Скачать или смотреть ዮናታን አክሊሉ 'በአፍህ ቃል ተያዝክ' የቃል እምነት አስተምህሮ ግምገማ አለማየሁ አየለና ኢዮብ ፈንታው

ዘመናዊው ጴንጤቆስጣዊ እንቅስቃሴ (neo-pentecostalism) የስሕተት ትምህርት በተለያዩ መጠሪያዎች ይታወቃል። ዋናው ግን ቃለ እምነት (word of faith) ነው። የቃል እምነት፥ ወይም ቃል-እምነትም ይባላል። ትርጉሙም እንደ ስሙ ነው፤ አምነን የምናወጣው ቃል መፍጠር ይችላል። እግዚአብሔር እንኳን ቃል ተናግሮ ሲፈጥር ቃሉን ስላመነ ነው ነገሮቹ የተፈጠሩት። ብርሃን ይሁን ሲል ብርሃን የሆነው እግዚአብሔር በቃሉ እምነት ስላሳደረ ነው ይላሉ። አፍንጫቸው ስር ሆኖ የማይታያቸው ግዙፍ እውነት ግን ነገሮቹ የተፈጠሩት እግዚአብሔር ስለተናገረ ሳይሆን ተናጋሪው እርሱ ፈጣሪ የሆነው እግዚአብሔር መሆኑ ነው።

በነዚህ ሰዎች የስሕተት ትምህርት መሠረት፥ እኛም የራሳችንን ዓለም መፍጠር እንችላለን፤ ተናግረን ነገሮችን ወደኛ መሳብ እንችላለን። እኛ የራሳችንን ዕድል ወሳኝ መግነጢሶች ነን። አዎንታዊ ነገር በመናገር ጥሩ ነገሮችን ወደኛ መሳብና መሰብሰብ እንችላለን፤ አሉታዊ ነገሮችን በመናገርም መከራን በላያችን እናከማቻለን ይላሉ። Positive እና negative confession ይባላል።

Name it and claim it ወይም blab and grab ይሉታል። ተናገርና ተቀበል ነው። ተናግረህ ጤና ስለምትሆን የጤንነት ወንጌልም ይሉታል። በሽታ ንስሐ መግባት ያለብን ኃጢአት ነውም ይላሉ። ስለዚህ ታማሚዎች ኃጢአተኞች ናቸው። ተናግረህ ሀብት ስለምትፈጥር የሀብት ወይም የብልጽግና ወንጌልም ይሉታል። ስለዚህ ስሙን በድርብ የጤንነትና የብልጽግና ወንጌል ይሉታል፤ health and wealth gospel። ነገሩ ወንጌል አይደለም፤ ጤንነትና ብልጽግናም የለበትም። ሆኖም በልጻጊዎቹ እነሱ ናቸው፤ የገንዘብ ሰብሳቢዎቹ ናቸውና።

ይህንን የዘመናዊውን ጴጤቆስጣዊና ካሪዝማዊ እንቅስቃሴ አንድ መታወቂያ ካርድ የሚያስሰጠው መጠሪያ የቃለ እምነት (word of faith) እንቅስቃሴ ነው። ከመጽሐፍ ቅዱስ ዐውድ የለቀቁ፥ ከስፍራቸው የተፈናቀሉ ጥቅሶች እየተጠቀሱ ቃሉ ያላለውን በግድ ያስብሉታል። የኛ ቃል የኛ ቃል ነው። ስናነበንበው ብንውል፥ ብናድር፥ ብንሰነብት፥ ብንከርም፥ ብንባጅ ካለመኖር ውስጥ መኖርን አይፈጥርም። ይህ እውነት ቢሆን ኖሮ እኮ፥ እንደ ሐሰተኞቹ ነቢያትና ሐሰተኛ ሐዋርያቱ ብዛት፥ በየቀኑ ስንት አዳዲስ የተፈጠሩ ነገሮችን እናይ ነበር። ግን አናይም። ለምን? እኛ ፈጣሪ አማልክት አይደለንም። አንዳንዶች አማልክት ነን ቢሉም፥ መናፍስት ነን ቢሉም፥ ትንንሽ እግዜሮች ነን ቢሉም፥ በእውነቱ አይደለንም።

የቃለ እምነት ስሕተት ቃል አይደለም፤ እምነትም አይደለም። ቃል ከሆነ የሰዎች ቃል ብቻ ነው። ቃላችን መፍጠር አይችልም ፈጣሪዎች ስላልሆንን። ነገር ግን ቃላችን ጨዋ፥ አዎን ከሆነ አዎን፥ አይደለም ከሆነ አይደለም፥ እውነቱን እውነት፥ ሐሰቱን ሐሰት፥ የሚያንጽ፥ በጨው እንደተቀመመ በጸጋ፥ ለምንናገረው ነገር ተጠያቂዎችና መልስ የምንሰጥበት መሆኑን አውቀን ከንቱውን ሳይሆን እውነቱን የምንናገር፥ ጠንቃቃዎች እንድንሆን ቃሉ ያስተምረናል።

ዮናታን አክሊሉ ከአገራችን የቃለ እምነት የስሕተት አስተማሪዎች አንዱ ነው። ወደ አየር የሚለቀቁት ትምህርቶቹ በጣም በሰላ መቀስ ተከርክመው ስለሚቀርቡ ጠቅላላውን አሳብ ለመጨበጥ እንደ ውኃ ውስጥ ዓሳ ሙልጭልጭ ስለሚሉ አያመቹም። ሆኖም ከስብከቶቹ መካከል የቃለ እምነት ትምህርቱን በወግ በሚያንጸባርቀው በአንዱ ላይ ሁለት ወንድሞች አለማየሁ አየለና ኢዮብ ፈንታው ከመጽሐፍ ቅዱስ አንጻር መርምረውት አጭር ትንተና አቅርበዋል፤ እንዲህ ገምግመውታል።

የቃለ እምነት ስሕተት ቃል አይደለም፤ እምነትም አይደለም። እንጠንቀቅ።

ዘላለም ነኝ።