លោក រៀម មុនីស៊ីឡុម ច្នៃកាកសំណល់ផ្ទះបាយជារូបសិល្បៈប្រាប់សារឱ្យយុវជនស្គាល់ពីតម្លៃសំរាម

លោក រៀម មុនីស៊ីឡុម ច្នៃកាកសំណល់ផ្ទះបាយជារូបសិល្បៈប្រាប់សារឱ្យយុវជនស្គាល់ពីតម្លៃសំរាម

សៀមរាប៖ លោក រៀម មុនីស៊ីឡុម ជាវិចិត្រករមួយដែលបានច្នៃសំរាម ឬកាកសំណល់ផ្ទះបាយជារូបសិល្បៈ។ សំរាមដែលលោកច្នៃនោះ មានដូចជាថង់ប្លាស្ទីក សំរាមសរីរាង្គ ស្រកាត្រី សំបកខ្យងខ្ចៅជាដើម។ តាមការលើកឡើងរបស់លោក ស៊ីឡុម កាកសំណល់ផ្ទះបាយប្រមាណ ៨០ភាគរយ ដែលអាចច្នៃជារូបសិល្បៈបាន ប៉ុន្តែគំនូរនេះ ទាមទារឱ្យមានការអត់ធ្មត់ និងប្រើពេលយូរបន្ដិចទើបអាចធ្វើរូបមួយៗបាន។ សារសំខាន់ដែលលោកបង្កប់ក្នុងគំនូរទាំងនេះ គឺលោកចង់ប្រាប់ឱ្យយុវជនស្គាល់ពីតម្លៃសំរាម និងការកាត់បន្ថយការប្រើប្រាស់ប្លាស្ទីកដែលវាបាននិងកំពុងបំពុលបរិយាកាស និងភពផែនដីយ៉ាងខ្លាំងក្លា។
លោក រៀម មុនីស៊ីឡុម ចាប់ផ្តើមច្នៃកាកសំណល់ផ្ទះបាយ ឬសំរាម ជារូបសិល្បៈផ្សេងៗ នៅអំឡុងឆ្នាំ២០០៩។ លោករម្លឹកថា អ្វីដែលធ្វើឱ្យលោកកើតគំនិតកែច្នៃនេះឡើង ដោយសារលោកធ្លាប់ពុលសំរាម។ លោក ស៊ីឡុម មានអាការៈឈឺក្បាលជាខ្លាំងពេលដែលគ្រួសារលោកបានដុតសំរាមនៅមុខផ្ទះ តែលោកមិនទាន់ដឹងថាអាការៈនោះបណ្តាលមកពីអ្វីឡើយ។ លើកទី២ រំលងមួយសប្ដាហ៍ក្រោយម្ដង ក៏មានការដុតសំរាមមុខផ្ទះជាថ្មី ម្ដងនេះធ្វើឱ្យលោកមានបញ្ហាពងបែកលើស្បែក ទើបលោកសន្មត់ថា លោកបានពុលសំរាម។
ដូច្នេះដើម្បីបញ្ជៀសបញ្ហានេះជាថ្មី ក៏ដូចជាកាត់បន្ថយការបំពុលបរិស្ថានតទៅទៀត លោកបានចាប់ផ្តើមច្នៃសំរាមជារូបសិល្បៈ។ យ៉ាងណា លោកធ្លាប់បោះបង់វាម្ដងកាលពីឆ្នាំ ២០១៣ នៅពេលដែលរូបសិល្បៈទាំងនេះមិនសូវមានអ្នកគាំទ្រ។ សំណល់ផ្ទះបាយ ដែលលោកយកមកច្នៃរួមមាន ស្រកាត្រី សំបកខ្យងខ្ចៅ សំរាមសរីរាង្គ ស្លឹកឈើ ថង់ប្លាស្ទីក សំបកដបទឹកសុទ្ធ។ល។ ការសម្អាតវត្ថុទាំងនេះ ត្រូវប្រើពេលយូរ និងទម្រាំបានរូបមួយៗ លោក ស៊ីឡុម ប្រើពេលចាប់ពី១សប្ដាហ៍ ទៅ២ ឬ៣ខែក៏មាន តាមទំហំរូប។
រូបសិល្បៈដែលលោក ស៊ីឡុម ធ្លាប់ធ្វើ និងលក់មានតម្លៃចាប់ពី១០ដុល្លារ រហូតដល់ជាង ២ពាន់ដុល្លារក៏មាន។ ហើយភាគច្រើនភ្ញៀវដែលគាំទ្រស្នាដៃនេះ គឺអឺរ៉ុប តែបច្ចុប្បន្ន ទីផ្សារគំនូរនេះមានការគាំទ្រទាំងអឺរ៉ុប និងអាស៊ីមួយចំនួនផងដែរ។
សម្រាប់លោក ស៊ីឡុម សំណល់ផ្ទះបាយពី៧០ ទៅ៨០ភាគរយ ដែលអាចយកមកកែច្នៃបានជាវត្ថុមានប្រយោជន៍បាន។ សារសំខាន់សម្រាប់ការកែច្នៃរបស់លោក គឺចង់ឱ្យពលរដ្ឋស្គាល់ពីសារប្រយោជន៍របស់សំរាម ពិសេស គឺកាត់បន្ថយការប្រើប្រាស់ប្លាស្ទីក ដែលជាមូលហេតុមួយបំផ្លាញស្រទាប់ផែនដី និងបំពុលបរិយាកាល។
ដើម្បីទទួលបានព័ត៌មានទាក់ទងនឹងវិស័យកសិកម្ម, ផលិតផលអត្តសញ្ញាណ, ជំនួញខ្នាតតូច និងមធ្យម, បរិស្ថាន និងទេសចរណ៍ សូមចុច Download App «ថ្មីៗ២៥ រាជធានី-ខេត្ត» សម្រាប់ប្រព័ន្ធ iOS: https://apple.co/2ub9pdj និង Android: http://bit.ly/2KSe1MB ។ ការផ្សព្វផ្សាយព័ត៌មានទាំងនេះ ក៏មាននៅលើទំព័រហ្វេសប៊ុក Thmey Thmey 25 និង YouTube Channel: https://goo.gl/D6xQBv ៕
#ThmeyThmey25
--------------------------------------------------------------------
ThmeyThmey News Social Media:

https://thmeythmey.com/
  / thmeythmey  
  / thmeythmeyvideonews  
  / thmeythmeynews  
  / thmeythmey