خل الدعاوي يارفيقي سهالات .. الشاعر سلطان بن نايف الروقي

.
.

خل الدعاوي يارفيقي سهالات
والله ما به شي يجرح ويقهر
ريّح ضميرك لاتفكر فالازمات
الهم لاشلته مع الوقت يكبر
لاتكترث من هرج عاذل وشمات
من كان قد القول فالوجه يظهر
ولاتلتفت لوتسمع اصوات واصوات
واصل ولاتشتاط من حس الاغبر
كثف جهودك وانت قد المهمات
وعانق سما الابداع ياطير واشهر
الناس مايعطونك الا لاجل هات
واكثرهم يشوفون حسنتك منكر
لانك وصلت يلحقونك ملامات
ولانك قدرت وغيرك يقول مقدر
ولانك كسبت يجيك منهم عداوات
ولانك برزت اسمك على كل منبر
ولانك تجاوزت المحن والصعوبات
ولانك شهرت تحط من تحت مجهر
ولانك تعليت الجبال المنيفات
ولانك بعد هذي يحق لك تفخر
افخر وتلقا من يشابهك بالذات
على عيال بليس منته بمجبر
اللي مراجلهم هياط ودعايات
بالكذب والتحريف ماغير مظهر
سلومهم كنها سلوم الخواجات
وسوالفٍ من كثرها صعب تحصر
حنا بوقتٍ فيه حتى العلاقات
من غير وجه لوجه كل يوم تكثر
اغلب علافتنا علاقة قروبات
تسلم ومن يقرا وتعذر وتنذر
الوقت هذا غير عن كل الاوقات
مدري عنه واللي على قوله اقدر
عش مابقا لك واغتنم كل مافات
العمر مثل الظل لو طال يقصر
احفظ مواجيبك وصل الصلاوات
لاضاق بك وقتك قل الله اكبر
باقي العلوم ان كان راحت ولن جات
سهله ولو كبرت تعوّد وتصغر