Orroli (SU) - S. Nicola 2023 - "Su sciugàriu de sa sposa"

Arrolli 18.06.2023 – Sa dia de Santu Nigolla
In custa dì nodia su grupu de su folclori arrollesu, cun custa scena nd’at scidau is arregodus de sa genti nosta antiga, ma de cudda vera però, chi depeus pigai insenniamentu. Su trasportu de su sciugàriu de sa sposa a sa domu de su sposu. Fut unu momentu de comotzioni po custa picioca chi fut incrarendusia a su mundu nou. Calli momentu prus bellu po una picioca sa preparativa po sa coja, non sceti po issa ma po totu sa famìllia sua intrea. Cantu scrifìtzius po si podi pinnigai custu sciugàriu disigiau sempri de ònnia picioca comenti de sa mellus cosa. Cantu sachetas de spiga iant ai boddiu po podi acuistai cancunu trastu, cantu sudori, cant’annus de srebidora, cantu cadinus de sciacuai arroba in frùmini, cantu lana sciacuada e craminada po tessi, e cannugas de fillòngiu, po comprai pallitonis, turras, sciveddas, fruconis e fruciddaxus, crobis, sedatzus e canisteddus e pallinis, tianus, pingiadas e pingiadeddas, frochitas e culleras cun talleris, fanugas e lantzorus, mantas e mantìllias, e fintzas e su bassinu non depiat mancai, tandus fut su bànniu internu, in foras ddui fiat su muntronaxu…..totu fiat parti de sa meri de domu. Nonna mia materna, arrollesa pura morta a 95 annus, Massimina Piras, 1878 contàt is contus de sa vida sua, e in cussu momentu is ogus suus ddi luxiant de làgrimas, arregodendu su traballu ch’iat fatu po si podi comprai su scigàriu. Candu in Arrolli puru a is primus de su Noixentus, fut passada sa ferrovia de is cumplimentaris asumiant piciocas e piocheddas po pinnigai giarra po sterri is binarius e sa paga non fut a gerronada, iat a èssiri tropu còmudu aici. Invecis po non sfugiri nudda a sa mandronia ddas pagànt po ònnia cofa de giarra chi presentànt a unu capu scuadra e po contègiu ddi si donànt una rondella de ferru si dd’apicant in su tzugu cun unu giuncu e a fini de sa scida dda presentànt po sa pga in dinai, cantu rondellas cantu in dinai, nudda podiant cullunai ca su sudori fut pretziosu…….Candu s’est sposada a Nurri cun nonnu miu Raffaele Atzeni, classe 1878 issu puru, su trasportu si fut fatu a carru a bois de Arrolli a Nurri, ma fut una festa, contàt sempri unu prexu chi ddi fut abarrau sempri in su coru. Fiant veras gherreras de sa vida, ddas podeus nai, veras santas. Depiant dimostrai de tenni totu po podi arredai sa domu de su sposu chi issu puru cun annus de trataballu siat concuistau. Cun custa processioni sèria e cumposta, cun is costumus de bellesa, oi custas piciocas indant torau a bisu, comenti de unu sonnu, cussus tempus chi non tenint perunu paragoni a nosu, ma depeus imparai e pigai de esèmpiu ca funt stètias veramenti feminas veras……

Is ripresas funt de Antoni Vargiu de Nurri