Скачать или смотреть ‘अफरोज देवान बचाऊ अभियान’ मार्फत सहयोगको अपिल, गम्भीर बिरामीको उपचारमा आर्थिक संकट - GRAMIN TV

पर्सा । सखुवा प्रसौनी गाउँपालिका–२, श्रीपुर पञ्चगावाँ बजारका ३४ वर्षीय अफरोज देवान विगत केही समयदेखि गम्भीर स्वास्थ्य समस्यासँग जुधिरहेका छन्। आर्थिक अवस्था कमजोर भएका कारण उनको थप उपचारमा समस्या भएको परिवारले जनाएको छ।

२०६९ सालमा फोक्सोमा घाउ देखिएपछि उनको पहिलो शल्यक्रिया गरिएको थियो। त्यसपछि स्वास्थ्यमा सुधार आएपछि उनी दिल्लीमा सिलाइ–कटाइको काम गर्दै परिवार पालिरहेका थिए। तर २०८२ साल साउनमा पेटमा फलामको टुक्रा (फट्ठी) ठोकिएर घाउ भएपछि समस्या पुनः बल्झिएको हो। काठमाडौंस्थित वीर अस्पतालमा अप्रेसन गरी उक्त फलामको टुक्रा निकालिए पनि हाल फोक्सोमा पानी जमेकाले अवस्था जटिल बनेको चिकित्सकले बताएका छन्। पुनः अप्रेसन गर्न करिब ३ लाख रुपैयाँ खर्च लाग्ने अनुमान गरिएको छ।

उनको पारिवारिक अवस्था अत्यन्तै नाजुक रहेको बताइएको छ। बुबा नभएका अफरोजको परिवारमा वृद्ध आमा, श्रीमती, एक छोरा र एक छोरी छन्। स्थानीय राधेश्याम रामका अनुसार उनीहरूको घर फुसको कच्ची छाप्रो मात्र रहेको छ र कमाउने मुख्य व्यक्ति नै बिरामी परेपछि परिवारलाई दैनिक गुजारा चलाउन समेत कठिन भएको छ।

हाल अफरोज पैसाको अभावमा घरमै उपचारविहीन अवस्थामा छन्। ‘अफरोज देवान बचाऊ अभियान’ अन्तर्गत उनको जीवन रक्षाका लागि देश–विदेशमा रहेका मनकारीहरूलाई सहयोग गर्न परिवारले अपिल गरेको छ। सहयोग गर्न चाहनेले अफरोज देवानलाई ९८०७१३३१२५ नम्बरमा सम्पर्क गर्न वा सोही नम्बरमार्फत ई–सेवा (eSewa) पठाउन सक्ने परिवारले जनाएको छ।

परिवारले सानो सहयोगले एक युवाको ज्यान जोगिन सक्ने भन्दै सबैसँग मानवीय सहयोगको आग्रह गरेको छ।