ឧបនាយករដ្ឋមន្ត្រី កើត រិទ្ធ៖ សំណុំរឿងគ្រឿងញៀន គ្រោះថ្នាក់ចរាចរណ៍ និងអត្រានុកូលដ្ឋាន ត្រូវកំណត់ជា...

ឧបនាយករដ្ឋមន្ត្រី កើត រិទ្ធ៖ សំណុំរឿងគ្រឿងញៀន គ្រោះថ្នាក់ចរាចរណ៍ និងអត្រានុកូលដ្ឋាន ត្រូវកំណត់ជាអាទិភាព សម្រាប់យន្តការដោះស្រាយដោយម៉ឺងម៉ាត់ (Video inside)

(ភ្នំពេញ)៖ លោក កើត រិទ្ធ ឧបនាយករដ្ឋមន្ត្រី រដ្ឋមន្រ្តីក្រសួងយុត្តិធម៌ បានថ្លែងថា សំណុំរឿងចំនួន៣ នឹងត្រូវកំណត់ជាអាទិភាព សម្រាប់យន្តការដោះស្រាយដោយម៉ឺងម៉ាត់បំផុត នោះគឺ សំណុំរឿងគ្រឿងញៀន គ្រោះថ្នាក់ចរាចរណ៍ និងអត្រានុកូលដ្ឋាន។

លោកឧបនាយករដ្ឋមន្រ្តី បានថ្លែងបែបនេះ ក្នុងឱកាសក្រសួងយុត្តិធម៌ រៀបចំសន្និសីទសារព័ត៌មានប្រកាសដាក់ចេញនូវយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ នារសៀលថ្ងៃទី០៩ ខែមករា ឆ្នាំ២០២៤។

លោក កើត រិទ្ធ បានបញ្ជាក់យ៉ាងដូច្នេះថា៖ «បន្ថែមលើយុទ្ធនាការទាំងពីរ ខ្ញុំសូមឆ្លៀតយកឱកាសនេះ ដើម្បីប្រកាសដាក់ចេញនូវវិធានការម៉ឺងម៉ាត់ដាច់ខាត និងគោលការណ៍ ដែលត្រូវប្រកាន់យកចាប់ពីពេលនេះតទៅ សម្រាប់សំណុំរឿងចំនួន៣ប្រភេទ ទី១.​សំណុំរឿងក្តីគ្រឿងញៀន ទី២. សំណុំរឿងក្តីទាក់ទងនឹងគ្រោះថ្នាក់ចរាចរណ៍ និងទី៣. សំណុំរឿងក្តីពាក់ព័ន្ធនឹងអត្រានុកូលដ្ឋាន»។

លោកបន្តថា ការងារអាទិភាពទាំងនេះ គឺប៉ះពាល់ផ្ទាល់ជាមួយប្រជាពលរដ្ឋ ប្រជាពលរដ្ឋរងគ្រោះផ្ទាល់ ហើយដែលត្រូវទទួលយកការទទួលខុសត្រូវខ្ពស់មួយ ចំពោះមុខប្រជាជនចំពោះការដោះស្រាយបញ្ហាប្រឈមទាំងនេះ ប្រកបដោយភាពម៉ឺងម៉ាត់ និងដាច់ខាត។

ជាមួយនឹងការប្រកាសដាក់ចេញនូវវិធានការម៉ឺងម៉ាត់ និងគោលការណ៍ត្រូវប្រកាន់យក សម្រាប់សំណុំរឿងទាំង៣ លោកឧបនាយករដ្ឋមន្រ្តី បានលើកឡើងថា៖

