Барзу Абдураззоқов: "Ба ватан даркор набошам, чӣ кунам?"

Аз 1 то 7 ноябр дар шаҳри Алмаатои Қазоқистон 8-умин фестивали театрҳои кишварҳои Осиёи Марказӣ баргузор шуд. Дар ин ҳамоиш ҳунармандони театри Камоли Хуҷандӣ аз Тоҷикистон низ ширкат карданд. Намоишномаи “Донишҷӯён. Сабақҳои зиндагӣ” дар таҳияи коргардони тоҷик Барзу Абдураззоқов ҳам дар доираи фестивал ба саҳна гузошта шуд. Ҳамкорони мо Фарзон Муҳаммадӣ ва Муллораҷаб Юсуфӣ ҳам аз тамошобинони намоишнома буданд.

Мадияр Сарибай, устоди Академияи санъати Қазоқистон мегӯяд: “Бо Барзу Абдураззоқов кор кардан осон аст. Вай аз афроди ғайри бозигар тавонмандиҳои онро берун мекашад. Ӯ бо ҳар ҳунарманд дар алоҳидагӣ кор мекунад, вақт ҷудо мекунад шаб, рӯз. Инхел нест, ки мо фақат рӯзона кор кунем. 24 соат мо бо ӯ дар алоқа ҳастем, менависем, вомехӯрем, дар субҳона, чошт, хӯроки шом мо кор мекардем. Мо барои таҳияи ин намоишнома 40 рӯз доштем ва Барзу Абдураззоқов дар ин муддат тавонист бо ҳар ҳунарманд дар алоҳидагӣ кор кунад.”

Намоишҳои Барзу Абдураззоқов чанд сол аст, ки дар театрҳои Тоҷикистон рӯйи саҳна намеояд. Бори ахир Вазорати фарҳанги Тоҷикистон барои рӯйи саҳна омадани намоишномаи “Манқурт” иҷозат надод. Вазири фарҳанг далели манъи намоишро дур рафтани коргардон аз матни аслӣ ва мувофиқ набудан ба сиёсати имрӯза номид. Барзу Абдураззоқов чанд сол аст, ки дар Қазоқистон ва дигар кишварҳои минтақа кор мекунад. Мегӯяд ба чунин вазъ дигар одат кардааст.

“Пеш азоб мекашидам, ҳозир парво надорам. Хуб, онҷо қабул надоранд дар ними дунё қабул доранд. Фақат дар рӯзҳои фестивал дар панҷ театр намоиши ман меравад. Дар Кюз меравад имрӯз ду намоиши ман меравад. Ҳарчӣ ватани ман намехоҳад, ин мушкили ватани ман аст. мебинед, ки инҷо ба инҳо фоида мерасад. Чӣ қадар одамон аз Русия аз Узбекистон наздам будам. Ҳар театр мехоҳад ман наздаш рафта кор кунам, магар ин хушбахтӣ нест. Магар ин азоб аст? То кай ман мегӯям ки ин ватани ман аст, не бошад не.”