Скачать или смотреть ហេតុផលដែលអ្នកត្រូវបាត់បង់ក្តីស្រមៃខ្លួនឯង

ធ្លាប់ទេ មិនទាន់ចាប់ផ្តើមតែគិតថាខ្លួនឯងបរាជ័យទៅហើយ? ធ្លាប់ទេមិនទាន់មានសកម្មភាព តែចាប់ផ្តើមបាក់កម្លាំង? ធ្លាប់ទេមិនទាន់សាកល្បង តែព្រមចុះចាញ់ទៅហើយ? មានហេតុផលច្រើនណាស់ដែលអ្នកមានអារម្មណ៍បែបនេះ ប៉ុន្តែហតុផលធំៗចំនួន២ ប្រហែលជាចំនុចធំបំផុតនៃដើមចមបញ្ហាទាំងនេះ។

ទី១ គឺអ្នកមិនច្បាស់លាស់នៅឡើយ ។ អ្វីដែលចង់ធ្វើមិនមែនជាបេះដូងរបស់អ្នក។ អ្នកគ្រាន់តែធ្វើតាមអណ្តាតដែលអ្នកគ្រលាស់ពាក្យថាចង់ រួចអ្នកក៏យល់ថា នេះជាអ្វីដែលបេះដូងអ្នកត្រូវការ។ អ្នកត្រូវតែសួរបេះដូងខ្លួនឯងថា តើអ្វីជារបស់ដែលអ្នកត្រូវការ និងអាចរីកចម្រើនជាមួយបាន? ខ្ញុំអាចប្រាប់អ្នកបាន អ្វីដែលបានដោយចង់ភាគច្រើនគឺបានមកពីភ្នែករបស់អ្នកមើលអ្នកដទៃ ឬប្រើឆន្ទះអ្នកដទៃយកមក បណ្តុះលើខ្លួនអ្នក តែមិនបានគិតថា អ្នកត្រូវការអ្វីនោះឡើយ។ ខ្ញុំអាចប្រាប់អ្នកបានថា ជនជាតិអាស៊ីភាគច្រើនគេទុកបាយជាអាហារចំបង ប៉ុន្តែជនជាតិអឺរ៉ុប គេទុកនុំប៉័ងសំខាន់ទៅវិញ។ រឿងរ៉ាវជីវិត វាខុសពីអាហារ តែវាត្រូវតែជាអ្វីដែលសាកសមសម្រាប់អ្នកបំផុត។

ចំនែកហេតុផលទី២ គឺអ្នកមិនទាន់មានភាពរឹងមាំនៃផ្លូវចិត្ត ។ អ្នកប្រហែលមិនមានជំនាញគ្រប់គ្រាន់ ឬមានចំនេះដឹងតិចតួចលើអ្វីដែលចង់ធ្វើ។ វាអាចសាកសមនិងអ្នក តែអ្នកនៅរារែក ក៏មិនដឹងគួរចាប់ផ្តើមស្រវេស្រវា រកជំនួយភ្លាមៗ។ អ្នកក៏បណ្តោយអោយពាក្យថាខ្លាចមកគ្របដណ្តប់លើអ្នករហូតមានគំនិតបោះបង់វាចោលតែម្តង។ នៅពេលដែលអ្នកមានចំនេះជំនាញតិច លើអ្វីដែលអ្នកចង់ធ្វើ សម្តីអ្នកដទៃ និងអាចទៅជាយាន ទាញអ្នកទៅតាមគេ ទោះសម្តីទាំងនោះនាំអ្នកទៅដល់ណា ទៅជួបរឿងបែបណាក៏ដោយ។ អ្នកត្រូវបាត់បង់អ្វីជាអ្នក អ្នកត្រូវដើរតាមបេះដូងអ្នកដទៃ អ្នកត្រូវបាត់បង់អ្វីដែលអ្នកត្រូវការ និងសាកសមជាមួយខ្លួនឯងបំផុតទៅវិញ។

កាលពីក្មេងខ្ញុំធ្លាប់ត្រូវអោយសម្តីមនុស្សធំមួយចំនួនបំបាក់ការខំប្រឹងរបស់ខ្ញុំ។ ពួកគេនិយាយថា គណិតវិទ្យាពិបាករៀនណាស់ ឬមួយពួកគេថា រៀនយ៉ាងណាក៏មិនចេះដែរ។ ខ្ញុំមិនបដិសេធន៍ពីអ្វីដែលពួកគាត់និយាយនោះទេ ប៉ុន្តែវាគ្រាន់តែបង្ហាញថា ពួកគេមិនមានភាពរឹងមាំ មិនមានការខំប្រឹង មិនមានឆន្ទះក្នុងការចង់ចេះនោះឡើយ។ ពួកគេបណ្តោយអោយពាក្យមិនចេះ មកគ្របដណ្តប់ រួចពួកគេក៏លែងរៀនមុខវិជ្ជាគណិតនេះតែម្តង ហើយយូទៅវាក៏ក្លាយទៅជាវប្បធម៌ដ៏អាក្រក់ទៅវិញ ។ ពួកគេមិនដែលសួរខ្លួនគេ ហេតុអ្វីរៀនមិនចេះទេ មិនដែលរកមើលថាមានវិធីណាដើម្បីរៀនអោយចេះឡើយ។

ជីវិតវានិងសាកល្បងអ្នកគ្រប់វិធី វាអាចនិងដាល់អ្នក ឬទាត់អ្នករហូតសោះខ្យល់ ។ តែហេតុផលតែម្យ៉ាងគឺអ្នកត្រូវតែជាអ្នក ហើយប្រើថាមពលអ្នក ដើម្បីច្បាំងសម្រាប់ពន្លឺនៃជីវិត។ អ្នកត្រូវតែនឹងនរ និងអំនត់បំផុត។ អ្នកត្រូវតែយល់ពីខ្លួនឯង ថាអ្វីជាសេចក្តីត្រូវការ ហើយអ្វីជាផ្លូវដែលអ្នកដើរទៅមិនមានពាក្យស្តាយក្រោយ។