Саха народнай артыыһа Зоя Багынанова: Дьону үөрдэртэн ордук туох да суох. Ис сүрэхтэн

Официальный сайт NVK-ONLINE.RU - Саха народнай артыыһа Зоя Петровна Багынанова 1942 с. муус устар 22 күнүгэр Үөһээ Бүлүү Далыр нэһилиэгэр төрөөбүтэ. Зоя Петровна ийэлээх аҕатын туһунан кинигэтигэр олус истиҥник-иһирэхтик ахтар. Ийэтэ - Мария Иннокентьевна, аҕата - Петр Николаевич Багынановтар үлэни өрө туппут, боростуой дьон. Аҕата олоҥхону, оһуохайы, тойугу олус сөбүлүүрэ, бэйэтэ эмиэ баай кылыһахтаах ырыаһыт этэ. Кыра сылдьан, аҕам оһуохайын түһүлгэҕэ киирэн астына истэрим диир. Багынановтар 12-тэ оҕоломмуттарыттан улаатан, атахтарыгар турбуттара - 4.

Аҕалара кэлин: "8 оҕону көмтүбүт да, ийэҕит барахсан саҥа таһааран аймаммытын көрбөтөҕүм. Ол эһиги этэҥҥэ сылдьаргытын түстээн, ытаабат-соҥообот этэ", - диэн эппитин оҕолоро умнубаттар.

Ийэлээх аҕа сиэттэрин көрөн, оҕолоон хаалар уһун, дьоллоох олоҕу олорбуттара. Петр Николаевич 94 сааһыгар, Мария Иннокентьевна 89 сааһыгар бу олохтон барбыттара. Онон бииргэ төрөөбүт оҕолор Баһылай, Зоя, Байбал уонна саамай кыралара - Маруся. Марусяларын кэргэнэ, тапталлаах күтүөттэрэ, саха народнай суруйааччыта, саха литературатыгар детектив жанрын маастара Егор Неймохов.

Зоя Петровна бииргэ төрөөбүттэрин сэргэ кинилэргэ иитиллибит эдьиийин Настааны, убайын Өлөксөйү олус чугастык, күндүтүк саныыр. Зоя кыра эрдэҕиттэн чобуо, сытыы оҕо этэ. Оскуолаҕа үөрэнэр сылларыгар араас ырыа-үҥкүү, гимнастика куруһуоктарыгар сылдьара. Оскуола олоҕор көхтөөхтүк кыттара, төлөннөөх пионер этэ, саастыылаахтарын кытта мас саһаанныыллара, кирпииччэ тэпсэллэрэ, оччоттон да үлэҕэ сысталлара.

Оннооҕор Зоя электромонтер куруһуогар дьарыктаммытын, остуолбаҕа ыттан турарын туоһулуур эргэрбит хаартыскалар бааллар. Оскуола кэнниттэн тыа сирин эдэркээн кыыһын бүтүн олоҕун уларытар дьикти түгэн тосхойор.

Москватааҕы Щепкин аатынан үрдүкү театральнай училище устудьуона буолар. Манна кини Василий Фомин, Симон Федотов, Прасковья Адамова, Алексанра Аргунова - Күөрэгэй курдук артыыстары кытта бииргэ үөрэммитэ. Бу үөрэххэ кэлин кини кэргэнин, артыыс Геннадий Сивцеви кытта көрсөн, ыал буолбуттара...