Скачать или смотреть Hyderabad Mein GHMC Ki Badi Muhim – Electronic Waste Collection Zor-o-Shor Se Jaari

Shehar Hyderabad mein Greater Hyderabad Municipal Corporation ki janib se electronic waste collection ka kaam bade paimane par jaari hai. GHMC ne is silsile mein do roza khaas muhim shuru ki hai, jo 12 January se shuru hui aur aaj 13 January ko bhi collection jaari hai.

GHMC ke mutabiq, sirf 12 January ko ek hi din mein 47 metric ton electronic waste collect kiya gaya. Is electronic waste mein kharab fridge, washing machine, geyser, cooler, ACs, ovens, heaters, water coolers, grinders, TVs, CPUs, computer systems aur dusri electronic cheezein shamil hain.

GHMC ne wazeh kiya hai ke in tamam kharab electronic ashiya ko scientific tareeqe se dispose kiya jayega. In cheezon ko ek markazi centre tak muntaqil kiya ja raha hai, jahan par environmental norms ke mutabiq unhein scientific tareeqe se destroy aur recycle kiya jayega.

GHMC Commissioner R.V. Karnan ne shehriyon se appeal ki hai ke woh is muhim mein badh-chadh kar hissa lein aur apne gharon mein maujood kharab electronic saman ko GHMC ki teams ke hawale karein. GHMC ki teams electronic waste ko collection centres tak pohanchayengi, jahan se disposal ke mukammal intizamat kiye ja rahe hain.

Yeh muhim shehar mein safai aur sehat ke liye nihayat aham hai, kyun ke agar electronic waste ko proper tareeqe se dispose na kiya jaye to is se shadeed pollution phailne ka khatra hota hai. Isi liye GHMC ne plan banaya hai ke tamam electronic waste ko proper aur scientific tareeqe se dispose off kiya jaye, taake Hyderabad clean, green aur healthy shehar bana rahe.

Is muhim ke liye GHMC ne 900 se zyada gaadiyan muqarrar ki hain, jabke shehar ke tamam 300 municipal divisions mein khaas collection counters bhi qaim kiye gaye hain. Shehri apna electronic waste in counters par bhi jama karwa sakte hain.

GHMC ne awaam se ek baar phir appeal ki hai ke agar GHMC ki teams un tak nahi pohanch pa rahi hain, to woh khud in khaas counters par jaakar apna electronic waste jama karwayein aur shehar ko saaf aur mehfooz banane mein apna kirdar ada karein.”

#GHMC
#ElectronicWaste
#Hyderabad
#CleanHyderabad
#GreenHyderabad
#EwasteCollection
#SwachhShehar
#PublicAwareness
#GHMCMission