Скачать или смотреть MBUNGE COSMAS BULALA ADHAMILIA KUINUA SEKTA YA KILIMO JIMBO LA KWIMBA

Mbunge wa Jimbo la Kwimba, Cosmas Bulala, anatarajiwa kuzindua rasmi programu ya kuinua kilimo iitwayo Ekari ya Mbunge ifikapo Machi 4, 2026, yenye lengo la kuongeza tija na kuboresha uzalishaji kwa wakulima ambao ni asilimia 99 ya wananchi wa jimbo hilo na kuwainua wananchi kiuchumi.

Akizungumzia mpango huo, Mbunge Bulala amesema wakulima wengi wamekuwa wakitumia jembe la mkono, kutotumia mbegu bora na kutofuata ushauri wa kitaalamu, jambo linalosababisha mavuno hafifu na malalamiko ya bei.

Amesema kupitia programu hiyo, anataka kubadilisha mfumo wa kilimo kwa kuwajengea uwezo wakulima ili waweze kupata tija kubwa zaidi.

“Mtu anayevuna gunia moja kwenye eka moja na anayevuna gunia tano, huyu wa gunia tano hawezi kulalamikia bei. Lakini anayevuna gunia moja analalamikia bei. Hivyo nataka tuwasaidie wakulima wetu,” amesema.

Bulala amesema Jimbo la Kwimba lina kaya 46,000 na lengo ni kila kaya kushiriki katika programu hiyo.
Trekta Moja Kila Kata
Kupitia mpango huo, kila Kata itapewa trekta moja lenye thamani ya shilingi milioni 70. Kwa Kata 15 za Jimbo la Kwimba, jumla ya matrekta 15 yanatarajiwa kukabidhiwa kwa vikundi vya wakulima ambavyo tayari vimeshasajiliwa na Halmashauri.

Pia, kila Kata itakuwa na kijana mmoja aliyesomea kilimo ambaye:
Atahudumiwa na Ofisi ya Mbunge, Atapewa pikipiki,
Atapewa kifaa cha kupima afya ya udongo, Atasimamia mashamba na kutoa elimu ya kilimo bora kwa wakulima, kwa kushirikiana na maafisa kilimo wa maeneo husika.

Bulala amesema kila kaya itapatiwa mbegu bora za kulima ekari moja ili kuongeza uzalishaji na kipato cha kaya pamoja na kuchochea uchumi wa Halmashauri ya Kwimba.

Ameongeza kuwa programu hiyo inalenga kuongeza tija ya uzalishaji kwa kufuata taratibu za kitaalamu za ugani na kuwezesha wananchi kuondokana na umaskini.