Скачать или смотреть ឯ.ឧ ចេវ ហាក់ ប្រជុំដកបទពិសោធន៍ការងាររឹតបន្តឹងច្បាប់ស្តីពីចរាចរណ៍ផ្លូវគោក ប្រចាំត្រីមាសទី១ ឆ្នាំ២០២៤

រាជធានីភំ្នពេញ ៖ អនុវត្តតាមអនុសាសន៍ណែនាំដ៏ខ្ពង់ខ្ពស់ របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានរៀបចំកិច្ចប្រជុំដកបទពិសោធន៍ការងាររឹតបន្តឹងច្បាប់ស្តីពីចរាចរណ៍ផ្លូវគោកប្រចាំត្រីមាសទី១ ឆ្នាំ២០២៤ ក្រោមអធិបតីភាព ឯកឧត្តម ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នាព្រឹកថ្ងៃពុធ ១១កើត ខែផល្គុន ឆ្នាំថោះ បញ្ចស័ក ពស. ២៥៦៧ ត្រូវនឹងថ្ងៃទី២០ ខែមីនា ឆ្នាំ២០២៤ នៅអគ្គស្នងការដ្ឋាននគរបាលជាតិ ។
កិច្ចប្រជុំនេះ មានការអញ្ជើញចូលរួមពី ឯកឧត្តមអនុប្រធាននាយកដ្ឋានកណ្តាល ឯកឧត្តមប្រធាននាយកដ្ឋាន អនុប្រធាននាយកដ្ឋាន ស្នងការរងនគរបាលរាជធានី-ខេត្ត នាយការិយាល័យចំណុះនាយកដ្ឋាន នាយការិយាល័យនគរបាលចរាចរណ៍ផ្លូវគោករាជធានី-ខេត្ត សរុបចំនួន ៦៩ រូប។
ឯកឧត្តម ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ មានប្រសាសន៍ថា តាងនាម ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ថ្ងៃនេះ ឯកឧត្តមមានសេចក្តីសោមនស្សរីករាយ ដែលបានចូលរួមកិច្ចប្រជុំដកបទពិសោធន៍ការងាររឹតបន្តឹងច្បាប់ ស្តីពីចរាចរណ៍ផ្លូវគោកប្រចាំត្រីមាសទី១ ឆ្នាំ២០២៤ ។ ទន្ទឹម ឯកឧត្តម ក៏បានឯកភាពទាំងស្រុងចំពោះរបាយការណ៍បូកសរុបរបស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ផងដែរ។
ឯកឧត្តមអគ្គស្នងការរង មានប្រសាសន៍ទៀតថា តាមរយៈនៃរបាយការណ៍នេះ គឺជាសូចនាករមួយដែលអាចវាស់កម្រិត នៃការអនុវត្តការរឹតបន្តឹងច្បាប់ចរាចរណ៍ផ្លូវគោកនៅគ្រប់បណ្តារាជធានី-ខេត្ត ។ ទាំងនេះ គឺជាលទ្ធផលនៃកិច្ចខិតខំប្រឹងប្រែងរបស់យើងនៅគ្រប់បណ្តារាជធានី-ខេត្ត ទោះបីនៅតាមបណ្តារាជធានី-ខេត្តមួយចំនួននៅមានតួលេខខ្ពស់ក៏ដោយ ក៏ជាការខិតខំប្រឹងប្រែងដើម្បីឆ្ពោះទៅកាត់បន្ថយគ្រោះថ្នាក់ចរាចរណ៍ឲ្យមានកម្រិតទាប។
ដើម្បីឲ្យការអនុវត្តមានប្រសិទ្ធភាពបន្ថែមទៀត ឯកឧត្តម ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ បានណែនាំដល់មន្រ្តីជំនាញចំនួន៥ចំណុច ដូចខាងក្រោម ៖
១-ការងារគ្រប់គ្រងកងកម្លាំងក្នុងអង្គភាព
២-ការងារទប់ស្កាត់កាត់បន្ថយគ្រោះថ្នាក់ចរាចរណ៍
៣-ការងាររឹតបន្តឹងច្បាប់ស្តីពីចរាចរណ៍ផ្លូវគោក
៤-ការងារអប់រំផ្សព្វផ្សាយ
៥-ការងារប្រតិកម្មរហ័ស៕