesi na baninga ba bango ya Eropa
Bayebaki lisungi ya kati pe ya libanda
Lisungi oyo bayebaki ntina te
Kati ya basali ya lingomba ya molongo
Lisanga oyo totiaki motema na biso nyonso
Tango tosengaki bango lisungi
Bango bana balingaki yango soko moke te
Bapesaki kanyaka na bana mboka basusu
Balonaki lokuta pe bapakolaki bosoto na bonsomi ya biso
Nakoki koloba lisusu nini ?
Soki ‘te kati ya liwa to na bomoyi
Nsomi to na boloko ,na mitindo ya babulamatadi
Bomoto na ngai ezali na litomba te
Ezali nde Kongo
Ezali bayimboka ya bwale oyo babongoli bonsomi bwa bango na boloko moko oyo bakotala bango na libanda
Tango mosusu na mawa ya lityo
Tango mosusu na esengo pe bakosepela
Kasi kondima na ngai ekotikala libela kaka makasi
Nayebi pe nazali koyoka kati na ngai moko ete
Ata ndele bayimboka ba ngai bakobengana banguna ba bango banso
Baye ya kati pe ya libanda
Bakoteleme lokola moto moko
Mpona koboya basali ya linyango mosolo
Oyo ya bosoto pe nsoni
Mpona kozongela bonsomi na bango
O nse ya moyi moko ya peto
Tozali biso moko te
Afrika, Azia na bansomi ya bikolo biye bisila kozwa bonsomi ya bango na mokili
Bakozala tango nyonso na ngambo ya bayi kongo
Baye bakotika etumba kaka mokolo moye badongolomiso na babuni ya bampaya na bango
Bakozalaka lisusu te o ekolo na biso
Na bana ba ngai baye nakotika
Pe oyo tango mosusu nakomono lisusu te
Nalingi baloba na bango ete
Ndaka ya Kongo ezali kitoko !
Pe ekozela na bango se lokola ekozela na moko moko ya bayikongo ete
Basala mosala ya litomba monene ya kotonga lisusu bonsomi bwa biso.
Mpo soko bosembo bozali te ,bonsomi pe bozali te
Soko lisambisi ya sembo ezali te , bonsomi pe bozali te.
Pe lisusu soko lipanda ezali te , bansomi pe bazali te
Na yango ata ko minyoko yango ya ndenge nyoso, nakangaki se motema namilelaki te.
Mpo nakolinga kutu nakufa nsomi na lolendo nyoso na kondima oyo ekitaka te, pe na elikya ya makasi na ndaka ya ekolo na ngai na ‘te nazala na bomoyi kati ya bowumbu pe kotuka mitindo ya litomba .
Lisolo ya molongo ekotatola ndele . Kasi ekozala te lisolo oyo bakoteyaka na Bruxelles, Washington,Paris, to na lingomba ya molongo ,kasi nde oyo bakoteya na bikolo bikangolami na badongolomiso na balandı ba bango. Kolela te molongani wa ngai , ngai nayebi ‘te ekolo na ngai oyo ekonyokwama mingi ekoyeba kobatela lipanda pe bonsomi na yango. Bomoyi molayi na Kongo ! Bomoyi molayi na Afrika! .-Patrice Lumumba