Скачать или смотреть ქუთაისში ოლიმპიური საცურაო აუზის სამშენებლო სამუშაოები დასრულდა

საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა ქუთაისში ოლიმპიური საცურაო აუზის სამშენებლო სამუშაოები დაასრულა.

თანამედროვე, ოლიმპიური სტანდარტის საცურაო აუზის სიგრძე 50 მეტრი, ხოლო სიგანე 25 მეტრია. აუზის კომპლექსში მოეწყო 600-მდე მაყურებელზე გათვლილი ტრიბუნა, მცირე საბავშვო აუზი, სავარჯიშო დარბაზები, გასახდელები სპორტსმენებისა და მსაჯებისათვის, სივრცეები კვებისა და სპორტული ინვენტარის მაღაზიებისათვის.

„დასრულდა ქუთაისის ოლიმპიური აუზის მშენებლობა და თანაც, ძალიან მალე. ტესტირებების დასრულების შემდეგ, გვექნება ღირსეული სივრცე, სადაც ბავშვები, მოზარდები, პროფესიონალი სპორტსმენები და ზოგადად, სპორტის მოყვარულები შეძლებენ თანამედროვე სტანდარტის პირობებში ვარჯიშს, როგორც აუზებზე, ისე ფიტნეს დარბაზში. აუზი განკუთვნილია, როგორც ცურვისთვის, ისე წყალბურთის და სინქრონული ცურვის ღონისძიებებისთვის. აბსოლიტურად ყველა აღჭურვილობა უკვე მოწოდებულია და ამჟამად მიმდინარეობს მონტაჟი და ტესტირება, რომელიც ძალიან მალე დასრულდება“- განაცხადა რეგიონული განვითარებისა და ინფრასტრუქტურის მინისტრმა, ირაკლი ქარსელაძემ, ქუთაისში, ახალი ოლიმპიური აუზის დათვალიერების შემდეგ

ოლიმპიური აუზის შენობა აღჭურვილია თანამედროვე საინჟინრო ქსელებით, საფილტრაციო და სატუმბი სადგურებით, გათბობის, გაგრილების და სახანძრო სისტემებით.

აუზის გარე ტერიტორიაზე მოეწყო პარკინგი და გარე კაფე.

ახალი აუზით სარგებლობას შეძლებენ როგორც მოყვარულები, ისე სპორტსმენები საწყლოსნო სპორტის სხვადასხვა სახეობაში. ოლიმპიური აუზი მოემსახურება ადგილობრივ და საერთაშორისო სპორტულ ღონისძიებებსაც.

აუზის ინფრასტრუქტურა ადაპტირებულია შეზღუდული შესაძლებლობების მქონე პირთათვის.

ამჟამად, სრულდება საცურაო აუზის აღჭურვა და მიმდინარეობს მისი ტესტირების პროცესი.

ქუთაისში ოლიმპიური აუზის მშენებლობა 2021 წლის აპრილში, აზიის განვითარების ბანკის (ADB) 13.6 მილიონი ლარის ფინანსური მხარდაჭერით, დაიწყო.