ឯកសារដ៏កម្រ​នៃព្រះពិធីមង្គលការ ព្រះអង្គម្ចាស់ក្សត្រី ស៊ីសុវត្ថិ អូឡារី និងលោក គី សុទ្ធ ឆ្នាំ១៩៦២

នេះជាឯកសារដ៏កម្រដែលកន្លងមកមហាជនធ្លាប់បានជ្រាបរួចហើយថា អធិរាជសំឡេងមាសដ៏ល្បីល្បាញអស្ចារ្យនៃយើង កម្របង្ហាញវត្ថមានតាមពិធីមង្គលការនានាណាស់ សូម្បីតែក្នុងពិធីសមាជជាតិក៏កម្រនិងបានឃើញរូបលោកដែរ។ តែជាសំណាងដ៏វិសេស នៅក្នុងភាពយន្តឯកសារលក្ខណៈឯកជន ព្រះអង្គម្ចាស់ក្សត្រី អូឡារី អាចរក្សាហ្វីលនេះបានយ៉ាងល្អ ដោយព្រះអង្គបានយកចេញពីប្រទេសកម្ពុជាតាំងពីពាក់កណ្តាលទសវត្ស៦០ នៅពេលព្រះអង្គធ្វើដំណើរតាមស្វាមីទៅបំពេញបេសកកម្មការងារនៅក្រៅប្រទេស។

ក្រោយពីក្រុមព្រះសុរិយា ព្យាយាមស្រាវជ្រាវស្វែងរកព្រះអង្គម្ចាស់ក្សត្រី បន្ទាប់ពីបានដំណឹងថា ស្តេចគង់ព្រះជន្មនៅឡើយនោះ នាសហរដ្ឋអាមេរិក។ មិនយូរប៉ុន្មាន ក្រុមព្រះសុរិយាក៏បានថ្វាយបង្គំគាល់ព្រះអង្គដូចបំណង។ ក្នុងជំនួបដ៏រំភើប និងប្រកបដោយព្រះហឬទ័យរីករាយព្រះអង្គម្ចាស់ក្សត្រីដែលសព្វថ្ងៃព្រះអង្គមានព្រះជន្ម ៧៩ព្រះវស្សា មានបន្ទូលយ៉ាងកក់ក្តៅ និងប្រកបដោយព្រះសញ្ចេតនារំភើប។ នៅក្នុងពេលនោះ ព្រះអង្គម្ចាស់ក្សត្រី ក៏សព្វព្រះទ័យប្រទានហ្វីលឯកសារនៃព្រះពិធីមង្គលការរបស់ព្រះអង្គមកកាន់ក្រុមព្រះសុរិយា ដើម្បីរក្សាទុក និងផ្សព្វផ្សាយបន្ត ដោយព្រះអង្គម្ចាស់ក្សត្រី ស្តេចព្រះអនុញ្ញាតសិទ្ធិត្រឹមត្រូវ។

ព្រះអង្គម្ចាស់ក្សត្រី បានរំលឹកថា ព្រះអង្គរក្សាទុកហ្វីលឯកសារមង្គលការនេះអស់រយះពេលជាង៥០ឆ្នាំមកហើយ ដោយវាជាវត្ថុអនុស្សាវរីយ៍ដ៏មានតម្លៃកាត់ថ្លៃពុំបាន។ ព្រះអង្គក៏មានបន្ទូលរំលឹកថា កាលនោះលោក ស៊ីន ស៊ីសាមុត តែងតែមកច្រៀងក្នុងពិធីតូចធំទាំងឡាយសម្រាប់ក្រុមគ្រួសារព្រះអង្គ ដោយព្រះបិតាព្រះអង្គម្ចាស់ក្សត្រីមានទំនាក់ទំនងយ៉ាងជិតស្និទ្ធិជាមួយលោកផ្ទាល់។

ក្រុមព្រះសុរិយាសូមថ្លែងអំណរព្រះគុណយ៉ាងជ្រាលជ្រៅបំផុត ថ្វាយចំពោះ ព្រះអង្គម្ចាស់ក្សត្រី និងក្រុមគ្រួសារដែលមានព្រះហឬទ័យគោរពស្រឡាញ់ ពេញចិត្តសកម្មភាពក្រុមព្រះសុរិយា ហើយបានផ្តល់ឯកសារដ៏មានតម្លៃនេះមកកាន់ក្រុមព្រះសុរិយាផងដែរ។ ក្រុមព្រះសុរិយាសូមថ្វាយព្រះពរជ័យសព្វសាធុការ ថ្វាយព្រះអង្គម្ចាស់ក្សត្រី សូមស្តេចមានព្រះសុខភាពល្អ ជួបតែព្រះពុទ្ធពរទាំងបួនប្រការ និងព្រះជន្មាយុយឺនយូរ។