Скачать или смотреть Ысык-Көлдөгү трагедия: 5-баласын төрөп, каза болгон келиндин жакындары кайрылуу жасашты

Ысык-Көл районунун Чолпон-Ата шаарында 34 жаштагы келин төрөттөн кийин каза болду. Бул факт Ысык-Көл облустук ички иштер башкармалыгы тарабынан да тастыкталды.

Маалыматка караганда, 2025-жылдын 5-сентябрында Ысык-Көл районунун Бостери айылынын тургуну — 1988-жылы туулган Ж.Д. Ысык-Көл райондук ички иштер бөлүмүнө арыз менен кайрылган. Анда жубайы — 1991-жылы туулган Б.Э. 2025-жылдын 5-сентябрга караган түнү Ысык-Көл райондук ооруканасынын төрөт үйүндө каза болгону жазылган.

Арыз Ысык-Көл РИИБдин маалыматтарды каттоо электрондук журналына киргизилип, учурда сотко чейинки териштирүү иштери жүргүзүлүүдө.

Ысык-Көл облусунун саламаттык сактоо координатору да Turmush басылмасына аталган окуяны тастыктады. Анын айтымында, келин 39 жумалык боюнда бар болуп, ооруканага кайрылган.

«Бул келиндин 5-төрөтү болгон. Кан басымы көтөрүлүп, шишик пайда болгондуктан абалы оор эле. Ошондуктан кесарево жолу менен төрөт жүргүзүлдү. Операциядан кийин абалы оордоп баштаган. 4-сентябрда Ысык-Көл облустук ооруканасынан гинеколог, кардиолог жана реаниматолог келип, консультация берип, даарылоосун түздөп кетишкен. Ошондой эле Балыкчы шаарынан да реаниматолог жана облустун башкы акушер-гинекологу жиберилген. Алар дагы барып дарылоону оңдоп (коррекция) келишкен. Бирок бардык аракеттерге карабастан, келин 5-сентябрга караган түнү саат 02:40та каза болуп калды», — деди координатор.

Ал кошумчалагандай, учурда соттук-медициналык экспертиза жүргүзүлүп жатат. Ошондой эле атайын комиссия түзүлүп, анын жыйынтыгынан кийин толук маалымат берилет.

Келин кесарево жолу менен уул төрөп, ымыркайдын абалы жакшы экени кабарланды.