💥البيرق المنشور 💥 مهداه الى محمد بن زايد الخيارين ابو لهيمد كلمات حمد نصف الحسا اداء جفران بن هضبان

( 💥البيرق المنشور 💥) مهداه الى الوجيه محمد بن زايد الخيارين ( ابو لهيمد ) كلمات حمد بن نصف الحسا
- اداء جفران بن هضبان - جديد 2024

الابيات ✍🏻

على القمة الي فوقها البيرق المنشور
زبنها الخصيم الي شكى كثرة خصومه

من يمرها محزّن ظهّر خاطره مسرور
تحت ظلها مزبان من كثرت همومه

زبنها من ازحول العرب هيلعً منعور
بعد ما لقى وقته بدا يرسل سهومه

وانا في رجا الله كان شفت الزمان يدور
عليه اتكل والعبد يرضى بـ مقسومه

ليا من لحقني من عنا الوقت ظلم وجور
انا راضي بحكمه لو الدار محكومه

وانا شاعرً مانيب متغطرس ومغرور
امثل ربوعي و أصل الصعب وارومه

لو الطيب ذنبي جعل ذنبي ماهو مغفور
وش الرجل لاخلى عوايدْه وسلومه

على طاري القمة طرالي سليل صقور
عن الهون ودروب الردا يبعد الحومه

اذا مر طاريّه اشوّش بدون اشعور
وانا اعرف فرق الحر الاشقر من البومه

وانا اعرف كل طيّب لو انه ماهو مشهور
علامات طيب الشخص فالوجه مرسومه

على كثر ماتحوي قطر من فلل وقصور
محلّه فرق من طيبه وقوة عزومه

مايحتاج اوصف لك ولا تلف ولاتدور
محله مشرّع والدواوين مزحومه

علي الطلاق انه كفو مالحقه قصور
رح انشد وتلقى من يعلمْك بعلومه

لامنه مدحهْ الشاعر ازداد وجهه نور
ولا يقدر الناقد يعاتبْه ويلومه

لأنه ذهب صافي يوم ان النحاس يبور
وعلى كبد كل ابخيل خنجرْه مسمومه

هذا والله محمد لاجا للصعايب دور
يحل الدعاوي لاهتنى النايم بـ نومه

ابو لهيمد الي فعله امع العرب مخبور
وخيره سوات الوبل من كبد ديمومه

ياكم واحدً قد جاه من دنيّته مقهور
خطيرً عليه شوّي ويشقق هدومه

نتيجة كرم كفه اذا جا له المعسور
لو انْه اصغر القوم يغدي سيّد لـ قومه

وانا بخير وفـ نعمة لو ان فالامور امور
ومن رووس قومً مابها كبرً وزومه

تهيضت يوم اطروك فالمجلس المعمور
بجلسة رجالً كفو والنار مشعومه

حمد بن نصف الحسا

#اكسبلور