İSLAM ÖLKƏLƏRİ QARABAĞLA BAĞLI HƏMRƏY OLMALIDIRLAR

Biz nə qədər özümüzü inandırmağa çalışsaq da ki, Dağlıq Qarabağ münaqişəsində dini amil yoxdur, faktlar, xristian dövlətlərinin mövqeləri göz qabağındadır. Dünyanın istənilən münaqişəsində siyasi, dini və etnik amillər də rol oynayır, onları bir-birindən ayırmaq mümkün deyil. Qarabağ Azadlıq Təşkilatının sədri Akif Nağı belə deyib. Bildirib ki, “İslam Həmrəyliyi İli” vasitəsilə islam xalqlarını birliyə səsləmək, onların diqqətini Qarabağ münaqişəsinə cəlb etmək lazımdır.
Mayın 12-dən 22-dək Azərbaycanda keçiriləcək 4-cü “İslam Həmrəyliyi Oyunları” zamanı 57 müsəlman ölkəsinin idmançıları Bakıya gələcəklər. Millət vəkili Elman Nəsirovun fikrincə, bu, təkcə idman oyunu deyil, həmçinin islam xalqlarının siyasi, iqtisadi, mədəni, humanitar sahədə həmrəyliyi deməkdir.
"Qarabağ müharibəsi əlilləri, veteranları və şəhid ailələri" İctimai Birliyinin sədri Mehdi Mehdiyev də hesab edir ki, Azərbaycanda “İslam Həmrəyliyi İli”nin elan edilməsi müsəlman ölkələrinin nəzərini Dağlıq Qarabağ münaqişəsinin həllinə yönəltməyə kömək edəcək.
Qarabağ Azadlıq Təşkilatının təşəbbüsü ilə “İslam Həmrəyliyi və Qarabağ” mövzusunda keçirilən dəyirmi masada da bu mövzu müzakirə olundu. Tədbir iştirakçıları islam ölkələrinin diqqətini Dağlıq Qarabağ münaqişəsinə cəlb etməklə bağlı təkliflər hazırlayaraq, prezident İlham Əliyevə müraciət ünvanlandılar.