Скачать или смотреть WATATU WANASWA KWA MAUAJI GAIRO, KILOSA NA KILOMBERO

Morogoro. Jeshi la Polisi mkoani Morogoro limefanikiwa kuwakamata watuhumiwa watatu wa mauaji katika matukio tofauti yaliyotokea katika wilaya za Gairo, Kilosa na Kilombero, baada ya kuwatafuta kwa muda mrefu walipotoweka kusikojulikana.
Faraji Mwandanda (36), mpiga debe katika stendi ya mabasi mjini Ifakara, anadaiwa kumuua mkewe Florenciana Kamunarelo (38) kwa kumchoma na kitu chenye ncha kali kufuatia ugomvi wa wivu wa kimapenzi. Mwili wa marehemu ulitelekezwa nyumbani hadi ulipogunduliwa Julai 11, 2025.
Katika tukio jingine lililotokea Kilosa, John Mayunga (34) anashikiliwa kwa tuhuma za mauaji ya dereva bodaboda Halifa Abdallah (19), ambaye alikodishwa na baadaye kushambuliwa kwa lengo la kuiba pikipiki. Mtuhumiwa huyo alikamatwa akiwa anapata matibabu katika hospitali ya mkoani Dodoma.
Wilayani Gairo, David Makamu (35) amekamatwa kwa tuhuma za mauaji ya Wilson Dastan (38) kwa kumpiga na kitu butu akiwa kwenye pikipiki, hatua iliyosababisha ajali na kifo cha papo hapo kwa marehemu.
Akizungumza na waandishi wa habari leo Jumanne, Julai 14, 2025, Kamanda wa Polisi wa Mkoa wa Morogoro, Kamishna Msaidizi Mwandamizi wa Polisi Alex Mkama, amesema uchunguzi wa matukio hayo unaendelea na watuhumiwa wote wanashikiliwa kwa hatua zaidi za kisheria.
“Jeshi la Polisi halitasita kuchukua hatua kali kwa wote wanaohusika na vitendo vya kihalifu,” amesema Kamanda Mkama, akisisitiza ushirikiano kutoka kwa wananchi kuendelea kutolea taarifa za kihalifu.