Su ballu de su mestieri - Tenore Funtanavona - Orgosolo - Sottotitoli

Su ballu de su mestieri
Tenore de Orgosolo Funtanavona

Ballamos a giru tundu
E chin totus intramos a mesu
Ora mai so avesu
A sas trampas de su mundu

No s’agatat unu sanu
In perunu mestieri
Chie furat chin sa manu
E chie chin su tinteri

Chie furat chin su metro
Chie su litru, chie su pesu
E chie chin su boette
dae curtzu e dae tesu

Endiolu o ventuleri
muradore, masellaiu,
pasticeri, turronaiu,
calzolaiu, butegheri

su pastore, su massaiu
ortulanu, bingiateri,
ora su salumieri
o pulidu rellozaiu

Si chircas un avocadu
L’asa a leare s’inzotu
e c’as a bessire cotu,
iscurtzu e ispozadu

No apas chin magistradu
Lites de apianare
Ca tando t’asa a abizare
Su c’at sa leze operadu

Profumadu barbieri,
O puzolente peddaiu,
O avaru droghieri,
Ignorante o literadu

Mastru ‘e linna, ferreri,
O bigotu sagrestanu ,
O parde carmelitanu,
O tristu carcerieri,

No s’agatat mestieri
Liberu, chena s’ingannu
Lea su mastru ‘e pannu
O lea su paneteri
O lea su banchieri
Cale cheres, operaiu,
Dotore o ingenieri
O cale si siat raju

Lea su politicante
Abile preicadore,
Imboligosu, elegante,
Creo su pius mazore

Deputau, senadore,
Cunsizeri, asesore ,
O prefetu o cuestore,
O umile portieri,

Presidente cancelleri,
Publicu procuradore,
O iscrivanu minore ,
O mannu tesorieri,

Barista o infermieri
O dutore ‘e ispidale
Guardia forestale
Sudorau contoneri

Pulizioto o avieri
Vigile, finanzieri
Cul’infustu marineri,
Pazosu carabineri

Bassu o altu graduadu
Chin sos gallones de oro
Han perdidu su decoro
Han su morale abbasciadu

Nat chi su sindacalista
Difendet su triballiante
Erricu in sa provista
At a domo sua abbondante

E como so pro finire
su ballu fatu pro giogu,
Pro gustu, pro disaogu,
Solu pro mi divertire

Ma prima de terminare
Comente bivet s’oreri
Lu cheria dimandare

Ballamos a girutundu
E totus intramos a mesu
Oramai so avesu
A sas trampas de su mundu