Скачать или смотреть PLAN, WORK & SUCCEED - EVERWIN PRINCIPAL'S TALK (HELLO DEAR EVERWINNERS - 120)

அன்புள்ள எவர்வின்னர்களுக்கு வணக்கம். உங்களுக்கு எனது ஆசிகள்.

இப்போது நான் மதுராந்தகம் எவர்வின் வித்யாஷ்ரம் பள்ளியிலிருந்து பேசுகிறேன். இது எனக்கு மிகவும் பிடித்த இடம். நான் பிறந்து வளர்ந்தது இங்கேதான். இங்கு வளர்ந்து வரும் உலகத்தரம் வாய்ந்த கட்டுமானத்தை பாருங்கள். இங்கே பள்ளி கட்ட வேண்டும் என்ற என் கனவு நிறைவேறி இருக்கிறது.

நேற்று கொளத்தூர் எவர்வின் மெட்ரிகுலேஷன் பள்ளியின் பத்தாம் வகுப்பு மாணவி ருசுலா இயற்கை எய்தினார். நான் செம்பியத்தில் உள்ள அவரது வீட்டிற்கு சென்றிருந்தேன். அவள் என்னை பற்றி அடிக்கடி பேசுவாள் என்று அவரது பாட்டி கூறினார். அவருடைய அம்மா கண்ணீருக்கு மத்தியில், உயிரற்று கிடக்கும் தன் மகளிடம் என்னைக் வணங்கச் சொன்னார். அதைப் பார்த்து என்னால் கண்ணீரையும் உணர்ச்சிகளையும் கட்டுப்படுத்த முடியவில்லை.

நான் காரணங்களை ஆராய விரும்பவில்லை. இருப்பினும், இதுபோன்ற துரதிஷ்டவசமான சம்பவங்களை நாம் தவிர்க்கலாம். குழந்தைகளே, நீங்கள் உங்கள் உடல் நலத்தை கவனித்துக் கொள்ள வேண்டும். ஏதேனும் அசாதாரண அறிகுறிகள் இருந்தால் உங்கள் பெற்றோரிடம் தெரிவிக்க வேண்டும். பெற்றோர்களும் தங்கள் குழந்தை எப்போதும் ஆரோக்கியமாகவே இருப்பார்கள் என்று நம்பியிருக்கக் கூடாது. அவர்களின் உடல் நலத்தில் அக்கறை காட்ட வேண்டும்.

என் வாழ்நாளில் இது போன்ற சவால்கள் பல இருந்த போதிலும் நான் உழைப்பதை நிறுத்துவதில்லை. இன்று கூட சென்னையில் இருந்து காலை 7 மணிக்கு புறப்பட்டு இங்கே உரையாற்ற வந்துள்ளேன்.

நீங்கள் தினமும் நம் பள்ளி லோகோவில் காணும் "திட்டமிட்டு, உழைத்து, வெற்றி பெறு" என்பதுதான் இன்றைய தலைப்பு. 1992 ஆம் ஆண்டிலேயே நான் இதை எவ்வாறு தேர்ந்தெடுத்தேன் என்று பலர் என்னிடம் கேட்டனர். இந்த லோகோ எல்லோருக்கும் வெற்றியின் பாதையை கற்றுக் கொடுக்கும். பள்ளிகள் மட்டுமல்ல எந்த துறைக்கும் இதுவே வெற்றியின் மந்திரம். ஏற்கனவே நான் எழுதிய ஆசிரியர்களுக்கான புத்தகத்தில் இந்த மந்திரம் உருவான கதை பற்றி எழுதியுள்ளேன். அப்போதெல்லாம் நான் ரெட் ஹில்ஸ் ஏரி பகுதியில் நிறைய விவாதங்களை நடத்துவேன். பள்ளி நிறுவப்படுவதற்கு மூன்று மாதங்களுக்கு முன்பு நான் அங்கு தனியாக சென்றேன். தனித்துவமான ஊக்கமளிக்கும் ஒரு பிரத்தியேக லோகோவை என் பள்ளிக்கு வைக்க விரும்பினேன். அப்படித்தான் இது உருவானது.

முதல் பகுதி திட்டமிடுவது. திட்டமிடுதல் என்றால் நாளைய வேலைக்கு இன்று என்ன செய்ய வேண்டும் என்று தீர்மானிப்பது. இதனை எளிதாக புரிந்து கொள்ள, சுற்றுலாவுக்கு திட்டமிடுதலை எடுத்துக் கொள்ளலாம். பயணத்திற்கான டிக்கெட்டுகளை முன்பதிவு செய்வது, ஹோட்டல்களை புக் செய்வது, எந்த நாளில் எங்கே சுற்றிப் பார்ப்பது என்பதை திட்டமிடுவது ஆகியவை இதில் அடங்கும்.

