Скачать или смотреть வ.உ.சி 150ஆவது பிறந்தநாள் விழா 05.09.2021, மாலை 06.30 மணி

வ.உ.சி அவர்களின் பெருவாழ்வு

எதிர்வரும் செப் 5 வ.உ.சி அவர்களின் 150-வது பிறந்த நாள்.

ரஷ்ய புரட்சி நடப்பதற்கு முன்பே ஆயிரக்கணக்கான தொழிலாளர்களை திரட்டி, இந்திய துணை கண்டத்திலேயே தூத்துக்குடி கோரல்மில் தொழிலாளர் வேலை நிறுத்த போராட்டத்தைவெற்றிகரமாக நடத்தி, துரோகங்கள், கீழருப்புகள், அடுக்குமுறைகள் அத்தனையையும் எதிர்கொண்டு தொழிலாளர் கோரிக்கையை வென்றெடுத்தவர் வ.உ.சி.

அந்த தீரமிக்க போராட்டத்தின் வீரத்தையும், போராட்டம் தொய்வடைந்து விடாமல் தொழிலாளர் குடும்பங்களுக்குமக்களிடம்இருந்து நிதி திரட்டியும், தனது செல்வத்தை கொடுத்தும் உணவளித்த வ.உ.சியின் செயல் உத்தியையும் வெளிநாட்டு இதழ்களும் வியந்து போற்றின.

இந்தியாவிலேயே இரட்டை ஆயுள்தண்டனை விதிக்கப்பட்ட முதல்
விடுதலைப் போராளி வ.உ.சி.

இன்றைக்கு நூறு ஆண்டுகளுக்கு முன்பு பெண்ணுரிமை பேசப்படாத காலத்தில், பெண்ணுரிமைபேசவும் செயல்படவும் செய்தவர் வ.உ.சி.

திருமணமான அன்றே தான் சாப்பிட்ட எச்சில் இலையில் சாப்பிட கூடாது என தனது மனைவியிடம் சத்தியம் வாங்கியவர்.

கணவன் - மனைவி இதில் யார் அறிவுள்ளவர்களோ, அவர்களே குடும்பத்தை வழிநடத்த வேண்டும் என்றவர் வ.உ.சி. தனது மனைவியை உயிர் துணை என்றே வ.உ.சி குறிப்பிடுவார்.

இன்றைக்கே சாதி உணர்வு தலை விரித்தாடுகிறது. நூறு ஆண்டுகளுக்கு முன் எப்படி இருந்திருக்கும்?

சாதி உணர்வு மேலோங்கி உள்ள வேளாளர் தெருவில் உள்ள தனது இல்லத்தில், பார்வையற்ற - தாழ்த்தப்பட்ட சமூகத்தை சேர்ந்தவரை தங்க வைத்து பராமரித்தவர் வ.உ.சி. அவரின் உயிர் துணைவர் பார்வையற்ற மனிதருக்கு தன் கையால் உணவு ஊட்டி விட்டவர்.

அன்னிய ஆதிக்கத்தை அசைக்கும் விதமாக பல்வேறு தளங்களில்
வீச்சோடு செயல்பட்டவர் வ.உ.சி.

யாரும் நினைத்துக் கூட பார்த்திராத கப்பல் நிறுவனம் நடத்தி
வெள்ளையர்களுக்கு சவால் விட்டவர்.

கோரல்மில் தொழிலாளர் போராட்டத்தை வீச்சுடன் நடத்தி தொழிலாளர் வர்க்கத்திற்கு வழிகாட்டும் ஒளி கொடுத்தவர்.

சிறை மீண்ட பின்பு, வழக்கறிஞர் தொழில் பறிக்கப்பட்டு, வளமான செல்வங்களை இழந்து வறுமையில் உழன்ற நிலையிலும் திரு.வி.க - சர்க்கரை செட்டியார் போன்றோர்களுடன் இணைந்து இரயில்வே தொழிலாளர் சங்கம், பஞ்சாலை தொழிலாளர் சங்கம், பின்னி மில் தொழிலாளர் சங்கம் அமைத்தவர் வ.உ.சி.

கூட்டு பண்ணைத் திட்டம், கூட்டு சிறு பொருட்கள் உற்பத்தி திட்டம் போன்றவற்றை வலியுறுத்தி தற்சார்பு வாழ்வியலை பேசியவர் வ.உ.சி.

சிதம்பரனார் திலகரை தனது அரசியல் குருவாக ஏற்றுக் கொண்டவர். ஆனால் திலகரின் சமூக, மத செயல்பாடுகளை ஏற்றுக் கொண்டவர் அல்ல.

திலகர், மராட்டியத்தில் பிள்ளையார் வழிபாட்டை இயக்கமாக முன்னெடுத்து சென்ற போது வ.உ.சி அதை ஆதரித்து பேசவோ எழுதவோ பரப்பவோ இல்லை.

ஆனால் பாரதியார் அதை பாராட்டிப் பேசவும் எழுதவும் செய்தார் என்பதை கவனத்தில் கொள்ள வேண்டும்.

