Qodirjon Mamarasulov va Dilfuza Jaloliva o'qigan she'r.

СЕВСАНГ ЮРАГИМНИ СЕВГИН АЗИЗИМ

Хазонга дўнмасдан кўнглим гулзори,
Сўнгига етмасдан умрим баҳори.
Сени маст айласин қалбим ифори,
Севсанг юрагимни севгин азизим.

Суратим ўткинчи, сийратим  ҳавас,
Кўксимда жўш урган зийнатим ҳавас.
Кўзимга термилиб энг сўнги нафас,
Севсанг юрагимни  севгин азизим.

Меҳринг булоғидан умидлар қонсин,
Армону аламлар ўзидан тонсин.
Муҳаббат гулхани бағримда ёнсин,
Севсанг юрагимни севгин азизим.

Қароқлар таржимон, нигоҳлар кўприк,
Исмсиз туйғулар-гувоҳлар кўприк.
Ҳар ожиз бандаси дил билан тирик,
Севсанг юрагимни севгин азизим.

Кўзимдан бахт бўлиб оқиб кетмагин,
Озорлар ўтида ёқиб кетмагин.
Дарди йўқ гулларга боқиб кетмагин,
Севсанг юрагимни севгин азизим.

Ҳаловат-ҳалолдан топган нонимиз,
Биз билан кетмагай бойлик,шонимиз.
Токи омон экан танда жонимиз,
Севсанг юрагимни севгин азизим.

Севсанг юрагимни севгин азизим.

                        НИЛУФАР ТОҲИРОВА