汪明荃11月開紅館騷答謝歌迷支持 首次聯林家謙黃偉文合作出歌

阿姐汪明荃縱橫歌影視邁向60年，為報答歌迷多年支持，阿姐宣布11月再登紅館開演唱會。喺演唱會記招當日，羅家英亦有現身撐場。演唱會班底陣容強勁，著名服裝設計師陳華國擔任服裝設計，趙增熹擔任音樂總監，Sunny Wong擔任舞蹈總監等，阿姐對團隊非常有信心。

家英哥大讚阿姐以77歲之齡開騷魄力十足，肯定全力支持阿姐。至於家英哥會唔會做嘉賓唱埋一份，阿姐就話家英哥將會上台做一啲嘢，但唔係唱歌。家英哥笑言冇辦法同阿姐一齊跳舞，因為阿姐係跳拉丁，而自己跳嘅話好可能變「拉柴」。

阿姐向來鍾意同後輩合作，新歌《Make My Day》就搵咗林家謙作曲、黃偉文填詞，阿姐就話歌曲同過往風格大為不同，非常輕快。新歌亦喺記招上播出，就連家英哥聽到都忍唔住聞歌起舞。

阿姐雖然笑指家英哥嘅舞姿係大戲動作，並唔係跳舞，不過佢都好收貨。講到點樣促成呢次合作，阿姐就話自己喜歡同新人合作，未同家謙合作過。不過家謙嘅作品要唱都唔易，所以阿姐都覺得自己透過合作而學多樣嘢。至於Wyman就識咗好耐，但都係未合作過，對方一直欠自己一首歌，所以就有呢次合作喇！

#汪明荃 #羅家英 #演唱會 #紅館 #林家謙 #黃偉文 #新歌 #MakeMyDay #個唱

#TVB #娛樂新聞 #TVB娛樂新聞台

#ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0