Скачать или смотреть Vladimir Leninning biografiyasi *Ma'lumotlar Kun.uz saytidan olingan!

Vladimir Lenin – XX asrdagi eng mashhur siyosiy arboblardan. Dunyodagi birinchi sotsialistik davlat asoschisini bu davlat qulamaguncha “proletariat dohiysi” deb kelishgan.

Leninning asl familiyasi – Ulyanov. Lenin – uning taxallusi. Siyosatchi 1870 yilda Rossiyaning Simbirsk shahrida tug‘ilgan. Otasi – maktab ta’limini nazorat qiluvchi inspektor, onasi esa o‘qituvchi bo‘lib ishlagan. Ulyanov maktabda a’lo baholarga o‘qigan hamda tengdoshlaridan kuchli xotirasi, tartib-intizomli va qiziquvchanligi bilan ajralib turgan.

Lenin o‘smirlik vaqtida uning akasi Aleksandr podsho hukumatiga qarshi bo‘lgan “Xalq irodasi” noqonuniy tashkilotiga aralashgani va imperator Aleksandr III'ga suiqasd uyushtirishni rejalashtirgan guruh bilan til biriktirgani uchun hibsga olinadi va osib o‘ldiriladi. Bu voqea 17 yoshli yigitning xotirasida chuqur iz qoldiradi va dunyoqarashini tamom o‘zgartirib yuboradi. Shu vaqtdan e’tiboran Ulyanovning inqilobiy faoliyati rivojlana boshladi.

1887 yilning kuzida Lenin Qozon universitetining yuridik fakultetiga o‘qishga kiradi, ammo uch oy ichida talabalarning noqonuniy yig‘ilishida qatnashganlikda ayblanib, o‘qishdan haydaladi. U hibsga olinib, Qozondan bobosining Kokushkino qishlog‘idagi uyiga surgun qilinadi. Bir yildan so‘ng Qozonga qaytishiga ruxsat berishadi, lekin universitet Ulyanovni qayta o‘qishga qabul qilmaydi. Bekorchi bo‘lib qolgach, inqilobiy siyosiy adabiyotlarni o‘rgana boshlaydi. Ayniqsa, Karl Marksning “Kapital” asari unga juda kuchli ta’sir o‘tkazadi. Keyinchalik oilasi bilan Samaraga ko‘chib keladi va bu yerda yana qayta yuridik fakultetga o‘qishga kiradi. Ma’lum muddat advokat bo‘lib ishlaydi.

1895 yilda Lenin Yevropa bo‘ylab sayohat qiladi va Georgiy Plexanov (“rus marksizmining otasi” sifatida tanilgan), Vilgelm Libknext (Germaniyada sotsial-demokratik partiya asoschilaridan biri) va Pol Lafarg (fransiyalik sotsialist siyosatchi) kabi mashhur odamlar bilan uchrashuvlar o‘tkazadi. Vataniga qaytgach, bir guruh hamfikrlari bilan “Ishchilar sinfini ozod qilish uchun kurash ittifoqi” degan birlashma tuzadi. Avtokratiyaga qarshi kurash g‘oyasini faol ravishda tarqata boshlaydi.