ВИЛОЯТИ ХАТЛОН БОРИ АВВАЛ ДАР 10 СОЛИ ОХИР НАҚШАИ АСКАРҶАМЪКУНИРО ИҶРО КАРД

Вилояти Хатлон рӯзи 14 майи соли 2024 нақшаи даъвати баҳорӣ ба хидмати ҳатмии ҳарбӣ дар саффи Қувваҳои мусаллаҳи Тоҷикистонро пурра ва пеш аз муҳлат буд кард. Дар ин бора хадамоти матбуоти раиси вилоят хабар дод. Дар иттилоия таъкид шудааст, ки дар 10 соли охир ин бори аввал аст, ки нақшаи даъват дар ин бузургтарин вилояти Тоҷикистон пеш аз муҳлат иҷро мешавад.
Хадамоти матбуоти раиси вилояти Хатлон гуфт, 4 ноҳияи Вахш, Фархор, Муъминобод ва Хуросон алакай дар рӯзи аввали даъвати баҳорӣ, яъне 1 апрел аз ҷамъбасти ин маърака гузориш доданд.
Дар давоми моҳи апрел ва то 14 май маъракаи даъват ба саффи Қувваҳои мусаллаҳ дар боқӣ 21 шаҳру ноҳияи дигари вилояти Хатлон низ пурра ҷамъбаст карда шуд.
Мавсими баҳории даъват ба саффи Қувваҳои мусаллаҳи Тоҷикистон 1 апрел оғоз ёфт ва то 31 май давом мекунад.
Вилояти мухтори Кӯҳистони Бадахшон ва 5 ноҳияи водии Рашт (Рашт, Сангвор, Лахш, Нуробод, Тоҷикобод) алакай дар ҳамон рӯзи аввали 1 апрел аз иҷрои нақшаҳояшон ҳисобот доданд.
Вазорати мудофиа қаблан хабар дод, ки дар моҳи аввали даъвати баҳорӣ нақшаи даъват дар саросари ҷумҳурӣ 70 фоиз иҷро шудааст. Бар асоси гузориши маркази матбуоти ин вазорат, дар моҳи апрел нақшаи даъват дар вилояти Хатлон 86%, дар шаҳру ноҳияҳои тобеи маркази ҷумҳурӣ 74 фоиз, дар вилояти Суғд 55 фоиз ва дар Душанбе 51 фоизро ташкил додааст Вале инак бо вуҷуди алакай гузаштани нисфи моҳи май, моҳи дуюм ва ҷамъбастии мавсими баҳорӣ, маркази матбуоти вазорати мудофиа дигар дар бораи ҷараёни ин маърака ягон рақамҳои нав нашр накардааст.
Соли гузаштаи 2023 дар ҳарду мавсими даъвати баҳорӣ ва тирамоҳӣ нақшаи умумӣ дар ҷумҳурӣ иҷро нашуда буд.