Скачать или смотреть Utoaji wa miche utafanyika kwa wakulima waliothibitishwa na maafisa ugani.

KAHAWA YAENDELEA KUNOGA LUDEWA — WANANCHI LUPANDE WASHIKA KASI KILIMO CHA BIASHARA
Ludewa, Njombe:
Zao la kahawa limeendelea kupata msukumo mpya katika Wilaya ya Ludewa, huku wananchi wa Kijiji cha Lupande, Kata ya Mawengi wakionyesha mwitikio mkubwa wa kujiunga na kilimo hicho cha kibiashara baada ya kupatiwa miche bora bure kupitia mpango wa Serikali kwa kushirikiana na Chama Kikuu cha Ushirika Mkoa wa Njombe (NJORECO).

Zoezi la uzinduzi wa ugawaji wa miche hiyo limefanyika leo, Desemba 29, 2025 katika Kitalu cha Kikundi cha Kahama (Kahawa ni Mali) kilichopo eneo la Lyunguya. Uzinduzi huo umefanywa na Mwenyekiti wa Halmashauri ya Wilaya ya Ludewa, Mhe. Wise Mgina, aliyemwakilisha Mkuu wa Wilaya ya Ludewa, Ndg. Olivanus Thomas, akiambatana na Kaimu Mkurugenzi Mtendaji wa Halmashauri hiyo, Ndg. Castory Kibasa.

Akizungumza wakati wa uzinduzi huo, Mhe. Mgina aliishukuru Serikali kupitia Bodi ya Kahawa kwa kutoa miche hiyo bure kwa wakulima, akisema hatua hiyo ni kichocheo kikubwa cha kuhamasisha wananchi kuingia kwenye kilimo cha biashara chenye tija.
Alibainisha kuwa Halmashauri imejipanga kutenga fedha kusaidia wakulima wanaojikita kwenye mazao ya biashara kama kahawa, huku akiwataka maafisa kilimo kushuka mashambani badala ya kukaa ofisini ili kuwasaidia wakulima kutatua changamoto zao.

Kwa upande wake, Kaimu Mkurugenzi Mtendaji wa Halmashauri, Ndg. Castory Kibasa, akiwasilisha taarifa ya uzalishaji wa kahawa wilayani humo alisema hadi sasa kuna wazalishaji nane wa miche ya kahawa, na jumla ya miche 593,000 inatarajiwa kuzalishwa.
Alisisitiza kuwa utoaji wa miche hiyo utafanyika kwa wakulima waliothibitishwa na maafisa ugani kuwa wanakidhi vigezo vya kupokea miche.

Wananchi wa Lupande wamefurahishwa na mpango huo, wakieleza kuwa kahawa ni zao la uhakika lenye bei nzuri sokoni na litachangia kuongeza kipato cha familia pamoja na mapato ya Halmashauri.

Zoezi la ugawaji linaendelea katika vikundi mbalimbali ikiwemo Kikundi cha Umoja Mawengi, Kahawa ya Vikonyo Lufumbu (Kata ya Mlangali), Kikundi cha Ukavil Ligumbiro, Kahawa ya Vikonyo Ludende, Ludewa Coffee Seedlings Ludewa na Kikundi cha Njelela.

Wananchi wameahidi kushirikiana na Serikali na kusimamia vyema miche waliyopewa ili kulifanya zao la kahawa kuwa mkombozi wa kiuchumi kwao na kwa vizazi vijavyo.