佘詩曼童年貪靚忍痛穿耳窿 自爆拖林峯歌單一個月原因

佘詩曼童年貪靚忍痛穿耳窿 自爆拖林峯歌單一個月原因

佘詩曼以露肩黑白色長裙同陳坤一齊現身一個首飾活動，作為「三料視后」嘅阿佘喺台上舉手投足都會散發一份女性自信美，佢喺台上講到自己細個時已經好貪靚，五、六歲已經要求媽咪俾佢釘耳窿。阿佘就話，當時睇到媽咪臨出門口前成日戴耳環，所以自己都會好好奇，但自己想戴嘅時候先發現點解戴唔入，先知自己冇耳窿。就算媽咪提醒講過會好痛，阿佘結果都係要打，結果再痛都要死忍住。

至於講到最鍾情邊款首飾，阿佘就話係戒指喇！阿佘就話自己只要唔戴戒指就會周身唔聚財，更試過因為唔記得戴戒指，而喺機場即場買咗隻。

早前阿佘擔任林峯演唱會嘉賓，阿佘就話事前足足驚咗成個月，又自爆自己唔想唱獨唱，所以交歌單呢件事足足拖咗一個月先交上去。但講到阿峯出年開紅館演唱會，有冇可能再做嘉賓，阿佘立刻扭曬頭，笑言：「我會去睇。」再講到有冇可能搞音樂會同出新歌，阿佘表示：「搞音樂會要留返下一世。至於出新歌就可能要等到出道五十周年喇！」

曾經同阿佘主演古裝劇《延禧攻略》嘅內地女演員吳謹言日前突然宣布婚訊，消息一出震撼唔少人。阿佘就話完全唔驚訝，亦為對方感到開心，睇到官宣後又有第一時間送上祝福。雖然一直感覺到二人好friend，但幾時拍拖就唔清楚喇！

#佘詩曼 #延禧攻略 #林峯 #音樂會 #演唱會 #吳謹言 #陳坤 #戒指 #視后 #首飾 #新歌 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0