Скачать или смотреть കവിത: ക്രിസ്തീയ പോരാളി / R K / R Krishnankutty Thiruvattar / ആർ. കൃഷ്ണൻകുട്ടി തിരുവട്ടാർ / ബിനു പോൾ

കവിത
ആർ. കെ
ക്രിസ്തീയ പോരാളി

"" ജീവിച്ചാൽ ക്രിസ്തുവിനായ്
പ്രവർത്തിച്ചാൽ ക്രിസ്തുവിനായ്
മരിച്ചാൽ ക്രിസ്തുവിനായ് ""
(ആർ കെ )

ക്രിസ്തുഭക്തൻ ആർ. കൃഷ്ണൻ കുട്ടി തിരുവട്ടാറിന്റെ ജീവിതം ഒപ്പിയെടുത്ത ഒരു ഛായാപദ്യം.

ക്രൂശിന്റെ ദർശനം നെഞ്ചിലേറ്റിയ ആർ കെ തന്റെ വാഗ്ധോരണി കൊണ്ട് കവലകളെ പ്രകമ്പനം കൊള്ളിച്ച സുവിശേഷപ്രസംഗകനായിരുന്നു. അക്ഷരക്കൂട്ടുകൾ ക്രൂശിന്റെ സ്നേഹത്തിൽ ചാലിച്ചു തന്നാൽ ആവോളം യേശുക്രിസ്തുവിനെ ഉയർത്തിയിട്ട് വിട്ടു പിരിഞ്ഞു ഇന്ന് ക്രിസ്തുവിനോട് കൂടെ വിശ്രമിക്കുന്ന തിരുവട്ടാർ കൃഷ്ണൻ കുട്ടി സഹോദരന്റെ ജീവിതം നമുക്ക് ഏവർക്കും ഒരു വെല്ലുവിളി തന്നെയാണ്.

വിട്ടു പിരിഞ്ഞവർക്ക് ഒപ്പത്തിലെത്താം പോരാ വിട്ടു പോയവരെക്കാൾ കുറച്ചു കൂടി മുന്നേറി ഓടാം.

നിങ്ങളോടു ദൈവവചനം പ്രസംഗിച്ചു നിങ്ങളെ നടത്തിയവരെ ഓർത്തുകൊൾവിൻ ; അവരുടെ ജീവാവസാനം ഓർത്ത് അവരുടെ വിശ്വാസം അനുകരിപ്പിൻ. എബ്രായർ 13: 7

രചന, ആലാപനം : ബിനു പോൾ, കുന്നക്കുരുടി
BGM : Simon K V

Lyrics


രക്താഭിവാദന വിപ്ലവ വാചകം
വ്യക്തമായൂഴിയിലെങ്ങും മുഴക്കിയ
ക്രിസ്തുവിൻ ക്രൂശിനെ നെഞ്ചതിലേറ്റിയ
ക്രിസ്തനിൻ ശക്തനാം ശിഷ്യനും യാത്രയായി

വേദിയിൽ ഗർജ്ജനം കേട്ടിരുന്നെങ്കിലും
വേദനിക്കുന്നവർക്കത്താണിയായവൻ
വേദികൾ തുട്ടിനായ് തേടാതെ സത്യമാം
വേദത്തിനൊത്ത പോൽ ജീവിതം ചെയ്തവൻ

കൃഷ്ണനിൻ കുട്ടിയായ് ബാല്യം കഴിച്ചവൻ
ക്രിസ്തുവിൽ പുത്രനായ് വീണ്ടും ജനിച്ചവൻ
കർത്തനിൻ പത്രമായ് പാരിൽ പുലർന്നവൻ
കത്തും പ്രഭാകര തുല്യം വിളങ്ങിയോൻ

ബാല്യകാലത്തിലെൻ കാതിൽ മുഴങ്ങിയ
കാലാന്തരത്തിൽ ജ്വലിച്ചു പടർന്നൊരാ വിസ്ഫോടനത്തിന്റെ ശക്തി പേറുന്നൊരാ
വിപ്ലവ വാക്യം മറക്കില്ലൊരിക്കലും

ജീവിക്കുമെങ്കിലോ ക്രിസ്തുവിനായി
പ്രവർത്തിക്കുമെങ്കിലോ ക്രിസ്തുവിനായി
മരണം വരിക്കലും ക്രിസ്തുവിനായി
പിരിയില്ലൊരിക്കലും ക്രൂശിതനേശുവേ

ആശയം കീശയിൽ കുത്തി നിറച്ചവൻ
ആരെയും കൂസാതെ സത്യം പറഞ്ഞവൻ
ആവേശമോടെ തൻ നെഞ്ചത്തടിച്ചവൻ
ആവോളമേശുവിൻ നാമം ഉയർത്തിയോൻ

അക്ഷരത്തിരമാലയാർത്തുയരുന്നൊരു
ലക്ഷണമിക്ഷിതി എങ്ങും പടരവേ
വൻമലകൾ വട വൃക്ഷങ്ങളെത്രയോ
വീണുടഞ്ഞു ക്രിസ്തു നാമമുയരവെ

ദ്രവ്യാഗ്രഹത്തിന്റെ കൗശല വിദ്യയും
നവ്യമാം ആദായ സൂത്രവാക്യങ്ങളും
ഒട്ടുമറിയാത്ത പച്ച മനുഷ്യനായ്
പട്ടിണിക്കൂട്ടർക്കൊരപ്പനായി തീർന്നു താൻ

കിട്ടുന്ന തുട്ടുകൾ തൂക്കി നോക്കാതുടൻ
മുട്ടുന്ന ഏവനും തിട്ടമായ് നൽകിയോൻ
ക്രൂശിന്റെ ദർശനം ജീവിതയാത്രയിൽ
കാശിന്നു വേണ്ടി ബലി കൊടുക്കാത്തവൻ

ഒടുവിലത്തെ കുത്തുമിട്ടു കൊള്ളുന്നിതാ
ഒരുനാളും ഓർമ്മകൾ തീരാത്ത മണ്ണിതിൽ
ഒരുപാടു ഭക്തഹൃദയങ്ങളേന്തിടും
ഒരുനാളും അണയാത്ത ജ്വാലയായ് മാറിടും

ക്രിസ്തുവിൻ ഭാവം ശിരസ്സതിലേന്തിടാം
ക്രിസ്തനിൻ മാർഗമീ പാരിൽ പരത്തിടാം
വിട്ടുപിരിഞ്ഞവർക്കൊപ്പത്തിലെത്തിടാം
വിശ്വാസ ദർശനം മാത്രം പകർത്തിടാം

ക്രിസ്തുവിൻ ഭാവം ശിരസ്സതിലേന്തിടാം
ക്രിസ്തനിൻ മാർഗമീ പാരിൽ പരത്തിടാം
വിട്ടു പോയോർക്കേറെ മുന്നേറി ഓടിടാം വിശ്വാസദർശനം മാത്രം പകർത്തിടാം

കുരിശതിൽനിണമൂറ്റി നൽകിയ നാഥനായ്
വരിക യുവാക്കളെ അണിചേർന്നു നിൽക്കുവിൻ
സിരകളിൽ സ്വർഗീയശക്തി പകർത്തുവിൽ ഗുരുവിനായി മരണം വരെയും പൊരുതിടാം

പോരിന്റെയായുധം വാളും വടികളും
ചോര ചിന്തുന്നതാം ചിന്തകളല്ലതാൽ
ക്രിസ്തുവിൻ ഭാവമാം സ്നേഹം സഹനവും
കർത്തനിൻ ത്യാഗം ക്ഷമയും പകർത്തിടാം