Скачать или смотреть ប្រទាលកន្ទុយក្រពើ មានគុណប្រយោជន៍ ក៏មានគ្រោះថ្នាក់ដែរ, Benefit of Aloe Vera.

Benefit of Aloe Vera.
ប្រទាលកន្ទុយក្រពើ
ក្នុងវីដេអូរនេះ ខ្ញុំនិងបង្ហាញលោកលោកស្រីអ្នកនាងកញ្ញា អំពី គុណប្រយោជន៍ និងគុណវិបត្តិ របស់ប្រទាលកន្ទុយក្រពើ
១-ប្រទាលកន្ទុយក្រពើជាមិត្តរបស់ស្បែក
ការរលាក កកិត រោលនឹងកំដៅថ្ងៃ ឬឆេះភ្លើង ឡើងពង ឡើងកន្ទួល រមាស់ ប្រទាលកន្ទុយក្រពើអាចជួយបន្ធូរបន្ថយ និងបំបាត់អាការៈសញ្ញាទាំងអស់នេះបាន ដោយគ្រាន់តែលោកអ្នកយក ជែល ឬសាច់សទន់ៗ ដែលជាអន្ធិល របស់ធាងប្រទាលកន្ទុយក្រពើមកបិទពីលើតែប៉ុណ្ណោះ។
បើតាមការពន្យល់របស់ ឱសថបណ្ឌិតឯកទេសរុក្ខជាតិ ប្រទាលកន្ទុយក្រពើ មានសមត្ថភាពផ្តល់ភាពត្រជាក់ ផ្តល់សំណើមជាតិទឹក ឱ្យស្បែក និងជួសជុលអេពីដែម ឱ្យវិលមករកភាពធម្មតាឡើងវិញ។ សារធាតុសកម្មជាធម្មជាតិរបស់ប្រទាលកន្ទុយក្រពើ មានកំហាប់ខ្ពស់ខ្លាំង រហូតអាចមានសមត្ថភាពជួយស្បែកដំបៅ និងមានការបង្ករោគ ឱ្យឆាប់បានជាសះស្បើយបាន។
បើតាមប្រសាសន៍របស់លោកស្រីឱសថការី អាស៊ីតសាលីស៊ីលិក ដែលមានបង្កប់នៅក្នុងប្រទាល អាចជ្រាបចូលទៅក្នុងស្រទាប់ស្បែកតាមរន្ធញើសទៅលាងសម្អាតក្រពេញសេបាសេ (ក្រពេញនៅចន្លោះស្រទាប់ស្បែកលើនិងស្បែកក្នុង) ដែលមានខ្លាញ់ច្រើនជ្រុល និងដែលជាដើមហេតុបង្កឱ្យមានការកើតមុន។
ដូច្នេះដើម្បីព្យាបាលមុខកុំឱ្យចេញមុន សូមយកសាច់ប្រទាលកន្ទុយក្រពើទៅបិទពីលើស្បែកពកៗរកកើតមុន នៅរាល់ល្ងាច ឬពេញមួយយប់ក៏បាន។ ក៏ប៉ុន្តែត្រូវប្រុងប្រយ័ត្ន ! កុំភ្លេចលាងសម្អាតស្បែកមុខនៅពេលព្រឹកឡើង។
បើលោកអ្នកមានស្បែកស្ងួត ឬស្ងួតខ្លាំង និងងាយមានប្រតិកម្ម គួរប្រយ័ត្ននឹងការប្រើអាស៊ីតសាលីស៊ីលីក ឬប្រទាលនេះ ព្រោះវាអាចនឹងធ្វើឱ្យស្បែករលាក និងអាឡែកហ្ស៊ីបាន។ ក្នុងករណីនេះ សូមប្រើប្រទាលកន្ទុយក្រពើតែម្តងឬពីរដងបានហើយក្នុងមួយសប្តាហ៍។
