ចាប់ពីថ្ងៃទី១៣ ដល់ថ្ងៃទី១៥ ខែសីហា ឆ្នាំ២០២៤

ឯកឧត្តមកិត្តិនីតិកោលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ បានដឹកនាំគណៈប្រតិភូក្រុមប្រឹក្សាធម្មនុញ្ញ អញ្ជើញធ្វើសិក្ខាសាលាផ្សព្វផ្សាយអំពី «សមិទ្ធផលធម្មនុញ្ញសម្រេចបានក្នុងរយៈពេល ៣០ឆ្នាំ» នៅតាមបណ្តាខេត្តចំនួន៦ រួមមាន បាត់ដំបង, ប៉ៃលិន, បន្ទាយមានជ័យ, កំពង់ធំ, សៀមរាប, និង ឧត្តរមានជ័យ។
សិក្ខាសាលាផ្សព្វផ្សាយនេះ មានការអញ្ជើញចូលរួមពីសំណាក់ លោក លោកស្រី អ្នកនាងកញ្ញា ជាក្រុមប្រឹក្សា និងគណៈអភិបាល ខេត្ត ក្រុង ស្រុក ប្រធានសាលាដំបូង និងព្រះរាជអាជ្ញាអមសាលាដំបូងខេត្ត ស្នងការខេត្ត មេបញ្ជាការតំបន់ប្រតិបត្តិការសឹករងខេត្ត មេបញ្ជាការបញ្ជាការដ្ឋានកងរាជអាវុធហត្ថខេត្ត ប្រធានមន្ទីរ អង្គភាពជុំវិញខេត្ត នាយកមជ្ឈមណ្ឌលគរុកោសល្យភូមិភាគខេត្ត នាយកសាលាគរុកោ សល្យ និង វិក្រឹត្យការខេត្ត​ និងសមាសភាពពាក់ព័ន្ធ ជាច្រើនរូបទៀត។
ខ្លឹមសារសំខាន់ៗ នៃបទបង្ហាញជុំវិញប្រធានបទនៃការផ្សព្វផ្សាយ រួមមាន៖

I- រដ្ឋធម្មនុញ្ញឆ្នាំ១៩៩៣ ជារដ្ឋធម្មនុញ្ញមានលក្ខណៈប្រជាធិបតេយ្យជឿនលឿន ដែលបានកើតចេញពីឆន្ទៈរួម របស់ប្រជារាស្ត្រខ្មែរគ្រប់និន្នាការនយោបាយ

សភាធម្មនុញ្ញ បានតាក់តែងរក្សាឱ្យមានមកវិញនូវគុណតម្លៃប្រពៃណីខ្មែរ (គឺជាតិ សាសនា ព្រះមហាក្សត្រ) អមជាមួយគុណតម្លៃធម្មនុញ្ញទំនើបជាមូលដ្ឋានគ្រឹះ (គឺប្រជាធិបតេយ្យ សិទ្ធិមនុស្ស នីតិរដ្ឋ) ដោយតាក់តែងបញ្ចូលទាំងស្រុង និងដោយលម្អិតនូវខ្លឹមសារនៃឧបសម្ព័ន្ធទី៥ នៃកិច្ចព្រមព្រៀងសន្តិភាពទីក្រុងប៉ារីសស្តីពី «គោលការណ៍នៃរដ្ឋធម្មនុញ្ញថ្មីរបស់កម្ពុជា»។ ក្នុងដំណើរការអនុវត្តជាក់ស្តែង ការបន្សាំបន្ស៊ីគ្នានៃគុណតម្លៃទាំងពីរ បានបង្កនូវកម្លាំងសម្របសម្រួលនិងជំរុញរួមគ្នា ក្នុងការដោះស្រាយបញ្ហានយោបាយនិងបញ្ហាច្បាប់ ដែលបានកើតមានឡើងជាបន្តបន្ទាប់ ដោយរក្សាបាននូវភាពសុខដុមរមនាក្នុងសង្គម ញុំាងឱ្យរដ្ឋធម្មនុញ្ញនេះនិងរបបនយោបាយមានស្ថិរភាពរយៈពេលវែង៣០ឆ្នាំ (ពីឆ្នាំ១៩៩៣ ដល់ឆ្នាំ២០២៣)។