அடுத்தது உழைப்பது. நான் கொஞ்சம் சோர்வாக உணரும்போதெல்லாம் மெரினா கடற்கரையில் இருக்கும் தொழிலாளர் சிலையை சென்று பார்ப்பேன். உழைத்தால் மலைகளைக் கூட நகர்த்த முடியும் என்று அது என்னிடம் கூறும். மக்கள் எளிதாக திட்டமிடுகிறார்கள், ஆனால் உழைப்பதுதான் மிகப்பெரிய பிரச்சனை. இதனால்தான் பல நிறுவனங்கள் சரிந்து வருகின்றன.

விடுமுறை நாட்களிலும் நாம் சிறிதளவு வேலை செய்ய வேண்டும். குறைந்தது அரை மணி நேரமாவது அகராதியை பார்ப்பது, கூகுளில் பயனுள்ள தகவல்களை தெரிந்து கொள்வது, பயனுள்ள youtube வீடியோக்களை பார்ப்பது, செய்தித்தாள்கள் படிப்பது என உழைக்கலாம். நண்பர்கள், மொபைல், சோம்பேறித்தனம் போன்ற பல கவன சிதறல்கள் இருந்தாலும் உழைப்பதை எப்போதும் நிறுத்தக்கூடாது.

2022 அக்டோபர் 2, என் பிறந்தநாளன்று என்ரிச் யுவர் இங்கிலீஷ் வீடியோக்களை துவங்கினேன். இன்று 173 வாரங்களை நிறைவு செய்துள்ளேன். இடையில் பல சிக்கல்கள் இருந்தாலும் சரியான நேரத்தில் வீடியோக்களை பதிவிடுகிறேன்.

அடுத்த பகுதி வெற்றி. நீங்கள் சரியாகத் திட்டமிட்டு, நன்றாக உழைத்தால் வெற்றி தானாகவே வரும். நீங்கள் வெற்றி அடையும் போது வாழ்க்கையை அனுபவிப்பதோடு,

விலங்குகளும் பறவைகளும் இதற்கு உதாரணம். எடுத்துக்காட்டாக, கோடையில் எறும்புகள் குளிர் காலத்திற்கான உணவை சேமிக்க திட்டமிடுகின்றன. பின்பு கடினமாக உழைத்து உணவை பாதுகாப்பான இடத்திற்கு நகர்த்துகின்றன. குளிர்காலம் வரும்போது ஏற்கனவே சேமித்து வைத்திருப்பதால் மகிழ்ச்சியுடன் வெற்றியை அனுபவிக்கின்றன.

என் வாழ்க்கையில் என்னை தொடர்ந்து ஊக்கப்படுத்தி வரும் ஒரு பெண்மணி செரினா வில்லியம்ஸ். அவர் அமெரிக்காவில் குற்றங்களுக்கு பேர் போன ஒரு நகரத்தில் பிறந்தார். தனது வாழ்க்கையில் இனவெறி மற்றும் கருப்பின பாகுபாடு போன்ற சவால்களை எதிர்கொண்டார். இருப்பினும் 23 கிராண்ட்ஸ்லாம் பட்டங்களையும், எட்டு முறை உலகின் நம்பர் ஒன் வீராங்கனை பட்டத்தையும் வென்றார்.

அவர் கருவில் இருக்கும் போதே அவரது தந்தை ரிச்சர்ட் வில்லியம்ஸ் தன் மகள் ஒரு டென்னிஸ் வீராங்கனை ஆக வேண்டும் என்பதற்காக 72 பக்க திட்டத்தை எழுதினார். சிறுவயதிலிருந்தே அவரிடம் தன் திட்டத்தை விவரித்தார். அதனைக் கேட்டு செரினாவும் கடினமாக உழைத்தார். 365 நாட்களும் அதிகாலை எழுந்து கடினமாக உழைத்தார். 2022 இல் அவர் ஓய்வு பெற்றபோது, "நான் ஓய்வு பெறவில்லை, ஆனால் என் வேலையை மாற்றிக் கொள்கிறேன்" என்று கூறி அனைவரையும் வியக்க வைத்தார். எல்லோரும், குறிப்பாக பெண் குழந்தைகள், செரினாவிடமிருந்து உத்வேகம் பெற வேண்டும். இப்போது தலைப்புக்கு வருகிறேன்.

திட்டமிட்டு, உழைத்து, வெற்றி பெறுங்கள்:
1. உங்கள் விருப்பங்களையும், இலக்குகளையும் தெளிவாகவும் உறுதியாகவும் திட்டமிட வேண்டும்.
2. சவால்கள் மற்றும் கவனச் சிதறல்களுக்கு மத்தியிலும் கடினமாக உழைக்க வேண்டும்.
3. வாழ்க்கையில் வெற்றி பெற்று, நீங்களும் மகிழ்ந்து, பிறருக்கும் உதவி செய்ய வேண்டும்.

உங்கள் சம்பாத்தியத்தில் 75% உங்கள் மகிழ்ச்சிக்காகவும், குறைந்தபட்சம் 25% தேவைப்படும் மக்களுக்கு உதவுவதற்காகவும் செலவிட வேண்டும். இது மனித குலத்திற்கு நீங்கள் செய்யும் சிறந்த சேவை. இப்போதைக்கு இவ்வளவு தான், தொடர்ந்து முன்னோக்கி செல்லுங்கள்.