Скачать или смотреть ឯកឧត្តមរដ្ឋមន្ត្រីក្រសួងទេសចរណ៍ បង្ហាញថាកម្ពុជាបានត្រៀមរៀបចំបុណ្យធំៗចំនួន២ នៅក្នុងឆ្នាំ២០២៦

ឯកឧត្តមរដ្ឋមន្ត្រីក្រសួងទេសចរណ៍ បង្ហាញថាកម្ពុជាបានត្រៀមរៀបចំបុណ្យធំៗចំនួន២ នៅក្នុងឆ្នាំ២០២៦

ថ្លែងក្នុងវេទិកាជាតិអេកូទេសចរណ៍លើកទី៤ ដែលប្រារព្ធធ្វើឡើងរយៈពេល២ថ្ងៃ គឺថ្ងៃ២៤ និង២៥ ខែវិច្ឆិកា ឆ្នាំ២០២៥ នៅខេត្តសៀមរាប ឯកឧត្តមហួត ហាក់ បានបញ្ជាក់ថា បុណ្យសមុទ្រ នៅឆ្នាំ២០២៦ នឹងត្រូវធ្វើនៅខេត្តកោះកុង។ ប៉ុន្តែវិបត្តិជម្លោះដែលបង្កឡើងដោយប្រទេសថៃ រាជរដ្ឋាភិបាលកម្ពុជាបានសម្រេចថា នឹងមិនប្រារព្ធពិធីបុណ្យនេះទេ។ ឯកឧត្តមបន្តថា បើទោះបីជាមិនមានបុណ្យសមុទ្រក្តី កម្ពុជា ក៏បានត្រៀមរៀបចំបុណ្យធំៗចំនួន២ នៅក្នុងឆ្នាំ២០២៦ គឺបុណ្យភ្នំ និងបុណ្យអេកូទេសចរណ៍។

ឯកឧត្តម ហួត ហាក់ បានមានប្រសាសន៍ថា ប្រទេសកម្ពុជាមានលក្ខណៈអំណោយផលច្រើនយ៉ាងសម្រាប់វិស័យទេសចរណ៍ ដូចជាមានតំបន់រមណីយដ្ឋានប្រវត្តិសាស្ត្រ តំបន់រមណីដ្ឋានទេសចរណ៍ អេកូទេសចរណ៍ជាដើម ដែលតំបន់ទាំងអស់នេះមានលក្ខណៈពិសេសផ្សេងៗគ្នា។ ឯកឧត្តម បន្តថា លក្ខណៈអំណោយផលទាំងអស់នេះ ទាមទារឲ្យមានការផ្សព្វផ្សាយឲ្យកាន់តែទូលាយ ដូច្នេះមន្ទីរទេសចរណ៍ទាំងអស់ត្រូវខិតខំផ្សព្វផ្សាយឲ្យបានខ្លាំង និងអស់ពីលទ្ធភាព។ កម្ពុជាមានតំបន់អេកូទេសចរណ៍ជាច្រើន ដូចជាតំបន់ខ្នងផ្សារ ភ្នំឱរ៉ាល់ គិរីរម្យ ជីផាត អារ៉ែង ពាមក្រសោប សំឡូត ភ្នំត្បែង ភ្នំគូលែនជាដើម ។ នៅក្នុងបរិបទនៃជំងឺកូវីដ១៩ អ្នកទេសចរផ្ទៃក្នុងជាច្រើនបានជ្រើសរើសយកតំបន់អេកូទេសចរណ៍ និងសហគមន៍ទេសចរណ៍ ដែលការណ៍នេះ បានបង្កើនប្រាក់ចំណូលដោយផ្ទាល់ជូនបងប្អូនប្រជាពលរដ្ឋក្នុងសហគមន៍។

សូមជម្រាបថា វេទិកាជាតិអេកូទេសចរណ៍ ជាព្រឹត្តិការណ៍ប្រចាំឆ្នាំដ៏ធំមួយ សម្រាប់វិស័យអេកូទេសចរណ៍ និងទេសចរណ៍សហគមន៍ ដែលមានការចូលរួមពីគ្រប់ភាគីពាក់ព័ន្ធ ទាំងសាធារណៈ ឯកជន អង្គការជាតិ-អន្តរជាតិ និងដៃគូអភិវឌ្ឍ ជាពិសេសសហគមន៍ទេសចរណ៍ និងអេកូទេសចរណ៍នៅទូទាំងប្រទេស។
តាមក្រសួងទេសចរណ៍ វេទិកាប្រចាំឆ្នាំនេះ នឹងបើកឱកាសសម្រាប់ការបង្ហាញអំពីលទ្ធផលការងារ ពាក់ព័ន្ធនឹងសហគមន៍ទេសចរណ៍ និងអេកូទេសចរណ៍ ការលើកឡើងពីបញ្ហាប្រឈម និងការពិភាក្សាដាក់ចេញជម្រើសដំណោះស្រាយ និងយុទ្ធសាស្ត្រនានា ក្នុងស្មារតីចែករំលែក ចូលរួម និងទទួលខុសត្រូវទាំងអស់គ្នា លើការងារអេកូទេសចរណ៍ និងសហគមន៍ទេសចរណ៍។

អត្ថបទ និងរូបភាព ៖ លោក ជា ស្រស់
កែសម្រួល៖ លោក ហាំ ម៉េងហួត