தமிழர்களின் வாழ்வு தமிழ் மண்ணின் பண்பாட்டில் தோய்ந்து மலர வேண்டும் என்பதில் வ.உ.சி தெளிவாக இருந்ததல்லாமல் அதற்காக ஏராளமாக எழுதியும் பேசியும் ஓயாது இயங்கினார்.

தமிழ் சித்த மருத்துவ சாலைகள் ஊருக்கு ஊர் நிறுவப்பட வலியுறுத்தினார்.

திருக்குறளை வாழ்வியல் நெறியாக கொள்ள வேண்டும் என பரப்புரை
செய்தார்.

சமூக - அரசியல் - வேலை வாய்ப்பு தளங்களில் பிராமண மேலாதிக்கம் ஒழிக்கப்பட்டு வகுப்பு வாரி பிரதிநிதித்துவம் அனைத்து நிலைகளிலும் ஏற்படத்தப்பட வேண்டும் என குரல் கொடுத்தார்.

வர்ண ஒடுக்குமுறைக்கு எதிராக இயங்கியவர்கள்,
வர்க்க ஒடுக்குமுறைக்கு எதிராக இயங்கவில்லை.
வர்க்க ஒடுக்குமுறைக்கு எதிராக இயங்கியவர்கள்,
வர்ண ஒடுக்குமுறைக்கு எதிராக இயங்கவில்லை.
வர்க்க - வர்ண ஒடுக்குமுறைக்கு
எதிராக இயங்கியவர்கள்,
அன்னிய ஆதிக்க ஒடுக்குமுறைக்கு
எதிராக இயங்கவில்லை.
வர்ண ஒடுக்குமுறை
வர்க்க ஒடுக்குமுறை
அன்னிய ஆதிக்க ஒடுக்குமுறை
இவற்றையெல்லாம் ஒருசேர எதிர்த்து,
தனது காலமெல்லாம் களமாடியவர்தான் வ.உ.சி.

ஒத்துழையாமை இயக்கத்தின் முன்னோடி வ.உ.சியே என்று எழுதினார் கல்கி. நாடு விடுதலை அடைந்தவுடன், தமிழ்நாட்டிற்கு தேவை காந்தியமோ-நேருவியமோ - பட்டேலிய மோ அல்ல. வ.உ.சியமே என்று எழுதினார் திரு.வி.க.

வெள்ளையர் ஆதிக்கத்திலிருந்து தம்மை விடுவித்துக் கொள்ளும் இந்திய விடுதலைக்காக பாடாற்றினார் வ.உ.சி. ஆனால் அவர் கனவு கண்ட இந்தியா தேசிய இனங்களின் சமத்துவ இந்தியா.

எந்த அடக்கு முறை என்றாலும் அதை எதிர்த்து முன் ஒலிக்கும் வ.உ.சியின் பெரும் குரல், இன்றைக்கு இருந்தால் தமிழ்த் தேசிய இனத்தின் போர் குரலாக ஒலிக்கும் என்பதில் அவர் வரலாற்றை
ஆழப் படிக்கும் எவருக்கும் ஐயமிருக்காது.

வளமான வாழ்வு பறிபோய், அடக்கு முறைக்கு ஆளாகி, அடுக்கடுக்கான துன்பங்கள் தொடர்ந்த போதும் தான் ஏற்றுக் கொண்ட குறள் நெறியில் பிறழாமல் பெருவாழ்வு வாழ்ந்த வ.உ.சி என்ற பெருமகனின்
வீரமும்
ஈகமும்
அஞ்சாமையும்
இன்று
சுரண்டபட்டுக் கொண்டிருக்கும்
தமிழ் மண்ணின் இளையோர்களிடம்
சென்று விட்டால் அது விடியலின்
வேகத்தை வேகப்படுத்தும்.

தமிழர்களுக்கான போர்ப்பறை சாதி வட்டத்தில் முடங்கிவிடக் கூடாது.
ஆதிக்க எதிரிகள் கை கொள்ள அனுமதிக்க கூடாது.

ஈகம் என்னவென்று
அறிய வேண்டுமா ?
"தூத்துக்குடி சிற்பியை பார்
அடுத்து
சயனைடு குப்பியை பார்"
எனச் சரியாக அடையாளம் காட்டினார்
நம் பொதுச் செயலாளர்
கவியருவி அப்துல்காதர்.

வ.உ.சி எனும் பெருநெருப்பை தமிழர்கள் கையிலேந்த வேண்டியது வரலாறு அளித்திருக்கும் வாய்ப்பு.

தமிழியக்கத்தின் நிறுவனர் - தலைவர் வேந்தர் கோ. விசுவநாதன் அவர்கள் தலைமையில் 05.09.2021 மாலை 06.30 மணிக்கு நடைபெறவுள்ள செக்கிழுத்த செம்மல் வ.உ.சி 150ஆவது பிறந்தநாள் விழாவில் தமிழர்கள் அனைவரும் இணைந்திட அன்போடு வேண்டுகிறோம்.