رجعلك قليبي المهضلم مع الجميل العواد محمد عبدالوهاب من أغاني مصطفى سيد أحمد كلمات القدال

رجعلك قليبي المهضلم
كلمات محمد طه القدال

رجعلك قليبي المهضلم يراجع صنوف الغناوي العصية
يراجع معاك الكلام القبيل استباك
الكلام المبهرج وخاوي
الكلام المزيف
ولا فيه غير احتلام وانفصام
تموت الحروف يوم تقوم القصائد
مقام الطبول والبخور
بشوفك جرايد شواكر حوامد
ولا هامى فيها
عليها المصائب تمام التمام
مغايص بتفرم حشاها
وغبائن بتنفخ بطون البسفو التراب
وحايح لهيب تلهلب وتكوى الجلود
أتف القصائد
إذا ما القصائد دايرة ليك البُكا
البِصاحب..رضا..السردار
وأتف القصائد إذا ما القصائد
بتنزل مُريده وتسبح بحمد الذي
ابتلاك وهداني الودار
طِريتك وأنا الكنت قايل خيالك معشعش جواي
سكنتك وما لاقي فِجة
اخيرلك أقول الكلام البيحرق حشايا
اخيرلك أفضفض جراب الخبايا
أقول الكلام البفكفك سوارك
يوقف جدارك ويرفع عضايا
تضيع الرموز التغطى الكلام
أقول السكاكر أبتنى ورمتني وكفانا
أقول العساكر تبارى الكباري
وتفتش قلوب الجهال الشلوخهم هوية
واغني الزيود والكنانة
كضب..
أقول البنات البفتحن صدورهن يقالدن رشاشك ويخلن حبيبهن
كضب..
مراحك يعشى ويفشى
خضارك مرطب يندى الضهاري
ترابك...دخن لو رزعتو الحجارة
بلادك ولادك كروها السحالي
تسفر سعيتك تقنب تبارى
الجداد العقالى
تجوع يا البشدّر خريفك
سوافى البطانة
ويمّطر رزازك عزازا حصايا
وقموحك سنابل مشاط كردفاني
أبيت الكلام المغتغت وفاضي
وخمج
ولادك قصادك شعاع التحايا
يضوّوا الشقوق التلم الدوابى
يوروا الدروب للقلوبهم عمايا
عرقهم حبالك
وصوتهم مشانق
تلم الدقون الكبيرة
وتحدر فقر سمّنتها الليالي الضليمة
بتهدر حرائق وتحمى البياكلوا المطايب
وتسجن بطون الجياع العرايا
وشوشهم سمر حر اباطك

صفوفهم مرامك وحلمك حلمهم
رغيفة وكرامه وسلامه
مصانع بتحرق قبل تبدأ فيها
مزارع بتيبس ونيلك ممدد جنازة
وعقيدك وسيدك بيكتب ويمحى
وتبق المحيا...

إشترك وفعل الجرس ليصلك كل جديد