Скачать или смотреть શિક્ષક સાથે સંવાદ શ્રી મહેશભાઈ ઠક્કર| Ramesh Tanna | Navi Savar

મહેશભાઈ ઠક્કર સજ્જ, સંવેદનશીલ અને પ્રતિબદ્ધ શિક્ષક છે. તેમની 37 વર્ષની શિક્ષણયાત્રા પર નજર નાખીએ તો એમ થાય કે પ્રાથમિક શાળાના શિક્ષક હોય તો આવા જ હોય. 1989માં હારીજ તાલુકાના વાંસા ગામમાં શિક્ષક તરીકે જોડાયા અને 2025માં અમદાવાદના થલતેજની પ્રાથમિક શાળામાંથી 37 વર્ષની ફરજનિષ્ઠા પછી નિવૃત્ત થયા. તેમણે પોતાના શિક્ષક ધર્મને દિપાવ્યો છે. વિદ્યાર્થી દેવો ભવ. તેમણે પોતાના વિદ્યાર્થીઓને ભગવાન માનીને તેમની પૂજા કરી છે. વર્ગ-શિક્ષણ ઉપરાંત રમત-ગમત, વિજ્ઞાન, સ્કાઉટ, ટેકનોલોજી, કમ્પ્યૂટર-શિક્ષણ, વિવિધ કળાઓ.. મહેશભાઈએ વિદ્યાર્થીઓ સમક્ષ અનેક પ્રવૃત્તિઓનો ચંદરવો સર્જી આપ્યો. ટ્યૂશનની વાત તો જવા જ દો, વિદ્યાર્થીઓને વધુને વધુ સમય આપી શકાય તથા તેમનાં માતા-પિતા સાથે જાગૃતિનો સમન્વય સાધી શકાય તે માટે આ 37 વર્ષમાં તેમણે બીજું કશું કર્યું જ નથી. સરકારની વિવિધ એજન્સીઓ અને સમાજની જુદી જુદી સંસ્થાઓને પોતાના વિદ્યાર્થીઓના ઉત્કર્ષ સાથે જોડી. શ્રમજીવી પરિવારોના થલતેજ પ્રાથમિક શાળાના વિદ્યાર્થીઓનું સર્વાંગી ઘડતર કર્યું. આ શાળાની બાળાઓ ભારતની ફૂટબોલની ટીમમાં સ્થાન પામી. છે ને ચમત્કાર. આવા તો ઘણા ચમત્કાર આદર્શ શિક્ષક મહેશભાઈ ઠક્કરે કર્યા છે. સવા કલાકની તેમની આ મુલાકાત ગુજરાતના દરેકે દરેક પ્રાથમિક શિક્ષકે, આચાર્યે, શિક્ષણ અધિકારીઓ, શિક્ષણ મંત્રી અને મુખ્યમંત્રી સુદ્ધાંએ જોવી જોઈએ. સ્વસ્થ સમાજનો પાયો શિક્ષણ છે અને પ્રાથમિક શિક્ષણ તેનું અગ્રદૂત છે. આજે ગુજરાત બે-ચાર કે દસ પાંદડે છે તેના પાયામાં હજારો પ્રતિબદ્ધ પ્રાથમિક શિક્ષકોનો પુરુષાર્થ, પરસેવો અને સંવેદના પડેલાં છે. આ મુલાકાત આદર્શ પ્રાથમિક શિક્ષક કેવો હોવો જોઈએ તેની આચારસંહિતા પણ રજૂ કરે છે. સમય કાઢીને પણ આ આખી મુલાકાત ધીરજથી જોવાની ભલામણ છે.
નવી સવારે ગુજરાતના વર્કિંગ જર્નાલિસ્ટ (વ્યવસાયી પત્રકારો)નું ડિજિટલ દસ્તાવેજીકરણ કર્યું, હવે ગુજરાતના પ્રાથમિક શાળાના સજ્જ, સંવેદનશીલ અને પ્રતિબદ્ધ શિક્ષકોનું દસ્તાવેજીકરણ આ સાથે શરૂ કરીએ છીએ. આપના હૃદયમાં કે ધ્યાનમાં આવા શિક્ષકો હોય તો ( રમેશ તન્ના 9824034475) જાણ કરશો.
અમદાવાદના બોપલ વિસ્તારમાં રહેતા શ્રી મહેશભાઈ ઠક્કરનો સંપર્ક નંબર 94276 24123 છે.

