Скачать или смотреть சந்திரன் பரிகார தலம்| சோமநாதீஸ்வரர் திருக்கோயில்| சோமங்கலம்| Somanatheeswarar Temple| Somangalam|

அனைவருக்கும் வணக்கம். இன்றைய பதிவில் சென்னைக்கு அருகில் உள்ள நவகிரக கோயில்களில், சந்திரனுக்கு உரிய பரிகார தலத்தை பற்றி காண்போம். மனோகாரகன் மற்றும் உடல் காரகன் எனப்படும் சந்திர பகவானுக்கு சோமன் என்ற பெயரும் உண்டு. அவருக்கு உரிய கிழமை சோமவாரம் எனப்படும் திங்கட்கிழமையாகும். சந்திரன், ஜாதகத்தில் பாதகமான இடத்தில் அமைந்தால், அவர்கள் மனநிலையில் அடிக்கடி மாற்றங்கள் ஏற்பட்டு, பல்வேறு மன உளைச்சல்களால் அவதி அடைகின்றனர் என்பது ஜோதிடர்களின் கருத்து.

இதுபோன்ற தோஷ பாதிப்புகள் நீங்க, நாம் சென்று வணங்க வேண்டிய பரிகார தலம் அருள்மிகு காமாட்சி அம்மன் சமேத சோமநாதீஸ்வரர் திருக்கோயில். இத்திருக்கோயில் சென்னையிலிருந்து சுமார் 38 கி.மீ. தொலைவில் குன்றத்தூருக்கு அருகே சோமங்கலம் என்ற பகுதியில் உள்ளது. பத்தாம் நூற்றாண்டில் சோழ மன்னர் ஆட்சி காலத்தில் கட்டப்பட்டது. திருநாவுக்கரசர் பாடிய தேவார வைப்பு தலம்.

ஆலய தல வரலாறு பற்றி காண்போம்! சந்திரன் தட்சனின் சாபத்தால், தனது தெய்வீக வசீகரம் மற்றும் தான் பெற்ற 16 கலைகளையும் இழக்க நேரிட்டது. இதனால் சாப விமோசனம் பெற சந்திரன் இத்தலத்திற்கு வந்தான். இங்கு ஒரு குளத்தை உருவாக்கி அதில் நீராடி, சிவபெருமானை வேண்டி பெருந்தவம் புரிந்தான். மனமிரங்கிய ஈசன் சந்திரனுக்கு காட்சி அளித்து சாபவிமோசனம் அளித்தார். இதனால் சந்திரன் தனது பழைய உடல் பொலிவோடு முழு சந்திரனாக மாறினான். தான் இழந்த 16 கலைகளை திரும்ப பெற்றான்.

சோமன் உருவாக்கிய குளம் என்பதால் இந்த குளம் சோம தீர்த்தம் என்றும் அவனின் வினையை தீர்த்தத்தால் வினைதீர்த்தான் குளம் என்றும் அழைக்கப்படுகிறது. சோமன் வழிபட்ட ஈஸ்வரர் என்பதால் இறைவனின் திருப்பெயர் சோமநாதீஸ்வரர் என்று பெயர் பெற்றது. ஆலய தல விருட்சம் - சரக்கொன்றை.

பிரார்த்தனைச் சிறப்பு: சந்திர தசை மற்றும் சந்திர புத்தி நடைபெறுபவர்கள், ஜாதகத்தில் சந்திர தோஷம் உள்ளவர்கள் இந்த ஆலயத்தில் குடிகொண்டிருக்கும் மூலவர் சோமநாதீஸ்வரர் மற்றும் காமாட்சி அம்மனை வழிபட்டு, சந்திரனுக்கு 11 வாரம் 2 நெய் தீபம் ஏற்றி அர்ச்சனை செய்து பச்சரிசி தானம் வழங்குவதும், 11வது வாரம் அபிஷேகம் செய்வதும் பரிகாரமாகும். திங்கட்கிழமை, பெளர்ணமி மற்றும் சந்திராஷ்டம நாட்களில் வழிபடுவது மிகவும் சிறப்பு. சந்திர பகவானின் அருளால் மன குழப்பங்கள், சஞ்சலங்கள் மற்றும் மனோவியாதி நீங்கி, மன தெளிவு ஏற்பட்டு மகிழ்ச்சியான மற்றும் அமைதியான வாழ்வு அமையும் என்பது பக்தர்களின் நம்பிக்கை.

ஆலய நடை திறப்பு நேரம்: காலை 7 முதல் 10.30 மணி வரை மற்றும் மாலை 5 முதல் 7.30 மணி வரை.

சோமநாதீஸ்வரர் திருக்கோயில் சென்னையிலிருந்து சுமார் 38 கிலோ மீட்டர் தொலைவில் காஞ்சிபுரம் மாவட்டம் சதுர்வேதிமங்கலம் எனப்படும் சோமங்கலம் என்ற இடத்தில் அமைந்துள்ளது. குன்றத்தூர் பேருந்து நிலையத்திலிருந்து சுமார் 10 கிமீ தொலைவில் உள்ளது. ஸ்ரீ பெரும்புதூரிலிருந்து 12 கி.மீ. தொலைவில் உள்ளது.