Президент Шавкат Мирзиёев Самарқанд шаҳрига ташриф буюрди

Президент Шавкат Мирзиёев Самарқанд шаҳрига келди ва халқаро аэропортда яратилаётган шароитларни кўздан кечирди.
Аэропорт қарийб 83 миллион долларлик лойиҳа эвазига янгидан қурилмоқда. Ўтган йили учиш-қўниш йўлаги қайта қурилган эди. Бугунги кунда янги терминал тўлиқ тикланиб, унда пардозлаш ишлари олиб борилмоқда.
Бир соатда 800 нафар йўловчига хизмат кўрсатиш қувватига эга бўладиган терминални келгуси ойда фойдаланишга топшириш режалаштирилган.
Президент Шавкат Мирзиёев буюк муҳаддис Имом Бухорий қабрини зиёрат қилди. Қуръон тиловат қилинди.
Мажмуа қурилиши кўздан кечирилди. Бу ерда қарийб 10 минг намозхонга мўлжалланган масжид, тўртта минора, айвонлар барпо этилмоқда. Шу ерда галдаги қурилиш ишлари ҳақида маълумот берилди.
Давлатимиз раҳбари Ҳазрати Ҳизр мажмуасидаги Биринчи Президентимиз Ислом Каримов мақбарасини ҳам зиёрат қилди.
Давлатимиз раҳбари Самарқанд шаҳрининг Бўстонсарой ва Рудакий кўчалари кесишмасида қурилган туннелни бориб кўрди.
Туннел қурилиши натижасида транспорт ҳаракатига қулайлик ошиб, тирбандлик бартараф бўлди. Унинг узунлиги 120, кенглиги қарийб 27 метр.
Шавкат Мирзиёев мазкур туннел яқинида, Бўстонсарой кўчасида қурилган галерея услубидаги кўприкни ҳам кўздан кечирди.
Самарқандда йўл инфратузилмасини яхшилаш бўйича келгуси режалар ҳақида маълумот берилди.