اخوان منيا قصيدة مهداة لـ متعب ناصر الجلال

مبطي من السجة مع الهاجس ومن صمخ البيوت
اللي على مركاي اصخرها ماهيب مقوله

وساعة طرالي متعب الجلال حرّمت السكوت
وغنّيت درّه في شغاميم الرجال مطوله

يا عيال عمي والعلم مرفوع بالحق الثبوت
حنا السهول اللي لنا فوق المنازل منزله

شوي .. وندير الامور المفصليه بالريموت
واللي ضمن صادق معزتنا ضمن مستقبله

يا اخوان منيّه والهوى يطرخ شراع الجيلبوت
حنا مغن الطيب والصيت القوي حنا هله

تقدموا لين المتون تكل .. وتحفي السبوت
متعب يمثل طيبين الخامسه ونمثله

مواقفه في ربع قرن موثقه صوره وصوت
كنها على شاشات تخليد الزمان مسجله

اليا لبس له بشت زاد السعر في سوق البشوت
واليا مسك منصب تجمل فيه .. قبل يجمله

ودك تشيل اسمه وتكتب في البطايق والكروت
الشيخ ابو تم وعلى خشمي وحاضر وازهله

في وقفته .. ثقل المطوع فالصلاه وفالقنوت
وفي فزعته للموقف الغصّاب خفه وعجله

احدن نماريبه ليا نادوا على صكة بيلوت
واحدن نماريبه ليا كبرت وصكة مشكله

للعز يا راس سهلي ٍ ما تقفّاه الشموت
معرّبٍ مجناه وزحول العرب ما تجهله

اليا تعزوى في سهل قاموا له كبار البخوت
و اليا تعزوى في خواله حرب قامت زلزله

مثل ماتفخر صفوة الويلان في الشيخ محروت
نفخر في ابن جلال سقم الكايده والمعضله

والصوت اماانه والامانه في صدور الناس قوت
تغذي الاخلاق والذكر العطر والمرجله

والعز موقف والمواقف ماتضيع ولاتموت
لو هي تضيع ان كان مافي الناس راع الاوله

نشره على اللي يدخل القاعه ولا يعطيه صوت
وش عذره من الطيب لامن قيل من صوت له ؟