Скачать или смотреть Hita La'mon na Vlog (Chamorro Vlog) #9: Na'mañao na Estoria

English subtitles option available. Click CC in the settings.

Buenas yan saludo para todus hamyu guennao huyong. Guahu i amigon-miyu, i che’lun-miyu, yan i besinon-miyu as Cody San Nicolas Lizama.

Dispensa na atrasao yo' mamega bideo lao ha tane' yo' i eskuela-ho diddide'

Gi Ma’pos na mes, meggai na taotao ma silelebra I Halloween na holiday kada sakkan man e’egga’ na’mañao na movie pat show. Para hita ni man Chamorro, ya-ta umestoria yan guaha meggai na estoria-ta siha ni man na’mañao. Pues para este na vlog malago’ yu’ umestoriayi hamyu ni un estorian i tata-hu bihu as Tomas San Nicolas, familian Ko’, mas ma tungo’-na as Tomas “Machenik”.

Si Tata-hu bihu draiban bas. Ha kokonne' i man marino ginen i base guato gI che'cho'-niha. Meggai biahe mañuñugon para apmam na tiempo ya guaha na tulanoche.Un puengi annai guiya ha’ na maisa gi halom i bus, manunugon gue’ giya Fonte na lugat lao mas ma tungo'-na entre i man hoben komo Snake Road
. Yanggen un tungo’ este na lugat, ti chago i chalan kontra i simenteyon pigo. Esta sen atrasao i ora yan Gof homhom gi hiyong I bus . Taya’ kandit para u ina i chalan fuera di i pilan, i estreyas siha yan i kandet i bas

Mientras manunugon, man li’e’ gue’ kandet gi talo’ i chalan. Sigi manugon ya ha ripara na ahe’ ti uno’ ha’ na kandet lao gi magahet hagas ha' guaha kuattro
. Annai humihot gue’ yan i kandet siha, ha na’para i bus ya tumunok. Ai na frinesko i aire, lao taya’ manglo manguaife. Sumen silensio i lugat. Taya’ buruka, ni katen ga’ga’. Pues lumahihot i kandet siha kontra si bihu-hu ya mas annok pa’go na kuattro na danges estaba ni man ma songge. Ya guaha gi entalo’ i danges siha , un ata’ut ! Ha li’e’ este si Tata-hu bihu, na guaha kuattro na danges ni man ma songge gi uriyan i ata’ut! Dos gi ilu-na yan dos gi patas-na. Un danges kada rinkon i ata’ut. Lao estague hafa muna’luhan si Tata-hu bihu I taya’ kumakatga i danges pat i ata’ut, na mangugupu ha’ gi aire. Nina’fugo si bihu-hu. Taya’ na ha eksperiensia taiguine. Kulan mohon, manlulukao i ata’ut yan i danges siha ginen i simenteyo guato gi halom I pi’ao ni estaba gi kanton chalan.

Pues ha nangga i ata’ut yan i danges krumusa i chalan. Fugo mampos si tata-hu bihu. Pues annai esta malingonnaihon I ata’ut gi pi’ao, humalom gue’ gi bus, ha na’la’la’ i makina ya ma’pos Ti malago’ gue’ tumalak tatte osino u li’e’ ta’lo i ata’ot, ha sen atan mo’na, lao ha hungok na guaha poddong gi hilo’ i atof i bus. Pues ha na’para i bus ya humuyong para u li’e’ hafa I buruka. Ya hafa ha li’e’ ha na’ sen luhan gue’ mas ki ni i ata’ot pat i kuattro na danges. Guaha un koronan flores gi hilo’ i atof i kareta. Pues manugon gue’ chaddedek tatte para I gima’-na sa’ ma’anao.

Siña ta alok na buenti matuhok gue’ ya put i matuhok-ña na manlili’e’ gue’ espiritu. Sa’ guaha na biahe yanggen ti maolek i maigo’-mu pat ti nahong, man lili’e’ hao. Lao sesso di ha sangan si Tata-hu bihu na magahet este na estoria ya taya’ rason-na para u dagi yu’.

Siguru na guaha meggai na estoria taiguine giya hita ni man Chamorro. Yanggen guaha estoria-mu ni malago’ para un patte. Put fabot, comment (fañangane) gi papa’ este na video put hafa un eksperiensia pat hiningok-mu. Si Yu’us ma’ase’ ta’lo ni tiempon-mu ya put fabot saonao guaiya ya un patte este na video. Adios yan Happy Halloween.