Скачать или смотреть អភិបាលខេត្តកំពង់ធំ បានថ្លែងថា វត្តអារាមដើរតួនាទីយ៉ាងសំខាន់ក្នុងសង្គមខ្មែរ ជាទីពឹងពំនាក់, 331-220525

អភិបាលខេត្តកំពង់ធំ បានថ្លែងថា វត្តអារាមដើរតួនាទីយ៉ាងសំខាន់ក្នុងសង្គមខ្មែរ ជាទីពឹងពំនាក់ ជាបង្អែកផ្លូវចិត្ត និងជាកន្លែងសាងនូវបុណ្យកុសល

(កំពង់ធំ)÷ ឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ បានថ្លែងថា វត្តអារាមដើរតួនាទីយ៉ាងសំខាន់ក្នុងសង្គមខ្មែរ វត្តអារាមគឺជាទីពឹងពំនាក់ ជាបង្អែកផ្លូវចិត្ត និងជាកន្លែងសម្រាប់ផ្តល់នូវបុណ្យកុសលគ្រប់បែបយ៉ាង ហើយវត្តអារាមក៏ជាឃ្លាំង ចំណេះដឹង។ ឯកឧត្តមថ្លែងដូច្នេះនៅក្នុងឱកាសដែលឯកឧត្តមនិងលោកជំទាវបានអញ្ជើញជួបសំណេះសំណាលជាមួយប្រជាពលរដ្ឋ ក្នុងពិធីសម្ពោធ ឆ្លងឧបដ្ឋានសាលាធម្មសភា និងសមិទ្ធផលនានានៅក្នុងវត្តក្តីចារ៍ (ហៅវត្តសុជុល) ស្ថិតនៅឃុំផាន់ញើម ស្រុកប្រាសាទបល្ល័ង្ក ខេត្តកំពង់ធំ នៅរសៀលថ្ងៃទី២២ ខែឧសភា ឆ្នាំ២០២៥។

ឯកឧត្តម នួន ផារ័ត្ន បានថ្លែងថា វត្តអារាម គឺជាបណ្ណាល័យ ជាសារមន្ទីរនៃវប្បធម៌អក្សរសាស្ត្រជាតិនៅគ្រប់សម័យកាល ប៉ុន្តែគួរឱ្យសោកស្តាយបំផុត នៅក្នុងរបបប្រល័យពូជសាសន៍ប៉ុលពត វត្តអារាមត្រូវបានគេបំភ្លេចចោល ព្រះសង្ឃដែលជាអ្នកមានចំណេះដឹង ត្រូវបានពួកយង់ឃ្នងចាប់ផ្សឹក សៀវភៅធម៌អាថ៌ ក្បួនច្បាប់ផ្សេងៗ ពាក់ព័ន្ធព្រះពុទ្ធសាសនាត្រូវបានបំផ្លាញខ្ទេចខ្ទី។ បច្ចុប្បន្ននេះ ដោយសារប្រទេសកម្ពុជា ទទួលបានសុខសន្តិភាពពេញលេញ វត្តអារាមបានរីកដុះដាលគ្រប់កន្លែង។ ជាក់ស្តែងវត្តនៅទូទាំងខេត្តកំពង់ធំបានកើនរហូតដល់២៩៧វត្ត និងមានអាស្រម២២កន្លែង ដែលមានព្រះសង្ឃគង់នៅសរុបចំនួន ៣.៧១២អង្គ។

ឯកឧត្តមអភិបាលខេត្តកំពង់ធំ បានបន្ថែមទៀតថា ការណ៍ដែលយើងទាំងអស់គ្នាមានឱកាសរៀបចំពិធីដ៏អធិកអធមនៅពេលនេះ ក៏ដោយសារកម្ពុជារក្សាបាននូវស្ថិរភាពនយោបាយ ជាពិសេសគឺកត្តាសុខសន្តិភាពដែលកើតចេញពីការយកអាយុជីវិតធ្វើជាដើមទុន និងការខិតខំប្រឹងប្រែងរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ក្នុងការសង្គ្រោះជាតិមាតុភូមិ កសាងបាននូវសុខសន្តិភាព និងការបន្តអភិវឌ្ឍប្រទេសជាតិ ក្រោមការដឹកនាំដ៏ស្វាហាប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តម នួន ផារ័ត្ន អភិបាលខេត្តកំពង់ធំ បានអំពាវនាវ គណៈកម្មការអាចារ្យវត្ត ពុទ្ធបរិស័ទចំណុះជើងវត្ត និងអាជ្ញាធរមូលដ្ឋាន សូមចូលរួមថែរក្សាសមិទ្ធផលនានា ដែលបានកសាងរួចនៅក្នុងបរិវេណវត្ត និងរៀបចំបរិស្ថានឱ្យបានស្អាត ដើម្បីឱ្យពុទ្ធបរិស័ទមកគោរពបូជារៀងរាល់ថ្ងៃសីល និងកម្មវិធីបុណ្យទានផ្សេងៗ ព្រោះព្រះពុទ្ធសាសនា ជាសាសនារបស់រដ្ឋ។

សូមបញ្ជាក់ផងដែរថា សាលាឆាន់បានសាងសង់រួចជាស្ថាពរនេះបណ្ដោយប្រវែង៣០ម៉ែត្រ ទទឹងប្រវែង២៥ម៉ែត្រ និងកម្ពស់១៥ម៉ែត្រ កសាងនៅឆ្នាំ២០១៩ រួចរាល់នៅឆ្នាំ២០២៥ផងដែរ។ អត្ថបទលោក ធូ កែវមុន្នី-ពិនិត្យដោយអ៊ុមញឹប។