Скачать или смотреть திருவாசகம் - வாழாப்பத்து - பாரொடு விண்ணாய் பரந்த எம்பரனே - மாணிக்கவாசக சுவாமிகள்

08.028 திருவாசகம் | வாழாப்பத்து | பாரொடு விண்ணாய் | மாணிக்கவாசக சுவாமிகள் | ‪@ThiruneriyaThamizhosai‬

இறைவர் திருப்பெயர் : ஸ்ரீ ஆத்மநாதசுவாமி

இறைவியார் திருப்பெயர் : ஸ்ரீ யோகாம்பாள்

திருமுறை : எட்டாம் திருமுறை 028 வது திருப்பதிகம்

அருளிச்செய்தவர் : மாணிக்கவாசக சுவாமிகள்

பதிக குரலிசை : திரு மதுரை முத்துக்குமரன் ஓதுவார்

இறைவனைப் பிரிந்து வாழமாட்டாமையைத் தெரிவிக்கும் பத்துப் பாடல்களின் தொகுதி வாழாப் பத்து. இது திருப்பெருந்துறையில் அருளிச் செய்யப்பட்டது என்பதே பதிப்புக்களில் காணப்படுவது.

பாரொடு விண்ணாய் பரந்த எம்பரனே
பற்று நான் மற்றிலேன் கண்டாய்
சீரொடு பொலிவாய் சிவபுரத்து அரசே
திருப்பெருந்துறை உறை சிவனே
ஆரொடு நோகேன் ஆர்க்கு எடுத்து உரைக்கேன்
ஆண்ட நீ அருளிலையானால்
வார்கடல் உலகில் வாழ்கிலேன் கண்டாய்
வருக என்று அருள் புரியாயே. ..... (01)

வம்பனேன் தன்னை ஆண்ட மாமணியே
மற்று நான் பற்றிலேன் கண்டாய்
உம்பரும் அறியா ஒருவனே இருவர்க்கு
உணர்வு இறந்து உலகம் ஊடுருவும்
செம்பெருமானே சிவபுரத்து அரசே
திருப்பெருந்துறை உறை சிவனே
எம்பெருமானே என்னை ஆள்வானே
என்னை நீ கூவிக்கொண்டருளே. ..... (02)

பாடி மால் புகழும் பாதமே அல்லால்
பற்று நான் மற்றிலேன் கண்டாய்
தேடி நீ ஆண்டாய் சிவபுரத்து அரசே
திருப்பெருந்துறை உறை சிவனே
ஊடுவது உன்னோடு உவப்பதும் உன்னை
உணர்த்துவது உனக்கு எனக்கு உறுதி
வாடினேன் இங்கு வாழ்கிலேன் கண்டாய்
வருக என்று அருள்புரியாயே. ..... (03)

வல்லை வாள் அரக்கர் புரம் எரித்தானே
மற்று நான் பற்றிலேன் கண்டாய்
தில்லைவாழ் கூத்தா சிவபுரத்து அரசே
திருப்பெருந்துறை உறை சிவனே
எல்லை மூவுலகும் உருவி அன்று இருவர்
காணும் நாள் ஆதி ஈறு இன்மை
வல்லையாய் வளர்ந்தாய் வாழ்கிலேன் கண்டாய்
வருக என்று அருள்புரியாயே. ..... (04)

பண்ணினேர் மொழியாள் பங்க நீ அல்லால்
பற்று நான் மற்றிலேன் கண்டாய்
திண்ணமே ஆண்டாய் சிவபுரத்து அரசே
திருப்பெருந்துறை உறை சிவனே
எண்ணமே உடல் வாய் மூக்கொடு செவி கண்
என்று இவை நின்கணே வைத்து
மண்ணின்மேல் அடியேன் வாழ்கிலேன் கண்டாய்
வருக என்று அருள்புரியாயே. ..... (05)

பஞ்சின் மெல் அடியாள் பங்க நீ அல்லால்
பற்று நான் மற்றிலேன் கண்டாய்
செஞ்செவே ஆண்டாய் சிவபுரத்து அரசே
திருப்பெருந்துறை உறை சிவனே
அஞ்சினேன் நாயேன் ஆண்டு நீ அளித்த
அருளினை மருளினால் மறந்த
வஞ்சனேன் இங்கு வாழ்கிலேன் கண்டாய்
வருக என்று அருள்புரியாயே. ..... (06)

பரிதி வாழ் ஒளியாய் பாதமே அல்லால்
பற்று நான் மற்றிலேன் கண்டாய்
திருவுயர் கோலச் சிவபுரத்து அரசே
திருப்பெருந்துறை உறை சிவனே
கருணையே நோக்கிக் கசிந்து உளம் உருகிக்
கலந்து நான் வாழுமாறு அறியா
மருளனேன் உலகில் வாழ்கிலேன் கண்டாய்
வருக என்று அருள்புரியாயே. ..... (07)

பந்தணை விரலாள் பங்க நீ அல்லால்
பற்று நான் மற்றிலேன் கண்டாய்
செந்தழல் போல்வாய் சிவபுரத்து அரசே
திருப்பெருந்துறை உறை சிவனே
அந்தமில் அமுதே அரும்பெரும் பொருளே
ஆரமுதே அடியேனை
வந்துய ஆண்டாய் வாழ்கிலேன் கண்டாய்
வருக என்று அருள்புரியாயே. ..... (08)

பாவ நாசா உன் பாதமே அல்லால்
பற்று நான் மற்றிலேன் கண்டாய்
தேவர் தம் தேவே சிவபுரத்து அரசே
திருப்பெருந்துறை உறை சிவனே
மூவுலகு உருவ இருவர் கீழ் மேலாய்
முழங்கு அழலாய் நிமிர்ந்தானே
மாவுரியானே வாழ்கிலேன் கண்டாய்
வருக என்று அருள்புரியாயே. ..... (09)

பழுதில் தொல் புகழாள் பங்க நீ அல்லால்
பற்று நான் மற்றிலேன் கண்டாய்
செழுமதி அணிந்தாய் சிவபுரத்து அரசே
திருப்பெருந்துறை உறை சிவனே
தொழுவனோ பிறரை துதிப்பனோ எனக்கோர்
துணையென நினைவனோ சொல்லாய்
மழ விடையானே வாழ்கிலேன் கண்டாய்
வருக என்று அருள்புரியாயே. ..... (10)

குறிப்பு : இப்பதிகத்திற்கான சொற்பிரிவு எங்களது முயற்சியில் உருவாக்கப்பட்டுள்ளது. பிழை இருப்பின் எங்களுக்கு தெரியப்படுத்தலாம்.

"மேன்மைகொள் சைவநீதி விளங்குக உலகம் எல்லாம்"