ឧស្សាហកម្មសម្ផស្ស ត្រូវការប្រទាលកន្ទុយក្រពើណាស់ ! ព្រោះប្រទាលនេះមានផ្ទុកសារធាតុ ផូលីសាការីដ polysaccharides (ជាតិស្ករ) ក្នុងបរិមាណដ៏លើសលុប។ សារធាតុ ផូលីសាការីដ polysaccharides មាននាទីទៅផ្សើម និងចិញ្ចឹម ព្រមទាំងផ្តល់អុកស៊ីសែន ឱ្យកោសិកាស្បែក ឱ្យចាត់ចែងបញ្ចេញជាតិកូឡាជែន។ មានន័យថាជាតិស្កររបស់ប្រទាលកន្ទុយក្រពើនេះ នឹងជួយឱ្យស្បែកមានកំរិតជាតិទឹកខ្ពស់ ធ្វើឱ្យរលោង យឺតល្អ និងកាត់បន្ថយភ្លី ផ្នត់ ជ្រីវជ្រួញ និងមាន សមត្ថភាពជួយស្បែកមិនឱ្យឆាប់ចាស់បាន។
២-ប្រឆាំងនឹងសក់ឡើងខ្លាញ់
ជាងនេះទៅទៀត ប្រទាលកន្ទុយក្រពើ ជារុក្ខជាតិមានផ្ទុកសារធាតុសង្កសីច្រើន ដែលអាចជួយសម្រួលការផលិតជាតិខ្លាញ់សេប៊ុម ពោលគឺអាចប្រយុទ្ធប្រឆាំងនឹងការឡើងជាតិខ្លាញ់នៅសក់។
ដូច្នេះ បើសក់លោកអ្នកឆាប់ឡើងខ្លាញ់ សូមកុំលាក់បាំងវាដោយការចងញុក ! សូមសាកល្បងប្រើប្រទាលកន្ទុយក្រពើចុះ។
បន្ថែមពីលើនេះទៀត ប្រទាលកន្ទុយក្រពើ មានផ្ទុកវីតាមីន អា និងបេ ព្រមទាំងអាស៊ីតអាមីណេ ដែលសុទ្ធសឹង ជាសារធាតុមានតួនាទីចិញ្ចឹមសក់ ថែទាំសក់ដល់ឬសគល់។ ហេតុដូច្នេះហើយបានជានៅក្នុងសាប៊ូកក់សក់ជាច្រើនគេតែងបញ្ជាក់បន្ថែមថាមានជាតិប្រទាលកន្ទុយក្រពើ ដើម្បីអួតអាងអំពីគុណភាពល្អរបស់សាប៊ូ។ ប៉ុន្តែដើម្បីឱ្យកាន់តែមានប្រសិទ្ធភាព លោកអ្នកត្រូវទទួលប្រទាលកន្ទុយក្រពើតែម្តង មិនមែនត្រឹមតែលាបរឺ បិទខាងតែខាងក្រៅឡើយ។

៣-កាត់បន្ថយអាការៈរលាកក្រពះ
ការទទួលទានប្រទាលកន្ទុយក្រពើ អាចជួយស្បែក ជួយសក់ឱ្យនៅភ្លឺរលោងទន់ល្អ និងជួយសរីរាង្គផ្នែកខាងក្នុងទៀត។ ដោយសារភាពសម្បូរបែបផ្នែកសារជាតិ ប៉ូលីសាការីត polysaccharides ប្រទាលកន្ទុយក្រពើ អាចជួយការពារស្រទាប់ភ្នាសក្រពះ មិនឱ្យឈឺ និងមិនឱ្យមានច្រាលឡើងមកលើ ព្រមទាំងអាចជួយព្យាបាលដំបៅក្រពះបានទៀត។ ព្រោះប៉ូលីសាការីត ជាស្ករធម្មជាតិមានសមត្ថភាពផ្តល់សំណើម និងជួយចាត់ចែងឱ្យភ្នាសមានសភាពសើមជានិច្ច ដែលការនេះអាចធ្វើឱ្យអត្រាជាតិស្ករ និងខ្លាញ់ក្នុងឈាម ចុះថយបាន។ ជាតិស្ករធម្មជាតិរបស់ប្រទាល អាចជាមិត្តល្អរបស់អ្នកកើតជំងឺទឹកនោមផ្អែម និងអ្នកមានជំងឺខ្លាញ់ក្នុងឈាម។ ដើម្បីការពារស្រទាប់ស្បែកស្តើងៗឱ្យនៅសើម បានយូរ លោកអ្នកអាចទទួលទានទឹកប្រទាលកន្ទុយក្រពើ ក្រឡុកស្រស់ៗ ជាកិច្ចព្យាបាលជំងឺរយៈពេល២១ទៅ២៥ថ្ងៃ ក្នុងបរិមាណ ២៥មីល្លីលីត្រ ព្រឹកម្តងល្ងាចម្តង នៅអាទិត្យដំបូង និងបន្ទាប់មកពិសារតែម្តង នៅពេលព្រឹកមុនទទួលទានអាហារ។
