الحلقة (20) خاطرين 2023 حسن مناع - صفاء سعد

💚خاطرين🌴 نجع 𝟐𝟎𝟐𝟑

اليوم خاطرين علي
اللي ما حكمهم بي

خطرن علي نواجـع
في بر سايل راجــع
وحراث خط مراجع
كيف مــا نبي ويبي

خطرن علي بيوت
أولاد العمـــام وخوت
عقاد كوت قارن كوت
مدعــك قوي لـ قـوي

خطرت عليـــا نـــــاره
بيت عــز كيف القاره
فيه زاخــرة وفنــاره
(وزمزم) و (بنت البي)

خاطر علي أزفـــافــــة
وخماستة ورفــــافــــه
عليه بارمة شـــــــرافة
من قبل يضوي الضي

خطــرن علي صوايب
وبازين لحمة طـــايب
وَمدثـــر الدر الرايـــب
وغناوي وصوت أرحي

خـاطر علي أمسـده
كحيل الميامي مده
فرس تختبل بالعده
عليها كلام ( عـــلي)

خطـــــرن علي خلله
وبناويت كيف الغزله
فـاقدات حسه وظله
الميــــــت يبنــه حي

خطروا علي آكـــابر
وجابر معاضد جابر
خلن دموع الصابر
منهـــار عزمه أشوي

اللي كــــاينين ونسنا
اللي مروقين نفسنــا
اللي فراقهم بحوسنـا
غــدرهم الحظ السئ

خطر بيت بيت زعــامة
فيه صقر سافي أكمامة
وكـــــوت يدقل قدامة
وقـــــولت الحس أرقي

خــــــاطر علي سبيبــه
وطلة زعيــــــم وهيبـه
ما عـــــاد مرأة بتجيبه
ولا هو بروحــــــه يجي

خطرت علي مــــواكب
جحـــافل مسير وراكب
مــواكب تقول كـواكب
عــــــربي مع (أفريقي)

خطـــروا علي جيـــران
ونجــــــوع في الوديان
اوطن منبتة مثــــــنان
فيـــه فـــــاغنر روسي

خطروا عليا أرجــــــال
وجــــــوه نايره وأفعال
نازلين ( بن همـــــال )
طــــــاويين جوفي طي

اليوم خاطرين أعزازي
اللي معكـرين مـزاجي
قـــــابض الروح يوازي
نقىٰ النقي النقي

اليوم خاطرين أجوادي
العــــــامر بهم ميعادي
علي خـــاطرين أولادي
مخلفين فــــــــاهق في

خطٰــــــروا اللي يتنابوا
نهــــار الجحيم أصابوا
عطـوك الأرواح وذابوا
بعدهـــم الصدر أخلي

اللي يملكـــــوا الإرادة
اللي فــارضين سيادة
اليوم وين هو و أولادة
هكي الزمـٰـــــٌـــان يبي
ظلمهم الوضع السئ


اليوم خــاطرين ونسنا
اللي غيابهم بحـــوسنا
بعدهم الوقت عكسنا
كسر ظهـــــــرنا وثوي

اللي نجعهم مســــاطر
اللي يكرموا في الخاطر
اليوم يشربوا فـ القاطر
ومعمـــــــــــرين الحي