SURAT WASIAT LENGAN MAKEM PAHLAWAN (Puisi Base Sasak)

SURAT WASIAT LENGAN MAKEM PAHLAWAN
H. Amrullah

Tyang sempitang pelinggihde surat niki lengan sinar bulan
si kecendong ketelep lek selak urep
tengak kelem tanggal empat olas bulan merdeke
jari pekilingde andangin keras dunie

Ngembe ceritende anak jari bai balokku Suku Sasak
mudahan Allahtaale icanin pelinggihe pade cukup aik kayuk
limpah beras moto tejaokang lengan segale ale
idup bahagie sentose lek gumi Nusantare

Anak jari bai balokku
Lengan jelo merdeke wah apusku segale kaste peninggalan Bali-Belande
ilang kaule ndarak perwangse sekabeh warge berhak pade
bekadu hukum beli bangket lek Tetebatu sai ceket ye ngepe giliran jari datu

Laguk jaman sine Gumi Sasak
ndekne nuntut side pade sret kris kelewang andangin Belande Jepang
engak sino laekne selese kami bayar ngadu bebek rebang loloan belek rambas gawah jariang bangket lendang ngayah betaunan loangang rerejeng tegeng jariang gue tanjung ringgit
Oah laekne lunas ngadu darak nat aik mate tolang betis
tolang otak si begelanyat bilang kuburan.

Angkan pade hargein gamak pengobananku
Munde lumbar besekolah ndak pongah adokang pagah wade batur lemah
Ape kaling betejakan tawuran si cume bani keroyokan marak sifat pecundang
munde tulen mame beridap hebat conto jiwe kesatrie papuk balokde
sik pamerang uat dade beladukan belanjakan l
ek atas ring sik beraturan keruan
ndak endah nyobaang benarkobe pegawean laknat si wajib minak idup sengsare
atao berajah bebotoh perasak menang tadah
sengak idupde pasti genne lotoh mate kalah

munde jari peserte lombe juri aning serah masalah juare
sengak ndarak dengan mele ujan-ujanang sie
munde jari juri persik mate ate ndarak beketoan sai tie
sengak genne jari sumber bahle
si bejorong aning nerake munde jari ape juak erak
ndak melence turut sifat lombok buak

pacu gamak pade berajah adin tetu merang tumbak sibelekne selampak ime jari senjatende regem dunie
menge ngibing turutang gending adinde bau jari datu betekenan laku
ndak lengah ndak pasrah jari dengan bodo sengak dengan lengah
pastine jari penyampah dengan bodo pastine jari impan tau ririh
ndak sandak base krame adat budaye sengak lek dalemne tetolok makne idup berakhlak mulie

Anak jari bai balokku,
Erak munde benasip jari datu pedasang gati poton pulpende
amanah merentah ndak keang gayen penjajah periri gumi paer sine
ngadu selah solah agenne ndarak kesah nyah-nyahanku kelemes lapah.
apik penguit poton tijok ilangin zalim bereronjok
si gen bekemalik aning irup anak jari bai balok
ntik det tetunjang besampleng emasde agende ndek lekak ngangas bedenggekan singkirin swinih bedeng bareng
bedore ganggam begaye meteng

Mun dateng bulan merdeke silak pasang bendere lek julun jebak gedengde
geger girang milu lombe jari tandokde nasionalis bejiwe besyukur
tunah kangen Gumi Paer subur peninggalan papuk balokde si mashur.
Merdeke!