صوت العزاوي | كلمات : عبدالمجيد العقيلي شبل العبادل | اداء : جفران بن هضبان

لي ثلاث شهور ناوي شيء مدري ويش ناوي
آتصدد عن لحون الشعر وآحس بـ ندامه

من كثر ماني قريب من الشيوخ اهل الفتاوي
انزعج لاشغّلوا عندي (( حمامه ياحمامه ))

وآتضايق كل ماقالوا هوى نجمٍ سماوي
ودي الطيّب يعيش ويندفن مرفوع هامه

رافعٍ راسي وعز النفس اهم من المناوي
مايدسّ الراس من تحت الثرى غير النعامه

ماكتبت الشعر في من يسحب البشت الحساوي
ولابدى وقت الله الله تسحبه عنك الرخامه

لو يشيل البشت ويثقّل شويّه فـ الخطاوي
الله يشيله ليا ماصارت تشيله عظامه !

لكن ليا جاء لزوم اهل الوفاء مانيب قاوي
عدت عودت من يجيب النصر بعد الانهزامه

وانت يانواف خاويتك وعزالله مخاوي
( قالوا ان المحترم يفرض على الناس احترامه )

في لزومك تبشر بعزك وانا كلي فداوي
دعوتك وصلت وعادل جيت اشارك في مقامه

مامدحت الا من يسمونه بعيد الحراوي
من صدق قلبه مع المولى يبى يصدق كلامه

خلك من اللي ليا كبرت يبى يطيح متساوي
ان سكت قالو علامه وإن هرج قالو علامه

راسٍ ليا كبرت الدعوى يبى يشيل البلاوي
وراسٍ الله يذكره بالخير لاشال العمامه

عشت ياشيخٍ مواقيفه كما العد الرهاوي
يقطنون مطير في جاله ليا حاص الهلامه

زحلٍ ايقدّم للامر ولايجي دون الهقاوي
ياطلال اسمك شهير وفعلك يرد الجهامه

شيخة شداد ومواقيفٍ رواها كل راوي
والقبايل يعرفون اهل الشداد من المسامه

لو رحل ماعقّب الا العز والراس الحماوي
كل يوم جريس في بيته مسوي له كرامه

من عزم ضيفانه ورحّب بهم ماهوب غاوي
الحظيظ اللي يعارضهم بـ ضحكه وابتسامه

ياذوي ميزان يوم ان الجهل له ذيب عاوي
شرّكم مثل الجحيم وخيركم مثل الغمامه

انتم اهل العز والطاله مزبّنت الجلاوي
سعد والله يابني ميزان من كنتو حزامه !

عزوةٍ تطرب من الماضي على صوت العزاوي
( كل قلبٍ به عزوم وكل راسٍ به قرامه )

يامطير اهل القرى وام الجماجم والصداوي
ماخبرنا فيه مجد الا لنا ذروة سنامه

آتذكر شطرٍ يقوله شليويح العطاوي
ومن يقول الحق ويعدّه تعدّاه الملامه

لاغزى خيّالنا يهوي كما الحر النداوي
ومن غزانا مستحيل انه يعوّد بالسلامه ..

والحمايا في بني عمي على كل الدعاوي
لين عيسى يقتل الدجال وتقوم القيامه !!