Mialy Rajoelina nandray ny Ladies Makis 17 09 2024

Noraisin’ny vadin’ny Filoham-pirenena, Mialy R. Rajoelina, ny 17 septambra 2024, tao amin’ny lapan’Ambohitsorohitra, ireo Ladies Makis izay handray anjara amin’ny fiadiana ny ho tompondaka eran-tany ho an’ny vehivavy mpialalao rugby (WXV3) izay hatao any Dubai. Amin'ny maha renim-piahy 'ity ekipa ity dia nanome ny tso-dranony sy ny fanohanany eo amin’ny lafin’ny filan'izy ireo hanomanana izany lalao maneran-tany izany.
« Miezaka tsy mitsahatra misongadina eo amin’ny tontolo iainany ny vehivavy. Ny fanatanjahan-tena, raha ny marina, dia iray amin'ireo dingana hafahantsika manasongadina ny talentantsika amin'ny maha-vehivavy antsika ». Io no hafatra nampitain’ny Première Dame, Mialy R. Rajoelina, ho an’ireo mpilalao malagasy ao amin’ny rugby vehivavy ekipa miisa 15, dia Ladies Makis. Amin’ny maha renim-pihahy ireto Ladies Makis ireto azy, dia tsy vitan’ny hoe nanome tsodrano azy ireo izy fa nanolotra tohana ara-bola ihany ko aizy, amin’ny fandraisan’izy ireo anjara amin’ny Fifaninanana WXV 3, hatao any Dubai ny 27 septambra ka hatramin’ny 21 oktobra 2024.
« Ity dingana lehibe ity dia porofo fa tsy fanaka malemy mihitsy vehivavy, araka ny feo ren-tsika matetika. Nasehonareo fa amin'ny fifehezana, ny fahavononana ary ny fitiavana, dia afaka ny hahomby amin'ny zavatra rehetra ataonareo eo amin'ny fiainanareo ianareo, ary hahatratra ny tanjonareo. Manohana anareo aho ary matoky anareo ihany koa ».
« Mino aho fa manana finiavana hitondra ny loko sy ny hambom-pon’i Madagasikara ho ambony amin’ity fiadiana ny ho tompondaka an’i Dubai ianareo », hoy Ramatoa Mialy R. Rajoelina. Mitana toerana lehibe eo amin’ny kolontsaina malagasy ny tso-dranon’ny ray aman-dreny, ka noho izany dia adidin’ny vadin’ny Filoham-pirenena no manome azy ireo izany tso-drano izany.
Nanatrika io fotoana io moa ny Minisitry ny Tanora sy Fanatanjahantena, Andriamatoa Moustapha Marson Abdullah, sy ny FIlohan’ny Federasiona malagasin’ny Rugby, Andriamatoa Rakotomalala Marcel
Jeannot RAMAMBAZAFY – www.madagate.org