រុស្ស៊ីជួបវិបត្តិកង្វះប្រព័ន្ធការពារដែនអាកាសនៅក្នុងប្រទេស ខណៈកំពុងយកទៅដាក់ពង្រាយនៅជុំវិញផ្ទះលោកពូទីន

រូបភាពពីផ្កាយរណបនាពេលថ្មីៗនេះ ចាប់ពីថ្ងៃទី 6 ខែឧសភា បានបង្ហាញថា កងកម្លាំងរុស្ស៊ីបានប្រមូលផ្តុំយ៉ាងហោចណាស់ប្រព័ន្ធការពារដែនអាកាស រយៈចម្ងាយមធ្យម Pantsir-1 ចំនួន7 គ្រឿង យកទៅដាក់ពង្រាយនៅជុំវិញកន្លែងស្នាក់នៅរបស់ប្រធានាធិបតី Vladimir Putin នៅទីក្រុង Valdai តំបន់ Leningrad។
លោក Ruslan Pukhov ប្រធានមជ្ឈមណ្ឌលសម្រាប់ការវិភាគយុទ្ធសាស្ត្រ និងបច្ចេកវិទ្យាដែលមានមូលដ្ឋាននៅទីក្រុងមូស្គូ និងជាសមាជិកក្រុមប្រឹក្សាស៊ីវិល នៃក្រសួងការពារជាតិរុស្ស៊ី (MoD) បានរិះគន់យុទ្ធសាស្ត្រការពារដែនអាកាសបច្ចុប្បន្នរបស់រុស្ស៊ី ដែលផ្តោតតែលើការការពារតែលើគោលដៅមួយៗ។ កាលពីថ្ងៃទី 16 ខែកក្កដា លោកបានអះអាងថា យុទ្ធសាស្ត្រផ្តោតគោលដៅនេះ មិនមានប្រសិទ្ធភាពក្នុងការការពារទ្រង់ទ្រាយធំនោះទេ ព្រោះវាអនុញ្ញាត ឱ្យយន្តហោះគ្មានមនុស្សបើករបស់អ៊ុយក្រែន អាចឆ្លងកាត់តំបន់ការពារ និងវាយប្រហារពីទិសដៅដែលមិនត្រូវបានគ្របដណ្តប់ដោយប្រព័ន្ធការពារដែនអាកាស បានយ៉ាងងាយស្រួល។ យោធារុស្ស៊ីមិនមានប្រព័ន្ធការពារដែនអាកាសធម្មតាគ្រប់គ្រាន់ ដើម្បីការពារកន្លែងសំខាន់ៗទាំងអស់ នៅភាគខាងលិច នៃប្រទេសរុស្ស៊ីនោះទេ សូម្បីតែនៅក្នុងតំបន់ដែលត្រូវបានចាត់ទុកថា មានការការពារបានល្អក៏ដោយ ក៏យោធាកំពុងមានការលំបាកក្នុងការផ្តល់ការការពារ អោយគ្រប់គ្រាន់ សម្រាប់គោលដៅសំខាន់ៗទាំងនេះ។
លោកបានជំរុញឱ្យយោធារុស្ស៊ីប្រកាន់យកនូវវិធីសាស្រ្តទូទៅ ចំពោះការការពារដែនអាកាស អោយស្រដៀងទៅនឹងយុទ្ធសាស្ត្រដែលអ៊ុយក្រែនកំពុង ប្រើប្រាស់ដោយជោគជ័យ ដើម្បីទប់ទល់នឹងការវាយប្រហារដោយយន្តហោះគ្មានមនុស្សបើក Shahed-136/131 របស់រុស្ស៊ី។