ទាក់ទងនឹងការបន្សាំបន្ស៊ីគ្នារវាងគុណតម្លៃទាំងពីរ លោកប្រធាន បានបញ្ជាក់ថា «ព្រះរាជាណាចក្រកម្ពុជា សម្រេចបានលទ្ធផលវិជ្ជមាន (ភាពសុខដុមរមនាក្នុងសង្គម)» ហើយរាជរដ្ឋាភិបាលកម្ពុជា បាននិងកំពុងធ្វើឲ្យគុណតម្លៃទាំងពីរ ដែលមានគុណតម្លៃទំនើបជាគ្រឹះនេះ សម្រេចជាសមិទ្ធផលជាក់ស្តែងក្នុងការអភិវឌ្ឍសង្គមជាតិ។ លោកប្រធានក៏បានលើកឡើងអំពីពិសោធន៍នៃការធ្វើទំនើបកម្មរបស់បណ្តាប្រទេសមិនទាន់រីកចម្រើន ពិសេសប្រទេសនៅអាស៊ី ដែលទទួលយកនិងអនុវត្តតាមគំរូនយោបាយអភិវឌ្ឍរបស់បស្ចិមប្រទេស ជាការសង្កេតទូទៅ ប្រទេសទាំងនោះ តែងមានការបម្រុងទុកមួយ គឺ «ទទួលយកនយោបាយ ទំនើប តែមិនឱ្យបាត់ប្រពៃណីទំនៀមទម្លាប់បុរាណ» ដែលជាព្រលឹងជាតិរបស់គេ។ ប្រទេសទាំងនោះមានជំហរដូចនេះ អាស្រ័យដោយប្រទេសទាំងនោះមានអារ្យធម៌បុរាណ ដែលជា មោទនភាពជាតិ។ ដូច្នេះផ្អែកលើបទពិសោធន៍នេះ សម្រាប់ករណីនៃប្រទេសកម្ពុជា ក្នុងពេល ថ្មីៗនេះ ការបើកការដ្ឋាន ព្រែកជីកហ្វូណនតេជោ ដែលរាជរដ្ឋាភិបាលកម្ពុជាបានប្តេជ្ញាធ្វើឲ្យបានសម្រេច ក្នុងពេលអនាគតដ៏ខ្លីខាងមុខ គឺជាឧទាហណ៍ជាក់ស្តែង ដែលភ្ជាប់មោទនភាពក្នុងពេលបច្ចុប្បន្ន ទៅនឹងអតីតកាលសម័យហ្វូណន ដែលបុព្វបុរសខ្មែរបានអនុវត្តការលើកកម្ពស់នយោបាយទឹ ជាអាទិ៍ការជីកប្រព័ន្ធព្រែកធំធេង ដើម្បីជាប្រយោជន៍ដល់វិស័យគមនាគមន៍ និងវិស័យកសិកម្ម។ដូច្នេះត្រូវមានការសិក្សានិងបង្កលក្ខណៈ ធ្វើឲ្យប្រជាពលរដ្ឋមានការយល់ ដឹងអំពីបេតិកភណ្ឌវប្បធម៌បុរាណរបស់ជាតិ និងមើលឃើញខ្លឹមសារនៃវប្បធម៌នេះ ដែលជាកត្តារួមចំណែកពង្រឹងគុណតម្លៃទំនើប។ ក្នុងគោលដៅនេះ កត្តាត្រូវធ្វើការសិក្សាយល់ដឹង រួមមានកត្តាមោទនភាពជាតិ, កត្តាសុខដុមនីយកម្មសង្គម, និងកត្តាឥទ្ធិពលនៃជំនឿផ្សេងៗ។
ក្នុងនោះផងដែរ លោកប្រធានក្រុមប្រឹក្សាធម្មនុញ្ញ បានជូនជាអនុសាសន៍លើការបន្សាំបន្ស៊ី គុណតម្លៃទាំងពីរ តាមបីរបៀប ៖

តាមរបៀបសម្របសម្រួល និងរបៀបជ្រើសរើសធាតុផ្សំនៃគុណតម្លៃទាំងពីរ ដើម្បីបន្សាំបន្ស៊ីជាមួយគ្នា ។
ការអនុវត្តការបន្សាំបន្ស៊ីគុណតម្លៃទាំងពីរ ទទួលបានលទ្ធផលជោគជ័យ និងប្រកប ដោយចីរភាព ចំណុះនឹងការបកស្រាយខ្លឹមសារនៃគុណតម្លៃនិងការអនុវត្ត ដែលត្រូវធ្វើក្នុងស្មារតីទទួលខុសត្រូវខ្ពស់ ចំពោះឧត្តមប្រយោជន៍ជាតិ។
ការអនុវត្តការបន្សាំបន្ស៊ីនេះ ក្នុងករណីខ្លះមានការចាំបាច់ត្រូវធ្វើការកែទម្រង់និងក៏អាច ប្រឈមនឹងការប្រឆាំងជំទាស់ ដែលត្រូវដោះស្រាយដោយអត់ធ្មត់បំផុត ។

ចំពោះសារៈសំខាន់នៃគុណតម្លៃបុរាណ ក្នុងអភិក្រមបន្សាំបន្ស៊ីគុណតម្លៃទាំងពីរ ឯកឧត្តមប្រធានក្រុមប្រឹក្សាធម្មនុញ្ញ ដែលបានលើកឡើង រួមមាន ៖

តួនាទីពង្រឹងអត្តសញ្ញាណជាតិ ព្រលឹងជាតិ ឯកភាពជាតិ ភាពធនខាងស្មារតីរបស់ជាតិ ចំពោះមុខបញ្ហាវិបត្តិធំៗ និងការវិវឌ្ឍឆាប់រហ័សរបស់ពិភពលោកបច្ចុប្បន្ន។
តួនាទីរួមចំណែកពង្រឹងចំណងទាក់ទងរវាងវប្បធម៌នៅនឹងកន្លែង (culture locale) ជាមួយលទ្ធិប្រជាធិបតេយ្យសេរី ដែលនាំទៅដល់ការបញ្ជ្រាបគុណតម្លៃធម្មនុញ្ញទំនើបទៅក្នុងស្មារតីនៃសង្គមខ្មែរ។