Скачать или смотреть មេដឹកនាំចលនាប្រឆាំង លោក សម សេរី ប្រកាសរំលាយរដ្ឋាភិបាលនិរទេស

លោក សម សេរី នៅថ្ងៃ​ទី​៥ ខែ​មេសា ឆ្នាំ​២០២៥​ បាន​ប្រកាស​រំលាយ​ចោល​នូវ​«រណសិរ្យ​រំដោះជាតិ​ខ្មែរ ​និង​រដ្ឋា​ភិបាល​ជាតិ​ខ្មែរ​និរទេស»​ ដែល​លោក​ជា​ប្រធាន ​និង​សុំ​ការ​លើក​លែង​ទោស​ពី ​លោក ហ៊ុន សែន និង​លោកនាយក​រដ្ឋមន្ត្រី​ ហ៊ុន ម៉ាណែត​។​ ការ​ប្រកាស​រំលាយ​ចោល ​ចលនា​ប្រ​ឆាំង​នៅ​ក្រៅ​ប្រទេស​នេះ​ត្រូវ​បាន​ លោក សម សេរី អះអាង​ថា ​ធ្វើ​ឡើង​ក្នុង«​ស្មារតី​រួម​សាមគ្គី​ការពារ​សន្តិភាព»។
កាលពីឆ្នាំ២០១៨ លោក សម សេរី ក៏ធ្លាប់បានប្រកាសម្តងហើយថា ប្រសិន​បើ​រដ្ឋាភិបាលកម្ពុជា​យល់​ព្រម​តាម​លក្ខខណ្ឌ​មួយ​ចំនួនដែលលោក​ស្នើ​ឲ្យ​មាន​ការលើកលែង​ទោស និង​បើក​ផ្លូវ​ឲ្យ​លោក​បង្កើត​គណបក្ស​នយោបាយ​ថ្មី​មួយ ​ដើម្បី​ប្រកួត​ប្រជែង​គ្នា ​តាម​បែប​ប្រជាធិបតេយ្យ នោះលោកនឹង​ផ្អាក​សកម្មភាព​រណសិរ្ស​របស់​លោក និង​វិល​ចូលកម្ពុជា​វិញ។

សូមបញ្ជាក់ថា លោក សម សេរី ត្រូវ​បាន​តុលាការ​កម្ពុជា​ កាត់ទោសដោយ​កំបាំង​មុខ​ដាក់​ពន្ធនាគារ​ចំនួន​៩​ឆ្នាំ​ពី​បទ​ភេរវកម្ម​ កាលពី​ឆ្នាំ​២០១៣ តែ​លោកបានរត់ភៀសខ្លួន​ទៅក្រៅប្រទេស។ អាជ្ញាធរ​ថៃ​ កាលពី​ថ្ងៃ​ទី​២៥ មេ​សា ឆ្នាំ​២០១៨ ក៏បាន​ឃាត់ខ្លួន​ប្រធាន​ចលនា​រណសិរ្ស​រំដោះជាតិ​ខ្មែរូបនេះ ​ក្រោយ​ពី​ប្រមុខរដ្ឋាភិបាល​កម្ពុជា ​បាន​ចោទប្រកាន់ ​លោក សម សេរី ថាមានបំណង​ដាក់​គ្រាប់បែក​បំផ្ទុះ​នៅ​ម្ដុំ​វត្ត​ភ្នំ និង​ក្នុង​ខេត្តសៀមរាប​ កាលពី​អំឡុង​ពេល​ប្រារព្ធ​ពិធី​បុណ្យចូលឆ្នាំ​ខ្មែរ​ឆ្នាំ​២០១៨។ ​

លោក ប៉ាង សុខខឿន សកម្មជនគណបក្សប្រឆាំង​នៅក្រៅ​ប្រទេស ​បាន​បរិហារថា សម សេរី មិនមែនជាឈ្មោះ ពិតទេ។ ឈ្មោះពិតរបស់​បុគ្គលរូបនេះគឺ យឿន យៀប។ ការ​ដែល​គេ​ប្រើ​ឈ្មោះ សម សេរី គឺដើម្បី​ឲ្យ​ស្រដៀងគ្នានឹងឈ្មោះ សម សារី ​ដែលជាឳពុករបស់​លោក សម រង្ស៊ី ដើម្បីអូសទាញ​អ្នកគាំទ្រ។

អត្តបទដោយ៖ អ៊ឹង ប៊ុនថន
Credit: RFI https://www.rfi.fr/km/