៤-ជំនួយបញ្ហាភ្នែក

ចំពោះភ្នែក សរីរាង្គដែលងាយនឹងរកងការវាយប្រហារពីសំណាក់មីក្រុប និងបាក់តេរីផ្សេងៗ ឆាប់មានអាការៈរលាក ឡើងក្រហមវិញ ប្រទាលកន្ទុយក្រពើអាចជួយសម្រួលនិងកាត់បន្ថយភាពរកាំបានខ្លះ។

៥-តែប្រទាលកន្ទុយក្រពើ អាចបង្កជាជំងឺមហារីកបាន
បើតាមភ្នាក់ងារបារាំង ប្រទាលកន្ទុយក្រពើដែលមានប្រើប្រាស់យ៉ាងទូលំទូលាយ ក្នុងវេជ្ជសាស្ត្រ ក្នុងផលិតផលសំអាងកែសម្ផស្ស ជាគ្រឿងផ្សំធ្វើម្ហូប មិនអាចយកប្រើប្រាស់តាមតែចិត្តនឹកឃើញឡើយ ជាពិសេសចំពោះប្រទាលកន្ទុយក្រពើស្រស់ៗដែលមានជាប់ជ័រ។ ហើយគឺជ័រលឿងៗដែលមានជាប់នឹងសំបកប្រទាលនេះឯងដែលជាប្រភពផ្តល់គុណវិបត្តិ និងផលរំខានជាច្រើន ដែលមានបញ្ជាក់បង្ហាញក្នុងឯកសារជាច្រើន តែគ្មាននរណាបានរំលឹកអំពីគ្រោះថ្នាក់របស់វា នៅពេលលក់។
ជ័រលឿងៗរបស់ប្រទាល ស្អិតខ្លាំងណាស់ ដូច្នេះប្រសិនបើយើងទទួលទានប្រទាលកន្ទុយក្រពើមានជាប់ជ័រនេះច្រើន និងញយៗដង នោះគេនឹងអាចមានគ្រោះជួបជំងឺមហារីកពោះវៀន បញ្ហាតម្រងនោមធ្ងន់ធ្ងរ។ ថ្វីបើប្រទាលកន្ទុយក្រពើ ត្រូវបានគេប្រើប្រាស់សម្រាប់សម្រួលការទល់លាមកម្តងម្កាល តែការទទួលទានប្រទាលនេះច្រើនអាចនឹងធ្វើឱ្យមានបញ្ហាចុកពោះ និងរាករូសទៅវិញ។
hydroxyanthracéniques របស់ប្រទាលកន្ទុយក្រពើ ថាជាភ្នាក់ងារបង្កជំងឺ មហារីក និងអាចធ្វើឱ្យ អាដេអិន របស់មនុស្សខូចខាតបាន។
ក្នុងពេលរង់ចាំលទ្ធផលនៃការសិក្សាវាយតម្លៃអំពីហានិភ័យរបស់ធាងប្រទាលកន្ទុយក្រពើ ភ្នាក់ងារសុវត្ថិភាពចំណីអាហារបារាំង មិនបានណែនាំឱ្យអស់លោកអ្នកឈប់ប៉ះពាល់ ឬឈប់ទទួលទានរុក្ខជាតិដ៏ពេញនិយមនេះនៅឡើយទេ ប៉ុន្តែភ្នាក់ងារសូមផ្តល់អនុសាសន៍ឱ្យលោកអ្នកបង្កើនការប្រុងប្រយ័ត្ន នៅពេលប្រើប្រទាលកន្ទុយក្រពើស្រស់ ដោយត្រូវចិតសំបកចេញឱ្យអស់ លាងជ័រពណ៌លឿងៗចេញឱ្យស្អាត និងទទួលទានតែសាច់ទន់ថ្លាៗរបស់ប្រទាល តែប៉ុណ្ណោះ។
ចំពោះស្ត្រីមានផ្ទៃពោះ ស្ត្រីបំបៅដោះកូន ក្មេងៗ ព្រមទាំងមនុស្សពេញវ័យ មនុស្សមានសុខភាពមិនរឹងមាំ សូមកុំទទួលទានប្រទាលកន្ទុយក្រពើ ជាអាហារស្រស់ឱ្យសោះ៕