Swimming-ហែម ថុនវិទីនី កំពុងត្រួសត្រាយផ្លូវទៅរកអាជីពក្នុងក្តីស្រមៃ-[ថ្មីៗ៣នាទី]-(ThmeyThmey)

ហែម ថុនវិទីនី កំពុងត្រួសត្រាយផ្លូវទៅរកអាជីពក្នុងក្តីស្រមៃ
-----
កញ្ញា ហែម ថុនវិទីនី បានប្រកាសបង្ហាត់ហែលទឹក ដល់សាធារណជន កាលពីដើមខែតុលា កន្លងទៅនេះ។ ទីតាំងបង្ហាត់ គឺនៅអាងទឹកស្តាតអូឡាំពិក រៀងរាល់ថ្ងៃសៅរ៍ និងថ្ងៃអាទិត្យ។

ការប្រកាសនេះ មានន័យថា កីឡាការិនីហែលទឹករូបនេះ កំពុងត្រួសត្រាយផ្លូវ ទៅរកអាពីជក្នុងក្តីស្រមៃរបស់នាង ដែលចង់ក្លាយទៅជាគ្រូបង្វឹកហែលទឹក បន្ទាប់ពីចូលនិវត្តន៍។ បើតាមកញ្ញា ហែម ថុនវិទីនី នាងគ្រោងចូលនិវត្តន៍ នាពេលឆាប់ៗខាងមុខ។

កញ្ញា ហែម ថុនវិទីនី បានបញ្ជាក់ប្រាប់សារព័ត៌មានថ្មីៗថា គ្រាន់តែនាងប្រកាសហ្វឹកហាត់ហែលទឹកនៅលើហ្វេសប៊ុកភ្លាម មានអ្នកចាប់អារម្មណ៍យ៉ាងច្រើន។ ការណ៍នេះ ធ្វើឲ្យនាងរឹតតែសប្បាយចិត្ត និងតាំងចិត្ត នឹងខំបង្ហាត់សិស្សឲ្យអស់ពីលទ្ធភាព។

កន្លងមក នាងក៏ធ្លាប់បង្ហាត់ហែលទឹក ដល់សិស្សប្រហែល១០នាក់រួចមកហើយដែរ ប៉ុន្តែក្រោយមកក៏បានផ្អាកវិញ ដោយសារតែមមានញឹក ហ្វឹកហាត់ខ្លួនឯង សម្រាប់ការប្រកួតក្នុងព្រឹត្តិការណ៍អូឡាំពិក ដែលទើបតែបញ្ចប់កាលពីពេលថ្មីៗនេះ។
កីឡាការិនីហែលទឹក ថែម ថុនវិទិនី ធ្លាប់ចូលរួមព្រឹត្តិការណ៍កីឡាអូឡាំពិក ៣ លើកមកហើយ។ លើកទី ១ នៅទីក្រុងប៉េកាំង ប្រទេសចិន លើកទី ២ នៅទីក្រុងឡុងដ៏ ប្រទេសអង់គ្លេស និងលើកទី ៣ នៅក្រុងរីយ៉ូ ប្រទេសប្រស៊ីល ប៉ុន្តែមិនទទួលបានមេដាយនោះទេ។

សម្រាប់ព័ត៌មានបន្ថែមជុំវិញការរៀនហែលទឹក ជាមួយកីឡាការិនីហែលទឹកស្រស់ស្អាតរូបនេះ សូមទាក់ទងទៅកាន់ទូរសព្ទលេខ ០៧៨ ៣៧៩ ០៣៧, ០៧៦ ៣៣៣ ៣៣ ៥០ ឬតាមរយៈហ្វេសប៊ុករបស់ វីទីនី ផ្ទាល់ ឬទៅជួបកីឡាការិនីរូបនេះនៅអាងទឹកស្តាតអូឡាំពិក៕