* ទី១ ករណីគ្រឿងញៀន៖ បញ្ហាសន្តិសុខ ជាពិសេសបញ្ហាគ្រឿងញៀន គឺស្ថិតនៅក្នុងវិធានការគន្លឹះទី៤ របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលសម្តេចបានប្រកាសដាក់ចេញនៅក្នុងកិច្ចប្រជុំគណៈរដ្ឋមន្ត្រី លើកទី១។ នេះវាគឺជាគំនិត មិនត្រឹមតែបង្កគ្រោះថ្នាក់ប្រជាជន សន្តិសុខសាធារណៈប៉ុណ្ណោះទេ ប៉ុន្តែវាបំផ្លាញធនធានមនុស្សនៅកម្ពុជា។ អ្វីដែលក្រសួងអាចធ្វើបាន គឺសាលាជម្រះក្តី និងអង្គការអយ្យការអមសាលាជម្រះក្តី ត្រូវរៀបចំនូវសេចក្តីប្រកាសព័ត៌មាន ដើម្បីបង្ហាញពីតម្លាភាព នៅក្នុងចំណាត់ការរឿងក្តីគ្រឿងញៀន នៅគ្រប់ដំណាក់កាលទាំងអស់នៃនីតិវិធី ទាំងនៅដំណាក់កាលអយ្យការ ទាំងនៅដំណាក់កាលស៊ើបសួរ ទាំងនៅដំណាក់កាលជម្រះ។ (ឧទាហរណ៍) ឥលូវ គ្រឿងញៀនចាប់ពីកម្រិតណាមួយទៅ ដែលនឹងឯកភាពជាមួយអាជ្ញាធរជាតិថា ពេលដែលបញ្ជូនមកដល់ព្រះរាជអាជ្ញា ពេលដែលព្រះរាជអាជ្ញាកាន់រឿងក្តីហ្នឹង ពេលដែលគាត់ចាត់ការចោទប្រកាន់ ឬក៏យ៉ាងម៉េច សុំឲ្យគាត់ធ្វើសេចក្តីប្រកាសព័ត៌មានមួយ ថារឿងក្តីគ្រឿងញៀនេះ បញ្ជូនមក៥នាក់ ដោះលែង៣នាក់ ចោទប្រកាន់ ២នាក់ ពីបទអ្វី យើងនឹងឆែកព័ត៌មាននេះគ្រប់គ្នា។ ដល់ដំណាក់កាល ជំនុះជម្រះ ត្រូវកាត់ក្តីដាក់ពន្ធនាគារប៉ុន្មានឆ្នាំ ហេតុអ្វី? សម្រេចឲ្យរួចខ្លួនប៉ុន្មាននាក់ ហេតុអ្វីឲ្យរួចខ្លួន?

* ទី២៖ សំណុំរឿងគ្រោះថ្នាក់ចរាចរណ៍៖ នៅពេលគ្រោះថ្នាក់ចរាចរណ៍ ជនរងគ្រោះ គ្រួសារជនរងគ្រោះ មានបញ្ហាបាត់ទៅហើយ ប៉ុន្តែបើគាត់រងគ្រោះក្នុងគ្រោះថ្នាក់ចរាចរណ៍ហើយ កុំឲ្យគាត់រងគ្រោះនៅក្នុងនីតិវិធីទៀត។ អីចឹងរឿងហ្នឹងសំខាន់សម្រាប់ដោះស្រាយ អាទិភាពសំខាន់បំផុត គឺសំណង។ ចុះបើរឿងហ្នឹង ស្លាប់ទាំងឪពុកម្តាយ ពេលខ្លះរកលុយធ្វើតែបុណ្យសពក៏ពិបាកដែរ ប៉ុន្តែដើម្បីទទួលបានសំណងត្រូវការពេល៣ឆ្នាំ។ មិនត្រូវឲ្យគាត់រងគ្រោះដោយគ្រោះថ្នាក់ចរាចរណ៍ហើយ ឲ្យគាត់រងគ្រោះដោយនីតិវិធីទៀតទេ។ អ្នកបង្កគ្រោះថ្នាក់ចរាចរណ៍ ត្រូវទទួលខុសត្រូវដោយដាច់ខាត ហើយត្រូវចៀសវាងរឿងមួយ គឺរឿងបុកគេស្លាប់ហើយបង់លុយរួចខ្លួន។ ប៉ុន្តែ សូមប្រើវិធានការបន្ថូរបន្ថយ ប្រសិនបើអ្នកបង្កគ្រោះថ្នាក់ចរាចរណ៍ ហើយចូលសារភាព។ បើបុកគេហើយរត់គេចខ្លួន សូមបញ្ជាក់ថា មិនមែនបទល្មើសតែមួយបទទេ គឺ២បទល្មើស។

* ទី៣ សំណុំរឿងទាក់ទងនឹងអត្រានុកូលដ្ឋាន៖ មកដល់ពេលនេះ ការប្តឹងសំណុំរឿងទាក់ទងនឹងអត្រានុកូលដ្ឋាន មានប្រមាណ ៦ពាន់សំណុំរឿង ស្មើនឹង ២៣ភាគរយ នៃសំណុំរឿងរដ្ឋប្បវេណីទាំងមូល។ អញ្ចឹង គាត់ខុសឈ្មោះបន្តិច ខុសថ្ងៃខែបន្តិច បើតាមច្បាប់ ត្រូវឡើងមកតុលាការ។ សូមស្នើឲ្យសាលាដំបូងទូទាំងប្រទេស ធ្វើការងារតែ ២គត់ គឺលឿន និងត្រឹមត្រូវ៕