પૉઝિટિવ સ્ટોરીઝ શ્રેણીનાં દસ પુસ્તકો ઘરે બેઠાં મેળવવા WhatsApp કરો: 88496 09083

લેખકનો પરિચય: રમેશ તન્ના પત્રકાર, સંપાદક, લેખક, વક્તા અને સમાજસેવક છે.
પહેલી ડિસેમ્બર, 1966ના રોજ ઉત્તર ગુજરાતમાં પાટણ જિલ્લાના સમી તાલુકાના અમરાપુર ગામમાં તેમનો જન્મ. માતા પ્રભાબહેન પાસેથી માતૃભાષા તથા સંવેદના, પિતા પ્રભુરામ પાસેથી ઉદારતા તથા સરળતા અને ગામ અમરાપુર પાસેથી સામાજિક દાયિત્વનો વારસો તેમણે ઝીલ્યો. બી.કૉમ થયા પછી તેમણે પત્રકારત્વ વિષયમાં પણ સ્નાતકની ઉપાધિ મેળવી. એ પછી મહાત્મા ગાંધી સ્થાપિત ગૂજરાત વિદ્યાપીઠમાંથી તેઓ પત્રકારત્વ વિષયમાં પારંગત (માસ્ટર) થયા. અહીં જ તેમણે બે વર્ષ પત્રકારત્વ વિભાગમાં પૂર્ણ સમયના વ્યાખ્યાતા તરીકે ફરજ બજાવી. સ્વતંત્ર રહીને સમાજ ઉપયોગી લેખન કરવાના પ્રયોજન સાથે તેમણે નોકરી છોડી. વિવિધ અખબારોમાં મુક્ત રીતે લખતા રહ્યા. થોડાં વર્ષો જીવનસાથી અનિતા જતકર સાથે 'અમદાવાદ ટુડે' સાપ્તાહિક અને 'સંગોષ્ઠિ ફીચર્સ એજન્સી'નું સંચાલન કર્યું. 1999થી 2013 સુધી, ચૌદ વર્ષ તેમણે અમેરિકાથી પ્રકાશિત થતા સાપ્તાહિક 'ગુજરાત ટાઇમ્સ'માં મનવાસ ભોગવ્યો. અહીં તેમણે પત્રકાર, પૂર્તિ-સંપાદક અને નિવાસી તંત્રી તરીકે ફરજ બજાવી. આદર્શ અને સત્ત્વશીલ સામયિકનું સર્જન કરવામાં તેઓ સફળ રહ્યા. સને 2013થી તેઓ મુક્ત રીતે લેખન કરે છે. ગુજરાતી ભાષામાં તેઓ પૉઝિટિવ પત્રકારત્વના પ્રણેતા ગણાય છે. તેઓ 1990થી સમાજોપયોગી, વિકાસલક્ષી અને વિધેયાત્મક લેખન કરી રહ્યા છે. સોશિયલ મીડિયામાં તેમણે 2013થી પૉઝિટિવ પત્રકારત્વનો પ્રારંભ કર્યો જેને વાચકો તરફથી સુંદર પ્રતિસાદ મળ્યો. તેમનાં પૉઝિટિવ શ્રેણીનાં પુસ્તકો સમાજમાં હકારાત્મકતા પ્રસારી રહ્યાં છે. તેની 55,000 પ્રતનું વેચાણ થયું છે.

Facebook:   / ramesh.tanna.5  
Instagram: https://www.instagram.com/navisavar?i...

#PositiveStorieswithRameshTanna #dadabhagvansatsang #RameshTanna

© All rights reserved with RAA Positive Media Private Limited 2024