Скачать или смотреть អ្នកនាំពាក្យក្រសួងការពារជាតិ៖គិតត្រឹមថ្ងៃទី២៧ ខែកក្កដា ការឈ្លានពានរបស់ថៃ ធ្វើឱ្យមានជនស៊ីវិលភៀសសឹក...

អ្នកនាំពាក្យក្រសួងការពារជាតិ៖គិតត្រឹមថ្ងៃទី២៧ ខែកក្កដា ការឈ្លានពានរបស់ថៃ ធ្វើឱ្យមានជនស៊ីវិលភៀសសឹកជាស្ត្រីមានផ្ទៃពោះ ជនចាស់ជរា ជនពិការ និងកុមារ ជាង១៣ម៉ឺននាក់ ជម្លៀសចេញពីលំនៅដ្ឋាន

(ភ្នំពេញ)៖ ថ្លែងក្នុងសន្និកាសែតនាព្រឹកថ្ងៃទី២៨ ខែកក្កដា ឆ្នាំ២០២៥នេះ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារ បានបញ្ជាក់ឱ្យដឹងថា គិតត្រឹមថ្ងៃទី២៧ ខែកក្កដា ឆ្នាំ២០២៥នេះ ជនភៀសសឹកដែលជម្លៀសមកពីទីទួល មកកាន់ទីជម្រកសុវត្ថិភាព និងផ្ទះសាច់ញាតិចំនួន៤ខេត្ត មានចំនួនសរុប ប្រមាណ ៣៩ ៨២៨គ្រួសារ ស្មើនឹង១៣៤ ៧០៧នាក់ ជម្លៀសចេញពីលំនៅដ្ឋាន ក្នុងនោះមានស្ត្រីមានផ្ទៃពោះ ជនចាស់ជរា ជនពិការ និងកុមារ។

លោកស្រីបានថ្លែងបន្តថា លើសពីនេះ ការឈ្លានពានរបស់ថៃ បានធ្វើឱ្យប៉ះពាល់ដល់សាលារៀនជាង៦០០ត្រូវបិទទ្វារ ក្នុងចំណោម៥ខេត្ត ដែលធ្វើឱ្យប៉ះពាល់ដល់សិស្សានុសិស្សជាង១៥ម៉ឺននាក់ និងគ្រូបង្រៀន៦ពាន់នាក់។ ចំណែក ភូមិដ្ឋាន មណ្ឌលសុខភាព សំណង់អគារតូចធំ ស្ថានីយ៍ប្រេងឥន្ធនៈ សាលារៀន ផ្សារ ប្រាសាទព្រះវិហារដែលជាសម្បត្តិបេតិកភណ្ឌពិភពលោក បានរងការបំផ្លិចបំផ្លាញ និងរងការវាយប្រហារមិនរើសមុខរបស់ភាគីថៃ ជាពិសេសគម្រាមកំហែងដល់អាយុជីវិតរបស់ប្រជាពលរដ្ឋស្លូតត្រង់គ្មានកំហុស តួយ៉ាងដូចស្រ្តី និងកុមារជាដើម។

ជាមួយគ្នានេះ ការវាយប្រហាររបស់ភាគីថៃ ក៏ផ្តល់ផលប៉ះពាល់ដល់ប្រជាពលករខ្មែរ ដែលបម្រើការងារនៅប្រទេសថៃ ក្នុងការត្រលប់មកប្រទេសកម្ពុជាវិញផងដែរ។

បើយោងតាមរបាយការណ៍របស់ក្រសួងការងារ បណ្តុះបណ្តាលវិជ្ជាជីវៈ រយៈពេល៥ថ្ងៃចាប់តាំងពីថ្ងៃទី២៤ ខែកក្កដាមក ពលករខ្មែរប្រមាណ៤០ម៉ឺននាក់បានវិលត្រឡប់មកវិញ ដែលចំនួននេះ នឹងមានការកើនឡើងថែមទៀតបើភាគីទាំងពីរនៅតែបន្តប្រយុទ្ធគ្នា ខណៈនៅថ្ងៃនេះ រំពឹងថានឹងមានពលករខ្មែរ១៥ម៉ឺននាក់ទៀត វិលត្រឡប់មកវិញ។

លោកស្រីបន្តថា តាមរយៈព័ត៌មានដែលទទួលបាន ពលករខ្មែរ ត្រូវបានទទួលរងការវាយធ្វើបាប គម្រាមកំហែង ពីសំណាក់ក្រុមជ្រុលនិយមពីភាគីថៃ ដែលលោកស្រីអំពាវនាវដល់ភាគីថៃ ជួយការពារពលករខ្មែរដែលកំពុងរស់នៅប្រទេសថៃផងដែរ៕